Nũsomete nesa makaseti ma Mũsyaĩĩsya ma mwaka ũũ? Ethĩwa nũu, sisya ethĩwa nũtonya kũsũngĩa makũlyo aa maatĩĩe:

Twaĩle kũkua etĩkĩw’a mauta ata?

Nĩtwendeeaw’a nĩ mũĩkĩĩo woo, ĩndĩ tũimosaa ta ma vata mũno ũndũ vataĩle. Tũtataa mũno tũikatw’ĩke andũ ma kwendeesya angĩ. Tũyaĩle kũmakũlya ĩũlũ wa wĩkwatyo woo nũndũ ũsu nĩ ũndũ ũtatũkonetye.​—w20.01, ĩth. 29.

Nĩ kyaũ kyaĩle ũkũĩkĩĩthya kana Yeova nũlũnganaa naku?

Mbivilia yonanĩtye kana nĩwakwĩsĩ o na ũte mũsyae. Nũkwĩthukĩĩasya wamũvoya. O na nĩwĩsĩ kĩla kĩ ngoonĩ yaku na kĩla ũsũanĩĩte, na meko maku no matume atana. (1 Mav. 28:9; Nth. 27:11) Na eka ũu, nũkũtetheetye ũmũthengeee.​—w20.02, ĩth. 12.

Nĩ ĩndĩĩ twaĩle kũneena na nĩ ĩndĩĩ twaĩle kũvindya?

Nĩtũtanĩaa kũneena ĩũlũ wa Yeova. Nĩtũneenaa twoona mũndũ ayĩka ũndũ ũtonya kũmũlikya naĩnĩ. Atumĩa nĩmaĩle kũneena moona Mũklĩsto waĩle kũtawa. Tũyaĩle kũneena nĩ kana twĩnzĩĩe (kana tũvuany’e) ũndũ wĩa witũ ũtethaw’a nthĩ ila ikũnĩte maluvuku wĩa witũ. Tũyaĩle kũtavya andũ maũndũ maĩlĩte kwĩthĩwa me kĩmbithĩ.​—w20.03, ĩth. 20-​21.

Ngie ila iwetetwe ĩvukunĩ ya Yoeli kĩlungu kya 2 ivathũkene ata na ila syĩ Ũvuany’o kĩlungunĩ kya 9?

Ĩandĩko ya Yoeli 2:​20-29 yathanie kana Ngai akaveta ngie na aitũnga kĩla ngie isu syanangĩte. Na ĩndĩ ĩtina wa ũu, aimĩtulũĩla mĩĩ yonthe veva wake. Kĩlungu kĩmwe kyeanĩie yĩla Ambaviloni mavithũkĩie Isilaeli, na kĩla kĩngĩ kyeanĩa myaka mingĩ ĩtina wa vau. Nayo ĩandĩko ya Ũvuany’o 9:​1-​11 yĩneeneete etĩkĩw’a mauta, na yĩmaelekanĩtye na ngie nũndũ ũmũnthĩ matavanasya ũsilĩlo wa Ngai ĩũlũ wa nthĩ ĩno nthũku, na kĩu nĩkĩnyamaasya ala makwataa nthĩ mbau.​—w20.04, ĩth. 3-6.

Ũmũnthĩ mũsumbĩ wa ngalĩ ya ĩũlũ nũũ?

Nĩ Russia vamwe na nthĩ ila ingĩ syĩ ngwatanĩo nayo. Nthĩ isu nĩsyũkitĩte athũkũmi ma Ngai, ikakũna maluvuku wĩa wa kũtavany’a, na ikonany’a nimenete Ngũsĩ. Mũsumbĩ wa ngalĩ ya ĩũlũ na wa ngalĩ ya ĩtheo methĩĩtwe maisindana.​—w20.05, ĩth. 13.

“Ũsyao wa veva” no nguma kenda ila iwetetwe nthĩnĩ wa Akalatia 5:​22, 23 syĩ syoka?

Aiee. Veva mũtheu nũtũtetheeasya kwĩthĩwa na nguma ingĩ nzeo, ta ũlũngalu. (Aev. 5:​8, 9)​—w20.06, ĩth. 17.

Nĩ mũisyo wĩva wumanaa na kwĩkĩa syĩndũ syaku isesenĩ sya kũea ngewa?

Syĩndũ ila ũkwĩkĩa isesenĩ isu nitonya kwonany’a kana nĩwĩyonaa, vandũ va kwĩthĩwa wĩnyivĩtye.​—w20.07, ĩth. 6-7.

Aklĩsto matonya kwĩmanyĩsya kyaũ kuma kwa atei ma makũyũ mesĩ wĩa woo?

Maendaa kũtea vala mesĩ makũyũ me vo na saa ila matonya kũmakwatya. Nĩmesĩ kũtũmĩa nesa mĩio ĩla yaĩle ya wĩa. Methĩawa na ũkũmbaũ wa kũthũkũma wĩa woo o na maũndũ mavĩndũka. O naitũ no twĩke ũu ũtavany’anĩ witũ.​—w20.09, ĩth. 5.

Tũtonya ata kũtetheesya amanyĩw’a maitũ mamwende Yeova mũno?

No tũmekĩe vinya masomae Mbivilia kĩla mũthenya na maivindĩĩsya kĩla masoma. O na nĩtwaĩle kũmamanyĩsya kũvoya.​—w20.11, ĩth. 4.

Yĩla Vaulo waisye kana “onthe makeethĩwa thayũ nũndũ wa Klĩsto” awetaa aaũ?​—1 Ako. 15:⁠22.

Ndoonanasya kana kĩla mũndũ akathayũũkw’a. Awetaa Aklĩsto etĩkĩw’a mauta, ala ‘matheetw’e nthĩnĩ wa ngwatanĩo vamwe na Klĩsto Yesũ.’ (1 Ako. 1:2; 15:18)​—w20.12, ĩth. 5-6.

Etĩkĩw’a mauta makeeka ata ĩtina wa kũalyũlwa na mĩtũkĩ ta “kũveny’a na kũsalukya, ĩvinda ya soo wa mũthya”?​​—1 Ako. 15:​51-​53.

Makakwatĩanĩa na Klĩsto wĩanĩ wa kũĩthya andũ na ndata ya kyũma. (Ũvu. 2:​26, 27)​—w20.12, ĩth. 12-​13.