KWONDŨ WA ANDŨ MA MŨIKA
9: Kwĩmanya
ŨU NĨ KWASYA ATA?
Kwĩmanya ti o kwĩthĩwa wĩsĩ ĩsyĩtwa yaku kana ũndũ ũilyĩ. Ũu ũkonetye myolooto ĩla ũatĩĩaa, maũndũ ala ũĩkĩĩaa, na mũtuo waku. Kwa w’o, kwĩmanya nĩkw’o kũtumaa wĩthĩwa ũilyĩ ũndũ ũilyĩ, nza na nthĩnĩ.
NĨKĨ NĨ ŨNDŨ WA VATA?
Weethĩwa wĩyĩsĩ nesa, ũkethĩawa ũtonya kũelesya maũndũ ala ũĩkĩĩaa vandũ va kũatĩĩa ũndũ andũ ma yĩika yaku mekaa.
“Andũ aingĩ ũmũnthĩ mailyĩ ta syĩndũ iilyĩ andũ ila ĩtũmĩawa kwĩkĩwa ngũa sya kũthoosya ndukanĩ. Andũ angĩ nĩmo manyuvaa ngũa ila meũsyĩkĩa nũndũ syo iyamba kwĩnyuvĩa ngũa ila syĩkwĩkĩa.”—Adrian.
“Nĩnĩĩmanyĩĩtye kũlũmany’a na ũndũ ũla waĩlĩte o na ethĩwa ti laisi. No nĩmanye anyanya makwa ma w’o ethĩwa nĩnĩw’aa nĩ mwĩanĩe yĩla nĩ vamwe namo nũndũ mainthing’ĩĩasya kwĩka kĩvathũkany’o na myolooto ĩla nĩatĩĩaa.”—Courtney.
MWOLOOTO WĨ MBIVILIANĨ: “Ekai kwĩthĩwa mũilye ta nthĩ ĩno, ĩndĩ mũalyũke kwa kwĩthĩwa na kĩlĩko kyeũ.”—Alomi 12:2.
ŨNDŨ ŨTONYA KWĨKA
Sũanĩa wĩenda kwĩthĩwa mũndũ wa mũthemba mwaũ oyu, na wĩenda kwĩsa kwĩthĩwa mũndũ ũilyĩ ata. Ĩka ũu kwa kũsũanĩa maũndũ ala wĩkaa nesa, mawonzu maku, na maũndũ ala ũĩkĩĩaa.
Maũndũ ala wĩkaa nesa: Nĩ na inengo na ũtũĩka wĩva? Nĩ maũndũ meva ala nĩkaa nesa? (Kwa ngelekany’o: Nyie nĩnĩatĩĩaa saa? nĩnĩsiĩĩaa? nĩ kĩthito? nĩ mũlau?) Nĩ maũndũ meva maseo ala nĩkaa?
ŨNDŨ ŨTONYA KŨŨTETHEESYA: We nĩwĩw’aa ve vinya kũmanya maũndũ maseo ala wĩkaa? Kũlya mũsyai kana mũnyanyau ũmũĩkĩĩe aũtavye maũndũ maseo ala wĩanĩasya nesa na ũmeanĩĩtye kwa nzĩa syĩva.
MWOLOOTO WĨ MBIVILIANĨ: “Eka kĩla ũmwe aosye meko make mwene, na eeka ũu akeethĩwa na kĩtumi kya kũtana nũndũ wake mwene, ĩndĩ ti kwa kwĩyĩelekany’a na mũndũ ũngĩ.”—Akalatia 6:4.
Mawonzu: Nĩ ndaĩa syĩva naĩlĩte kwaĩlangya mũnango? Nĩ ĩvinda yĩva nĩthĩawa ndonya kũtatĩka nĩke ũndũ ũtaĩlĩte? Nĩ maũndũnĩ meva naĩlĩte kwĩthĩwa ndyĩsiĩĩa mũnango?
MWOLOOTO WĨ MBIVILIANĨ: “Ethĩwa twĩasya, “Tũi na naĩ,” nĩtũkwĩkenga.”—1 Yoana 1:8.
Maũndũ ala ũĩkĩĩaa: Nĩ myolooto yĩva ya mwĩkalĩle nĩatĩĩaa na nĩkĩ? Yo nĩnĩĩkĩĩaa kana kwĩ Ngai? Nĩ maũndũ meva mandĩkĩĩthasya kana e kw’o? Nĩ meko meva nonaa mataĩlĩte na nĩkĩ? Nĩ maũndũ meva ala nĩĩkĩĩaa makekĩka ĩvinda yũkĩte?
MWOLOOTO WĨ MBIVILIANĨ: “Kĩlĩko kĩkakũsyaĩĩasya; ũmanyi ũkakũsũvĩaa.”—Nthimo 2:11.
No Wendeewʼe Nĩ Ii
MOSŨNGĨO MA MAKŨLYO 10 ALA ANDŨ MA MŨIKA MAKŨLASYA
Nyie Nĩ Mũndũ Ũilyĩ Ata?
Kũmanya ndaĩa nzeo ila wĩ nasyo, maũndũ ala ũtonya kwĩanĩsya, na mawonzu maku no kũũtetheesye kwĩka motwi maseo ĩla ũũthing’ĩĩw’a wĩke maũndũ mathũku.
