Ngai Etawa Ata? Ngai mwene aĩtye atĩĩ: “Ninyie Yeova, nĩyo syĩtwa yakwa.” (Isaia 42:8) Ĩsyĩtwa ya Ngai yonekaa mavinda ta 7,000 nthĩnĩ wa Mbivilia. Ĩndĩ o na vailye ũu, Mbivilia mbingĩ nivetete ĩsyĩtwa yĩu na vandũ vayo ikekĩa masyĩtwa ma ũnene, ta “Mwĩaĩi.” Nũndũ Ngai nĩwendaa ũtwʼĩke mũnyanyae, nũkũthoketye ‘wĩkaĩle ĩsyĩtwa yake.’—Savuli 105:1.

Masyĩtwa ma Ũnene ma Yeova. Mbivilia nĩtũmĩaa masyĩtwa ma ũnene ta “Ngai,” “Mwene Vinya Wʼonthe,” “Mũmbi,” “Asa,” “Mwĩaĩi,” na “Mũsumbĩ Mũnene” yĩla ĩkũneenea Yeova. Mbivilianĩ ve mboya mbingĩ itũmĩĩte ĩsyĩtwa ya ũnene ya Ngai vamwe na ĩsyĩtwa yake mwene, Yeova.—Ndanieli 9:4.

 Ũndũ Ngai Ũilye. Ngai nĩ veva na kwoou ndatonya kwoneka. (Yoana 4:24) Mbivilia yaĩtye kana “vaiĩ mũndũ waamwona Ngai.” (Yoana 1:18) O na ĩngĩ Mbivilia nĩwetete maũndũ angĩ ĩũlũ wa ũndũ Ngai ũilye. Yaĩtye kana no tũtume Ngai athata kana ethĩwa na “ũtanu.”—Nthimo 11:20; Savuli 78:40, 41.

Ndaĩa sya Kwendeesya sya Ngai. Ngai ndendeeasya mũndũ nũndũ wa nthĩ ĩla umĩte kana ũko ũla umĩte. (Meko ma Atũmwa 10: 34, 35) Mbivilia yĩeleetye kana we nĩ Ngai wĩ “tei na mũseo, ũtathataa mĩtũkĩ, na wĩ na wingĩ wa ũseo wĩ wendo na wʼo.” (Kuma 34: 6, 7) Ĩndĩ ve ndaĩa inya Ngai wĩthĩawa nasyo sya kwendeesya mũno.

Vinya. Nũndũ nĩwe “Ngai Mwene Vinya Wʼonthe,” ethĩawa na vinya mwingĩ wa kwĩanĩsya ũndũ wʼonthe ũla wathana.—Mwambĩlĩlyo 17:1.

Ũĩ. Ngai nĩ mũĩ mũno kũvĩtũka mũndũ o na wĩva. Ũu nĩwʼo ũtumaa Mbivilia yasya kana nĩwe “e weka mũĩ.”—Alomi 16:27.

Ũsili wa katĩ. Mavinda onthe Ngai ekaa ũla waĩle. Mbivilia yaĩtye kana meko onthe make nĩ ‘meanĩu’ na ‘nde naĩ.’—Kũtũngĩlĩlwa Kwa Mĩao 32:4.

Wendo. Mbivilia yaĩtye kana “Ngai nĩ wendo.” (1 Yoana 4:8) Ũu nĩ kwasya kana Ngai ndekaa o kwonanyʼa wendo ĩndĩ we mwene nĩ wendo. Wendo mwingĩ ũla Ngai wĩthĩawa nawʼo nũtumaa eka maũndũ onthe kwa wendo, na ũu nũtumaa tũtetheka mũno.

Ũnyanya wa Ngai na Andũ. Ngai nĩ Asa witũ wa ĩtunĩ ũtwendete. (Mathayo 6:9) No tũtwʼĩke anyanya make twamũĩkĩĩa. (Savuli 25:14) Kwa wʼo nũtũthoketye tũmũthengeee kwa kũvoya na ‘tũimwiĩa kwĩmakĩa kwitũ kwʼonthe, nũndũ nũtũthĩnĩkĩaa.’—1 Vetelo 5:7; Yakovo 4:8.

Yesũ na Ngai Mayĩanene. Yesũ nĩ wa mwanya mũno nũndũ nowe e weka woombiwe nĩ Ngai ĩmwe kwa ĩmwe. Kĩu nĩkyo kĩtumaa Mbivilia ĩmwĩta Mwana wa Ngai. (Yoana 1:14) Yeova amũmbie Yesũ na ĩndĩ amũtũmĩa e “mũthũkũmi mũnene” kũmba syĩndũ ila ingĩ syonthe.—Nthimo 8:30, 31; Akolosai 1:15, 16.

 Yesũ Klĩsto ndaasya kana we mwene nĩ Ngai. Yesũ aielesya kĩvathũkanyʼo kĩla kĩ vo katĩ wake na Ngai aisye atĩĩ: “Naumie kwake, na Ũsu nĩwe wandũmie.” (Yoana 7:29) Ĩvinda yĩngĩ aineena na ũmwe wa amanyĩwʼa make, Yesũ amwĩtie Yeova “Asa wakwa na Asa wenyu” na “Ngai wakwa, na Ngai wenyu.” (Yoana 20:17) Yĩla Yesũ wakwie, Yeova nĩwamũthayũũkisye na amũnenga thayũ ĩtunĩ, amũnenga ũkũmũ mũnene, na amwĩkalya kwʼokonĩ kwake kwa aũme.—Mathayo 28:18; Meko ma Atũmwa 2:32, 33.

Yesũ Klĩsto No Aũtetheesye Ũmũthengeee Ngai

Yesũ ookie ĩũlũ wa nthĩ nĩ kana amanyĩsye andũ ĩũlũ wa Ĩthe wake. Yeova mwene aineena ĩũlũ wa Yesũ aisye atĩĩ: “Ũũ nĩwe Mwana wakwa mwendwa. Mwĩwʼei we.” (Maliko 9:7) Yesũ nĩwe wĩsĩ Ngai nesa vyũ kwĩ mũndũ o na wĩva. Aisye atĩĩ: “Vaiĩ mũndũ wĩsĩ Asa nũũ ate o Mwana vamwe na o ũla Mwana wendaa kũmũvuanĩsya.”—Luka 10:22.

Yesũ nĩwonanasya ndaĩa sya Ngai nesa vyũ. Yesũ eekaa maũndũ ta Asa wake na ũu watumie asya atĩĩ: “Mũndũ o na wĩva ũla wambonie nĩwamwonie Asa o nake.” (Yoana 14:9) Maũndũ ala Yesũ weekaa na ala waneenaa moonanasya ũndũ Asa wake wĩ wendo na ũu watumaa andũ menda kũmũthengeea Ngai. Nũndũ wa ũu aisye: “Nyie ninyie nzĩa na ninyie wʼo na ninyie thayũ. Vaiĩ mũndũ wũkaa kwa Asa atesĩle kwakwa.” (Yoana 14:6) O na ĩngĩ aisye atĩĩ: “Athaithi ma wʼo makamũthaitha Asa nthĩnĩ wa veva na nthĩnĩ wa wʼo, nũndũ vate nzika, Asa emantha andũ ta asu mamũthaithe.” (Yoana 4:23) Kwasũanĩa ũndũ ũsu! Yeova aendeee kũmantha andũ mailye taku ala mekwenda kũmanya ũwʼo ĩũlũ wake.