Ngũsĩ sya Yeova nitanĩaa kũtavya andũ onthe ũvoo mũseo ũla umĩte Mbivilianĩ nũndũ nimwendete Yeova na nĩsyendete andũ. Matavasya andũ onthe, o na ala maminĩte kwasya, “Nyie ndikwendeewʼa.” (Mathayo 22:37-​39) Wendo kwa Ngai nĩwʼo ũtũsukumaa tũatĩĩe mwĩao wa kumya “ũkũsĩ” ũla Mwana wake wanenganie. (Meko ma Atũmwa 10:42; 1 Yoana 5:3) Nĩ kana tumye ũkũsĩ ũndũ vaĩle, nĩtũneenaa na andũ ĩngĩ na ĩngĩ o tondũ athani ma Ngai ma tene meekaa. (Yelemia 25:4) Nũndũ nĩtwendete andũ onthe, nĩtũtataa ũndũ tũtonya tũmatavye ũvoo mũseo wa Ũsumbĩ o na ala maminĩte kwasya maikwendeewʼa.​—Mathayo 24:14.

 Mavinda maingĩ nĩtwĩthĩaa andũ mekwendeewʼa twasyoka nyũmbanĩ ila andũ maisye maikwendeewʼa. Ekai twone itumi itatũ sya nĩkĩ vethĩawa ũu:

•   Andũ nĩmathamaa.

•   Andũ angĩ ma nyũmba ĩsu nĩmonanasya kwendeewʼa.

•   Andũ nĩmaalyũkaa. Nũndũ wa maũndũ ala maendeee ĩũlũ wa nthĩ, kana mathĩna ma mũndũ mwene, andũ amwe nĩmesaa kwona vata wa ‘kwĩwʼa Ndeto ya Ngai’ (Mathayo 5:3) O na ala mataaendeewʼa nĩmatonya kwĩthĩwa maalyũlĩte ngoo o tondũ mũtũmwa Vaulo waalyũkile.​—1 Timotheo 1:​13.

 Ĩndĩ ĩla tũũtavanyʼa, tũilasimĩthasya andũ methukĩĩsye. (1 Vetelo 3:​15) Nĩtwĩthĩawa twĩsĩ kana kĩla mũndũ nĩwe waĩlĩte kwĩyĩkĩa ũtwi wa ũndũ ũkũmũthaitha Ngai.​—Kũtũngĩlĩlwa Kwa Mĩao 30:19, 20.