Yehowa Sakse ni gaw Karai Kasang hte masha shada da hpe tsawra ai. Dai majaw, moi aten hta “myit n lawm ai” nga nna tsun ai ni hte hpawn masha yawng hpe Chyum Laika shiga tsun dan ai. (Mahte 22:37-39) Karai Kasang hpe tsawra ai myit gaw, ahkri ahkrai “sakse hkam” mu ngu ai Yesu a ga hpe madat na matu shadut ya ai. (Kasa 10:42; 1 Yawhan 5:3) Dai majaw, moi na Karai a myihtoi ni zawn sha, Karai a shiga hpe kalang hta n-ga sa tsun ai re. (Yeremia 25:4) Masha shada da hpe anhte tsawra ai majaw, masha yawng hpe asak hkye shiga re ai “Mungdan a kabu gara shiga” sa tsun dan ai. Shawng nnan lang hta myit n lawm ai masha ni hpang de mung bai sa tsun dan ai..​—Mahte 24:14.

 Moi aten hta myit n lawm tim, hpang kalang bai sa ai shaloi myit lawm wa ai masha ni hte, anhte chyahkring hkring hkrum ga ai. Hpa majaw nga yang:

•   Moi na masha ni htawt mat ai.

•   Kaga nta masha gaw anhte a shiga hpe myit lawm ai.

•   Masha a myit jasat galai shai wa ai. Mungkan a mabyin ni shing nrai prat masa ni galai shai wa ai majaw, tinang a “wenyi hta matsan mayan rai nga ai” hpe masha nkau mi chye na wa ai. Dai majaw, Chyum Laika shiga hpe myit lawm wa ai. (Mahte 5:3) Moi aten hta ning hkap wa tim, kasa Pawlu zawn myit galai shai wa chye ai.​—1 Timohti 1:13.

 Yehowa Sakse ni gaw kadai hpe mung atik anang n shadut ai. (1 Petru 3:15) Masha shagu gaw nawku dau jau ai hte seng nna, tinang nan dawdan na ahkang nga ai hpe anhte hkap la ai.​—Tara Jahprang 30:19, 20.