Mbivilia ndĩwetete ĩmwe kwa ĩmwe ĩũlũ wa kũsisya kana kũsoma maũndũ makonetye ngomanyʼo, kũtũmanĩa mesengyi ikonetye maũndũ ma ngomanyʼo nthĩnĩ wa indaneti, kana maũndũ angĩ ma mũthemba ũsu. Ĩndĩ o na ũu wĩ o vo, Mbivilia nĩyonanĩtye ũtheinĩ ũndũ Ngai wĩwʼaa ĩũlũ wa meko ala matonya kũtuma andũ mathi nza wa mũtwaano, kana methĩwa na woni ũtaĩle ĩũlũ wa ngomanyʼo. Kwoona ũndũ mĩsoa ĩno ya Mbivilia yaĩtye:

•   “Ũaai mamutha menyu ala me kũũ nthĩ: ũlaalai, na ũvuku, na mĩmeo mĩthũku.” (Akolosai 3:5) Vandũ va kũaa mĩmeo mĩthũku, kũsisya kana kũsoma maũndũ makonetye ngomanyʼo kũkĩlasya mĩmeo ĩsu. Kwĩka ũu kũtumaa mũndũ ethĩwa e mũvuku methonĩ ma Ngai.

•   “Kĩla mũndũ ũsyaasya mũndũ mũka na kũmwĩwʼĩa mũmeo nĩweka ũlaalai nake ngoonĩ yake.” (Mathayo 5:28) Kũsisya mavisa makonetye ũlaalai kũtumaa mũndũ ethĩwa na mesilya mathũku ala matonya kũtuma eka maũndũ mataĩle.

•   “Ĩndĩ ũlaalai, na ũvuku wʼonthe, na wendi, maikawetwe katĩ wenyu.” (Aeveso 5:3) Tũyaĩle kũwetanga ĩũlũ wa ngomanyʼo, kũsisya, kana kũsoma ĩũlũ wasyo nĩ kana twĩtanĩthye.

•   “Mawĩa ma mwĩĩ nĩ moneku, na nĩmo aa: ũlaalai, ũvuku, . . . na maũndũ angĩ mailyĩ ta asu; kũla kwĩ maũndũ asu nĩmũtaa mbee, o ũndũ namũtaie, kana ala mekaa maũndũ ta asu maikatiĩwa ũsumbĩ wa Ngai.” (Akalatia 5:​19-​21) Andũ ala masiasya kana kũsoma maũndũ makonetye ngomanyʼo, ala matũmanĩaa mesengyi kana kũneenanyʼa ĩũlũ wa maũndũ makonetye ngomanyʼo indanetinĩ, ala matũmĩaa simũ kũneenea kana kwĩthukĩĩsya maũndũ mataĩle ĩũlũ wa ngomanyʼo, na ala matũmanĩaa mesengyi kana mavisa makonetye ngomanyʼo simũnĩ, Ngai amonaa me avuku. Kwĩka maũndũ asu nĩũtuma twananga vyũ ngwatanĩo yitũ na Ngai.