NĨKĨ NĨ ŨNDŨ WA VATA: Nzekalia athanie kana andũ kuma ithyomonĩ syonthe sya mbaĩ makeetĩkĩla ũvoo mũseo. (Nzek 8:23) Ĩndĩ nũũ ũkamamanyĩsya? (Alo 10:13-15) Twĩ na kĩanda kya mwanya kya kũtavya kĩla mũndũ kĩsionĩ kitũ ũvoo mũseo.—od-SW 84 ¶10-11.

ŨTONYA KWĨKA ŨU ATA?:

• Ĩyũmbany’e. Nũkomanaa na andũ maneenaa kĩthyomo kĩngĩ? No ũtũmĩe vulongulamu ya JW Language wĩmanyĩsye ũndũ ũtonya kũneena na mũndũ ũtũmĩĩte ndeto syĩ laisi. O na no ũtũmĩe simũ kwony’a mũndũ ũndũ ũtonya kũkwata ũvoo mwingangĩ kwa kĩthyomo kyake atũmĩĩte Kĩsese kya jw.org

• Ĩthĩwa wĩ metho. Ethĩwa wĩ ũtavany’anĩ wa nyũmba na nyũmba, ndũkaeme kũtũmĩa myanya ĩla ĩkumĩla ũneene na andũ ala ũũkomana namo kana ala meteele ngalĩ. Na ethĩwa wĩtavany’a kũndũ kũla kwĩthĩawa andũ aingĩ, ndũkolwe nĩ kĩeleelo kyaku kya kumya ũkũsĩ

• Ĩthĩwa na kĩthito. Tata vyũ ũsyoke mĩsyĩ ĩla ũtaaĩthĩa andũ. Ĩkĩa kĩthito ũtavye mũndũ o na ethĩwa no ũmwe kĩla mũsyĩ. No wĩthĩe mũndũ masaa me kĩvathũkany’o kana mũthenya o ũngĩ nthĩnĩ wa kyumwa. Andũ amwe no methĩwe matonya kũvikĩwa kwĩsĩla valũa, simũ, kana ĩla tũũtavany’a lelũnĩ

• Syokea ala mendeew’a. Syokea na mĩtũkĩ ala mendeew’a nĩ kana ũmatetheesye maendeee kwĩmanyĩsya Mbivilia. Ethĩwa nĩweethĩa mũndũ ũneenaa kĩthyomo kĩngĩ, tata ũmanthe mũtavany’a wĩsĩ kĩthyomo kĩu amũtetheesye kwĩmanyĩsya. Nĩwaĩle kũendeea kũmũsyokea nginya ĩla ũkakomana na mũtavany’a wĩsĩ kĩthyomo kyake.—od-SW 94 ¶39-40

SISYA VITIO YĨ NA KYONGO, KŨTAVANY’A “KŨVIKA ITULU SYA NTHĨ,” NA ĨNDĨ MŨISŨNGĨA MAKŨLYO AA MAATĨĨE:

• Ana-a-asa na eĩtu-asa meeyũmbanisye ata nĩ kana matavye andũ onthe kĩsionĩ kĩ vaasa kĩla maendie kũtavany’a? (1Ako 9:22, 23)

• Masindie mawetu meva?

• Matanĩie moathimo meva?

• Nĩ kwa nzĩa syĩva ũtonya kwĩkĩa kĩthito nĩ kana ũtavye andũ aingĩ kĩsionĩ kyenyu?