Nĩ kwa Nzĩa Yĩva Nthembo ya Yesũ Nĩ “Wovosyo Kwondũ wa Aingĩ”?

THAŨKA

Ũndũ Mbivilia ĩsũngĩĩte

Ngai atũmĩaa nthembo ya Yesũ kwovosya andũ kuma ũkombonĩ wa naĩ na kĩkwʼũ. Mbivilia ĩwetaa nthakame ya Yesũ ĩla yetĩkiwʼe ta yo ndĩvi ya wovosyo. (Aeveso 1:7; 1 Vetelo 1:18, 19) Nĩkyo kĩtumi Yesũ waisye kana ookie “kũnengane thayũ wake wĩthĩwe wovosyo kwondũ wa aingĩ.”—Mathayo 20:28.

Nĩkĩ vaĩ vata wa “wovosyo kwondũ wa aingĩ?”

Mũndũ wa mbee, Atamu, oombĩtwe e mwĩanĩu, kana ate na naĩ. Aĩ ekale tene na tene ĩndĩ aasya wĩkwatyo ũsu ĩla watwie kũlea kũmwĩwʼa Ngai. (Mwambĩlĩlyo 3:17-19) Ĩla weekie syana, aitiĩie naĩ. (Alomi 5:12) Nũndũ wa ũu, Mbivilia yaasya kana Atamu ‘eethooisye’ we mwene na syana syake ũkombonĩ wa naĩ na kĩkwʼũ. (Alomi 7:14) Na nĩkwĩthĩwa mayaĩ eanĩu, vaiĩ ũmwe woo waĩ atonya kũtũngĩĩa kĩla Atamu waaĩtye.—Savuli 49:7, 8.

Ngai nĩweewʼĩie nzyawa sya Atamu tei nũndũ iyaĩ na wĩkwatyo. (Yoana 3:16) Ĩndĩ nũndũ Ngai asilaa katĩ, ndaĩ atonya kũekea naĩ syoo vate mũsingi wa kwĩka ũu. (Savuli 89:14; Alomi 3:23-26) Nĩkwĩthĩwa Ngai nĩwendete andũ, nĩwaumĩlilye nzĩa yĩthĩwe mũsingi wa kũekea andũ naĩ na kwĩsĩla nzĩa ĩsu aivetanga naĩ vyũ. (Alomi 5:6-8) Nthembo ya wovosyo nĩyo nzĩa ĩsu.

Wovosyo ũthũkũmaa ata?

Nthĩnĩ wa Mbivilia, ndeto “wovosyo” ĩtũmĩawa kwonanyʼa maũndũ aa atatũ:

Ndĩvi.—Motalo 3:46, 47.
Kũthasya kana kwovosya.—Kuma 21:30.
Kĩndũ kĩanene na kĩla kĩkũĩvĩwa, kana kĩndũ kya kũkĩkunĩka. a

Ekai twone ũndũ nthembo ya Yesũ Klĩsto yĩanĩasya maũndũ asu atatũ.

Ndĩvi. Mbivilia yaasya kana Aklĩsto ‘mathooetwe na thooa mũnene.’ (1 Akolintho 6:20; 7:23) Thooa ũsu nĩ nthakame ya Yesũ ĩla watũmĩie ‘kũmũthooea Ngai andũ ma kĩla mbaĩ, na kĩthyomo, na ũko, na mĩthemba.’—Ũvuanʼyo 5:8, 9.
Kũthasya. Nthembo ya Yesũ nĩtumaa tũthawʼa kuma naĩnĩ.—1 Akolintho 1:30; Akolosai 1:14; Aevelania 9:15.
Kĩndũ kĩanene na kĩla kĩkũĩvĩwa. Nthembo ya Yesũ nĩyĩanene na kĩla Atamu waaisye, nakyo nĩ thayũ mwĩanĩu wa mũndũ. (1 Akolintho 15:21, 22, 45, 46) Mbivilia yaĩtye atĩĩ: “Nũndũ wa kũlea kwĩwʼa kwa mũndũ ũmwe [Atamu] aingĩ matwiwe athe, o ta ũu kwondũ wa kwĩwʼa kwa ũmwe [Yesũ Klĩsto], aingĩ makatuwa alũngalu.” (Alomi 5:19) Ũu nĩwonanĩtye nesa ũndũ kĩkwʼũ kya mũndũ ũmwe kĩtonya kwovosya andũ aingĩ. Kwoou, nthembo ya Yesũ nĩ “mbovosya ya andũ onthe” ala mosaa matambya ala maĩlĩte nĩ kana ĩmatethye. Ndeto ya Kĩkiliki ĩla ĩalyũlĩtwe “mbovosya” yonanasya “wovosyo wĩanene na kĩla kyaaiwʼe.”—1 Timotheo 2:5, 6.

a Mbivilianĩ, ndeto ya tene ĩla ĩalyũlĩtwe “wovosyo” yonanasya thooa, kana kĩndũ kĩla kĩĩvawa. Kwa ngelekanyʼo, ndeto ya Kĩevelania ka·pharʹ, yonanasya kũkunĩka, na mavinda maingĩ yonanasya kũkunĩka naĩ. (Savuli 65:3) Ndeto ĩngĩ ĩthengeanĩe na ĩsu nĩ koʹpher, nayo yonanasya kĩla kĩĩvawa nĩ kana naĩ ĩkunĩkwe kana mũndũ ovowʼe. (Kuma 21:30) O ta ũu, ndeto ya Kĩkiliki, lyʹtron, ĩla kaingĩ ĩalyũlawa “wovosyo,” no ĩalyũlwe “thooa wa kwovosya.” (Mathayo 20:28; The New Testament in Modern Speech, by R. F. Weymouth) Aandĩki ma tene ma Kĩkiliki matũmĩaa ndeto ĩsu kwonanyʼa ndĩvi ĩla yaumawʼa kwovosya mũndũ atavwa ĩvinda ya kaũ kana kwovosya ngombo.