MĨSOA YA MBIVILIA ĨELEETWʼE

Maliko 1:15—“Ũsumbĩ wa Ngai wĩ Vakuvĩ”

THAŨKA

“Ĩvinda yĩla yĩnyuvĩtwe nĩ ĩviku, na Ũsumbĩ wa Ngai nĩ mũthengeeu. Ĩlilei, na mũyĩĩkĩĩa ũvoo mũseo.”—Maliko 1:15, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Ĩvinda nĩ yĩanĩu, na ũsumbĩ wa Ngai wĩ vakuvĩ; ĩlilei na mũyĩĩkĩĩa ũvoo mũseo.”—Maliko 1:15, English Standard Version.

Kĩla Ĩandĩko ya Maliko 1:15 Yonanasya

Yesũ Klĩsto aisye kana Ũsumbĩ wa Ngai a waĩ “vakuvĩ,” kana waĩ “mũthengeeu,” nũndũ nĩwe waĩ atwʼĩke Mũsumbĩ wa Ũsumbĩ ũsu, na aĩ vau vamwe namo.

Yesũ ndoonanasya kana Ũsumbĩ ũsu waĩ wambĩĩie kũsumbĩka. O na eka ũu, ĩtina nĩwatavisye amanyĩwʼa make kana Ũsumbĩ ũsu waĩ wũke ĩvindanĩ yũkĩte. (Meko ma Atũmwa 1:6, 7) Ĩndĩ, avikie ĩvindanĩ yĩla yaĩlĩte, mwakanĩ ũla Mbivilia yathanĩte waĩ aumĩle e ũla waĩ atwʼĩke Mũsumbĩ wa Ũsumbĩ ũsu. b Nũndũ wa kĩtumi kĩu Yesũ aĩ atonya kwasya: “Ĩvinda yĩla yĩnyuvĩtwe nĩ ĩviku”—ĩvinda ya kwambĩĩa ũthũkũmi wake wa kũtavanyʼa ũtheinĩ ũvoo mũseo ũla ũkonetye Ũsumbĩ ũsu.—Luka 4:16-21, 43.

Nĩ kana andũ matetheke nĩ ũvoo mũseo ĩũlũ wa Ũsumbĩ, maĩ na vata wa kwĩlila, na ũu nĩ kwonanyʼa maaĩle kũũmĩa ngoonĩ nũndũ wa naĩ ila meekie tene na mayĩkala kwosana na myolooto ya Ngai. Ala meelilile nĩmoonanisye kana maĩ na mũĩkĩĩo nthĩnĩ wa ũvoo mũseo ĩũlũ wa Ũsumbĩ ũsu wa ĩvinda yũkĩte.

Mĩsoa Ĩla Ĩthyũlũlũkĩte Maliko 1:15

Yesũ aneenie ndeto ii mwambĩĩonĩ wa ũthũkũmi wake e Kalilii. Ngewa ĩngĩ ĩla ĩneeneete ũndũ ũsu nthĩnĩ wa Mathayo 4:17 yaĩtye, “Kuma ĩvinda yĩu na kũendeea,” Yesũ atavanasya ĩũlũ wa Ũsumbĩ wa Ngai. Ũsumbĩ ũsu nĩwʼo waĩ kyongo kya ũthũkũmi wa Yesũ. O na eka ũu, Ũsumbĩ ũsu ũwetetwe mbee wa mavinda 100 nthĩnĩ wa ala Mavuku ana ma Ũvoo Mũseo c, mũno mũno ndetonĩ ila Yesũ waneenie. Mbivilianĩ, Yesũ aneenie kaingĩ ĩũlũ wa Ũsumbĩ wa Ngai kwĩ ũndũ waneeneie ũndũ ũngĩ o na wĩva.

Soma Maliko kĩlungu kya 1 vamwe na maelesyo ma kwongeleela.

a Ũsumbĩ wa Ngai nĩ silikalĩ yĩ vo yambĩĩiwʼe nĩ Ngai ĩtunĩ nĩ kana ĩanĩsye kwenda kwake kwondũ wa nthĩ. (Ndanieli 2:44; Mathayo 6:10) Nĩ kana wĩmanyĩsye maũndũ maingangĩ, sisya ũvoo wĩ na kyongo, “Ũsumbĩ wa Ngai Nĩ Kyaũ?”

b Yesũ nĩwaaĩlĩte kũtwʼĩka Mũsumbĩ nĩ kana eanĩsye kĩmwe katĩ wa ianda syake e Masia ũla wathanĩtwe, kĩla kyaĩ kĩanda kya mwanya wanengetwe nĩ Ngai. Nĩ kana ũkwate ũvoo mwingangĩ ĩũlũ wa mawathani ma Mbivilia ala monanasya kana Yesũ nĩwe Masia, sisya ũvoo waĩtye: “Mo Mawathani Ala Mawetete Ĩũlũ wa Masia Nĩmaĩkĩĩthĩtye Kana Yesũ Nĩwe Masia?”

c Mavuku ma Ũvoo Mũseo nĩmo mavuku ma mbee ana ma Maandĩko ma Kĩkiliki ma Kĩklĩsto, ala kaingĩ metawa Ũtianĩo Mweũ, na maeleasya ngewa ya maũndũ ala Yesũ weekie, na ũthũkũmi wake.