No twasye ũu ti w’o. Ndevili ndaatavya Eva kana aya ĩtunda yĩla yavatanĩtwe nĩ Ngai mwĩĩ wake nĩw’o ũkakw’a, ĩndĩ ũyĩthĩa ve kĩndũ kĩ nthĩnĩ wake kĩtenekee kyauma na kyathi kwĩkala thayũ vandũ vangĩ (kĩla andũ amwe ũmũnthĩ maasya nĩ thayũ ũtatonya kũkw’a). Satani aneenie na Eva atũmĩĩte nzoka amwĩa kana aya ĩtunda ya mũtĩ ũsu ‘ndakakw’a’ nongi. Kwoou Satani avangie kana Eva eendeea kwĩkala thayũ, na aitanĩa maũndũ maseango kũũ nthĩ atasumbĩkĩtwe nĩ Ngai.—Mwa. 2:17; 3:3-5.

Ethĩwa ĩmanyĩsyo yĩĩ ya ũvũngũ ya kana mũndũ e thayũ ũtakusaa yĩyaambĩĩa mũũndanĩ wa Eteni, yambĩĩie ĩndĩĩ? Tũitonya kũweta nesa. Kĩla twĩsĩ nĩ kana ũthaithi w’onthe wa ũvũngũ waminiwe nĩ ĩla mbua mbingĩ ya ĩvinda ya Noa. Nĩkwĩthĩwa Noa na mũsyĩ wake nomo maĩ athaithi ma w’o ma Yeova na nomo mavonokie mbũa ĩsu, vai ũmwe woo waĩ atonya kũtwaĩĩsya momanyĩsyo ma ũvũngũ.

Kwoou ũmanyĩsyo ũla andũ mamanyĩasya ũmũnthĩ wa kana thayũ wa mũndũ ndũkusaa no nginya wĩthĩwe wambĩĩiw’e ĩtina wa mbua ĩsu. Yĩla Ngai wathokoanisye kĩthyomo ndũanĩ ya Mbaveli andũ nĩmanyaĩĩkie “ĩũlũ wa nthĩ yonthe,” na kwoou no nginya methĩwe maendie na yĩsilya ya kana mũndũ e thayũ ũtatonya kũkw’a. (Mwa. 11:8, 9) Ĩndĩ o na ũvũngũ ũsu wĩthĩwe wambĩĩie ĩndĩĩ, tũi na nzika kana “ĩthe wa ũvũngũ,” Satani ũla nĩwe Ndevili, nĩwe watumie wambĩĩa, na ndalea kwĩthĩwa atanie mũno kwona ũinyaĩĩka.—Yoa. 8:44.