Ũwʼo Ĩũlũ wa Ĩvinda Yũkĩte
We waaĩkũlya yo ĩvinda yũkĩte yĩkeethĩwa yĩilye ata? Mbivilia ĩmanyĩasya kana andũ makilyĩ kwona maũndũ manene mũno na ma vata mayĩthĩwa ĩũlũ wa nthĩ.
Yesũ nĩwawetie maũndũ ala makatuma andũ ‘mamanya kana Ũsumbĩ wa Ngai wĩ vakuvĩ.’ (Luka 21:31) Athanie kana ve maũndũ maingĩ makethĩwa, na katĩ wa maũndũ asu nĩ makaũ, ithingitho nene sya nthĩ, ũnyivu wa lĩu, na mowau ma kũkwatanwʼa, na maũndũ asu nĩtũendeee kũmona ũmũnthĩ.—Luka 21: 10-17.
Mbivilia nĩsyokete ĩkaelesya mũnango ũndũ ‘mĩthenya ya mũminũkĩlyo’ ya mosumbĩ ma andũ ĩkethĩwa ĩilye. Ĩeleetye kana andũ makeethĩwa na mwĩkalĩle mũthũku mũno. No ũsome maũndũ asu ĩandĩkonĩ ya 2 Timotheo 3:1-5. Yĩla woona maũndũ asu maandĩkĩtwe ĩandĩkonĩ yĩu maendeee kwĩkwa nĩ andũ ũmũnthĩ, vate nzika nĩwĩtĩkĩlaa kana wathani ũsu wa Mbivilia nĩwosanĩte vyũ na kĩla kĩendeee.
Kwĩkĩka kwa maũndũ asu kwĩonanyʼa ata? Kwĩonanyʼa kana Ũsumbĩ wa Ngai wĩ vakuvĩ kũete moalyũku manene ala makatuma nthĩ yĩthĩwa vandũ vaseo va kwĩkala. (Luka 21:36) Ngai nũeleetye Mbivilianĩ maũndũ maseo ala makethĩwa ĩũlũ wa nthĩ na ala andũ ala makatũa ĩũlũ wayo makatanĩa. Vaa ĩtheo ve na maũndũ amwe katĩ wa asu.
ŨSUMBĨKI MŨSEO
“Na [Yesũ] anengwa ũsumbĩko, na ndaĩa, na ũsumbĩ, nĩ kana ngo syonthe sya andũ, na mbaĩ, na ithyomo imũthũkũmae: ũsumbĩko wake nĩ ũsumbĩko wa tene na tene, ũla ũtakavĩta, na ũsumbĩko wake ũla ũtakanangĩka.”—NDANIELI 7:14.
Ũu nĩ kwasya atĩĩ: No ũtanĩe thayũ ungu wa silikalĩ nzeo mũno ya nthĩ yonthe ĩla ĩũngamĩtwʼe nĩ Ngai na akanyuva Mwana wake ethĩwe Mũsumbĩ wayo.
ŨIMA WA MWĨĨ
“Ũla ũtwĩe kwʼo ndakasya, Nyie nĩ mũwau.”—ISAIA 33:24.
Ũu nĩ kwasya atĩĩ: Ndũkawaaa kana kwonza mamutha na ũkethĩwa ũtonya kwĩkala tene na tene.
MŨUO MWINGĨ
“Nake nũtumaa makaũ mathela kũvika kĩtulu kya nthĩ.”—SAVULI 46:9.
Ũu nĩ kwasya atĩĩ: Kũikethĩwa ĩngĩ kaũ na mathĩna ala ũetae.
NTHĨ ĨKEETHĨWA YUSĨE ANDŨ ASEO
“Mũthũku ndakethĩwa . . . Ala auu makatiĩwa nthĩ.”—SAVULI 37:10, 11.
Ũu nĩ kwasya atĩĩ: Andũ athũku maikethĩwa vo ĩngĩ, no ala mendaa kũmwĩwʼa Ngai makethĩwa kwʼo.
NTHĨ ĨKATWʼĨKA VANDŨ VASEO MŨNO VA KWĨKALA
“Makaaka nyũmba, na kũtũa nthĩnĩ wasyo; na makavanda mĩũnda ya mĩsavivũ, na makaya ũsyao wayo.”—ISAIA 65:21, 22.
Ũu nĩ kwasya atĩĩ: Nthĩ yonthe ĩkeethĩwa yĩ mbanake. Ngai akasũngĩa mboya sitũ ila tũvoyaa tũyenda kwenda kwake kwĩkĩke “kũũ nthĩ.”—Mathayo 6:10.
No Wendeewʼe Nĩ Ii
MOSŨNGĨO MA MAKŨLYO MA MBIVILIA
Ũsumbĩ wa Ngai Ũkeanĩsya Kyaũ?
Ĩmanyĩsye maũndũ ala ũsumbĩ wa Ngai ũkeka wasumbĩka nthĩ.
MOMANYĨSYO MA VATA MA MBIVILIA
Ũsumbĩ wa Ngai Nĩ Kyaũ?
Ĩla Yesũ waĩ ĩũlũ wa nthĩ, amanyĩisye ĩũlũ wa Ũsumbĩ wa Ngai kwĩ ũvoo ũngĩ o na wĩva. Kwa myaka maana maingĩ, andũ methĩĩtwe maivoya Ũsumbĩ ũsu wũke.
ĨŨLŨ WITŨ
Kũlya Ũthokewe
Kwata ũsũngĩo wa ĩkũlyo yĩkonetye Mbivilia, kana wĩmanyĩsye mũnango ĩũlũ Ngũsĩ sya Yeova.
