Mbivilia ndyonanĩtye mũthenya ũla Yesũ wasyaiwe o tondũ mavuku aa me vaa ĩtheo maeleetye:

•   “Matukũ ala Yesũ wasyaiwe mayĩsĩkĩe.”—New Catholic Encyclopedia.

•   “Matukũ ala Yesũ wasyaiwe mayĩsĩkĩe.”—Encyclopedia of Early Christianity.

 O na kũtwʼĩka Mbivilia ndĩwetete matukũ ala Yesũ wasyaiwe, nĩyĩeleetye maũndũ elĩ meekĩkie ĩvinda ya kũsyawa kwake ala matetheetye andũ aingĩ kũmanya kana ndaasyawa Matukũ 25, Mwei wa ĩkũmi na ilĩ.

Ndaasyawa ĩvindanĩ ya mbevo

1.   Kũandĩkĩthwʼa. Ĩvinda ĩkuvĩ Yesũ atanamba kũsyawa, mũsumbĩ Kaisalĩ Aukusito nĩwaumisye mwĩao nĩ kana “andũ onthe maandĩkwe” Kĩla mũndũ aaĩlĩte kũthi kũandĩkĩthwʼa “ndũanĩ yoo.” Savalĩ ĩsu yaĩ ĩtonya kũkua kyumwa kĩmwe kana mbeange. (Luka 2:1-3) Nĩvatonyeka mwĩao ũsu ũkethĩwa waumiwʼe nĩ kana koti ũla andũ maumasya wongelekange, na andũ angĩ mayandĩkĩthwʼa itanĩ sya kaũ. Ĩndĩ ve myei mĩna vaĩ vinya kwĩa andũ meke ũu, na kwoou mũsumbĩ Aukusito ndaĩ amba kwĩtĩkĩla kũthĩnyʼa andũ aingĩ ala wasumbĩkĩte kwa kũmalasimĩthya mathi savalĩ ndaasa ĩvinda ya mbevo.

2.   Malondu. Aĩthi “mekalaa weũnĩ, maisyaĩĩsya indo syoo ũtukũ.” (Luka 2:8) Ĩvuku Daily Life in the Time of Jesus yaĩtye kana “kyumwa kĩmwe Vasaka ĩtanamba kwambĩĩa (Mwei wa 3 ũkilyĩ kũthela)” nginya Mwei wa 11 wĩ katĩ, indo iyavingĩawa. Ĩvuku yĩu yĩendeee kwasya: “Indo syeethĩawa ivingĩwe ĩvindanĩ ya mbevo. Ũndũ ũsu wĩ wʼoka no ũtũtetheesye kũmanya kana Yesũ ndaasyawa matukũ 25, Mwei wa ĩkumi na ilĩ, nũndũ matukũ asu kwĩthĩawa kwĩ mbevo ĩndĩ Yesũ aisyawa aĩthi maĩ weũnĩ mayĩĩthya kwosana na ĩvuku ya Mathayo, Maliko, Luka na Yoana.”

Vala Yesũ wasyaĩlwe

 No tũtalĩthye ĩvinda yĩla Yesũ wasyaiwe twaambĩĩa kũtala tũsyokete na ĩtina kuma ĩla wakwie matukũ 14 Mwei wa Nisani Mwaka wa 33. (Yoana 19:14-16) Yesũ aĩ na myaka vakuvĩ 30 ĩla wambĩlĩlye ũtavanyʼa wake wa myaka ĩtatũ na nusu vaa ĩũlũ wa nthĩ. Kwoou asyaiwe mwambĩĩonĩ wa Mwei wa ĩkũmi mwaka wa 2 mbee wa ĩvinda yitũ.—Luka 3:23.

 Nĩkĩ Kĩlisimasi yeekĩiwe matukũ 25, Mwei wa 12 na vai vandũ vonanĩtye kana Yesũ asyaiwe matukũ asu? Ĩvuku Encyclopædia Britannica yaĩtye kana nĩvatonyeka ũkethĩa atongoi ma ndĩni manyuvie mũthenya ũsu “nĩ kana wosane na sikũkũ ya ‘kũsyawa kwa sua yĩtasindawa’ ĩla yeekawa ĩvindanĩ ya mbevo nĩ Alomi. Kwosana na ĩvuku The Encyclopedia Americana, asomi aingĩ maĩkĩaa kana ũndũ ũsu weekiwe “nĩ kana andũ ala maalyũkĩte makatwʼĩka Aklĩsto maendeee kwenda Ũklĩsto.”