Yakovo nĩweesĩ kana Yeova endaa kũthaithwa e weka, o na kau ĩvindanĩ yĩu vaiĩ mwĩao woonanĩtye kana andũ mayaĩle kũthaitha ngai sya mũvw’anano. (Kuma 20:3-5) Kwoou Yeova amina kũmwĩa asyoke Mbetheli, Yakovo nĩweeie andũ onthe ala waĩ namo mavetange ngai sya mĩvw’anano. Andũ asu nĩmamũnengie ngai isu, vamwe na ngome sya matũ ila nĩvatonyeka ikethĩwa syeekĩawa nĩ kana mũndũ esiĩĩe ndakekwe naĩ, nake aivetanga. (Mwa 35:1-4) Vate nzika, Yeova nĩwendeeiw’e nĩ ĩtambya yĩu Yakovo woosie.

Ũmũnthĩ, tũtonya kwĩka ata tũkonany’a kana tũmũthaithaa Yeova e weka? Ũndũ ũmwe wa vata mũno tũtonya kwĩka nĩ kwĩvetangana na syĩndũ ila ikonanĩtye na ngai sya mĩvw’anano kana maveva mavuku. Ũu nĩ vamwe na kwĩvathana na syĩndũ ikonanĩtye na ũwe, na kwĩthĩwa twĩ metho ĩũlũ wa maũndũ ala tũkwĩtanĩthya namo. Kwa ngelekany’o, no wĩkũlye-ĩ: ‘Nĩnĩtanĩthasya na mavuku kana sinema syĩkwonany’a andũ meũnyw’a angĩ nthakame, maimũ, kana maũndũ angĩ mavĩtũkĩte vinya wa andũ? Ve maũndũ amwe nĩtanĩthasya namo monanasya kana kwĩka syama ivĩtũkĩte vinya wa mũndũ ti ũthũku?’ Twaĩlĩte kũeka vyũ kwĩka maũndũ ala Yeova ũmenete.—Sav 97:10.

ĨLOELEI VITIO YĨ NA KYONGO “MŨVĨNGEI NDEVILI,” NA ĨNDĨ MŨISŨNGĨA MAKŨLYO AA:

• Nĩ thĩna wĩva wakwatie mũmanyĩw’a wa Mbivilia wĩtawa Palesa?

• Nĩkĩ twaĩlĩte kũmantha ũtethyo kwa atumĩa yĩla ithyĩ, kana amanyĩw’a maitũ ma Mbivilia makwatwa nĩ mathĩna makonanĩtye na maveva mavuku?

• Twaĩle kwĩvathana na maũndũ meva ethĩwa nĩtũkwenda Yeova atũsũvĩae?

• Palesa oosie ĩtambya yĩva ya vata?

• Kĩsionĩ kyenyu, nĩ maũndũ meva ala mwaĩle kwĩka nĩ kana mwĩvathane na ndaimoni?