Twĩ na ũtanu mũno kwĩthĩwa na mbulosua nzaũ o vamwe na ĩvuku ya kũtũmĩa yĩla tũũmanyĩsya andũ Mbivilia! Twĩmũvoya Yeova aathime kĩthito kitũ kya kũtwʼĩkĩthya andũ aingĩ amanyĩwʼa. (Mt 28:18-20; 1Ko 3:6-9) Tũtonya kũtũmĩa mavuku asu ata?

Nũndũ mbulosua na ĩvuku Tanĩa Thayũ Tene na Tene! itũmĩĩte nzĩa nzaũ ya kũmanyĩsya, atĩĩa myolooto ĩno yonanĩtwʼe vaa ĩtheo yĩla ũkwĩyũmbanyʼa na yĩla ũũmanyĩsya mũndũ Mbivilia. a

• Somai kalungu na mũineenea ĩkũlyo yĩla yonanĩtwʼe

• Somai maandĩko ala maandĩkĩtwe “soma,” na ũitetheesya mũmanyĩwʼa one ũndũ ũtonya kũmatũmĩa

• Ĩloelei vitio na mũyĩineenea, mũtũmĩĩte makũlyo ala monanĩtwʼe

• Tatai mwĩmanyĩsye ĩsomo yonthe kĩla ĩvinda mũkwĩmanyĩsya

Yĩla wĩ ũtavanyʼa ambĩĩa na kũmũnenga mũndũ ĩ mbulosua nĩ kana ũmanye kana nũkwendeewʼa. (Sisya ĩsandũkũ ĩthangũnĩ ya 16, “ Kũnengane Mbulosua Tanĩa Thayũ Tene na Tene! Yĩla Ũũtavya Mũndũ ya Mbee.”) Mwamina kwĩmanyĩsya mbulosua na mũmanyĩwʼa nũkwenda kũendeea kwĩmanyĩsya, mũnenge ĩvuku na mũyambĩĩa kwĩmanyĩsya ĩsomo ya 04. Ethĩwa nũendeee kwĩmanyĩsya na mũndũ ĩvuku yĩmwe katĩ wa ala tũtũmĩaa kũmanyĩsya, ambĩĩai kwĩmanyĩsya ĩvuku Tanĩa Thayũ Tene na Tene! na ũinyuva ĩsomo yĩla mũkwambĩĩa.

ĨLOELEI VITIO YĨ NA KYONGO WĨMŨTHOKYE ĨMANYĨSYONĨ YAKU YA MBIVILIA, NA ĨNDĨ MŨISŨNGĨA MAKŨLYO AA MAATĨĨE:

• Nĩ maũndũ meva amanyĩwʼa mekwĩmanyĩsya ĩvukunĩ yĩĩ yeũ?

• Nĩkĩ waĩlĩte kwonyʼa amanyĩwʼa eũ vitio ĩno?

• Nĩ maũndũ meva ũtonya kũtetheesya mũmanyĩwʼa eanĩsye o kavola kwa kavola?—Sisya kyati ĩthangũnĩ ya 16, “ Kĩeleelo na Maũndũ ma Kwĩka Nthĩnĩ wa Kĩla Kĩlungu”