Mungkan ting na hpunau nauna ni gaw shawng nnan lang hku nna, ginwang zuphpawng lamang hpe 2020 July hte August shata hta kalang ta arau yu na re. Dai hku yu lu na matu, lamang hpe amyu ga 500 jan hte ga gale nna nsen bang ra ai. Teng sha nga yang, dai bungli ngut na matu laning mi (sh) laning mi jan aten la ra ai. Raitim, Korona ana tsin-yam a majaw masa lam ni galai shai mat nna, “Tut Nawng E Kabu Gara Nga Mu”! 2020 Ginwang Zuphpawng hpe shata mali laman ga gale ra wa ai.

Yehowa Sakse ni a ginjaw rung hta nga ai Ga Gale Magam Dap hte Rai Mari Dap gaw ndai lamang hpe karum ya wa ai. Kaja ai maik (microphone) zawn re ai jak rai ni ra ai hpe Ga Gale Magam Dap gaw chye ai. Dai majaw rai mari dap gaw maik 1,000 mari nna ginra 200 de sa ya na matu lajang wa ai.

Manu hkyem sa na matu, maik ni hpe kalang ta law law mari la ai. Dai hpang sanghpaw li hte madung shara sa ya ai. Dai shara kaw nan, mungkan a shara shagu de bai sa ya ai. Dai zawn kalang ta law law mari la ai majaw, maik langai gaw dola 170 hkrat ai. Dai gaw langai hpra mari lang ai hta na, tsa lam shadang 20 hkyem sa ai re.

Rai Mari Dap gaw, mari la nna sanghpaw hte sa ai hpe 2020 April hte May shata laman hta galaw wa ai. Dai aten gaw ana tsin-yam a majaw hpaga bungli law malawng jahkring da ai aten rai taw ai. Raitim, May shata htum ai shaloi, ga gale rung, ginjaw garan rung hte kaga ga gale ai shara law malawng hta ra nga ai arai ni hpe lu nga sai.

“Ndai lamang hpe galaw nga ai shaloi, Behtela ni hte shinggan na rai sa ai ni gaw atsawm sha matut mahkai na jawm galaw wa ai. Wenyi lam hte seng nna ra kadawn ai lam ni hpe madi shadaw ai hta alawan hte gumhpraw shama da ai ni a matu akyu rawng hkra lu galaw na matu Yehowa sha karum ya lu ai” ngu, rai mari dap hpe woi awn ai hpunau Je Swini tsun ai.

Ga Gale Magam Dap hta magam gun nga ai Nikolat Aladit gaw ndai hku tsun ai: “Pru shang pat da ai aten hta ndai arai ni hpe lu la ai majaw ga gale ai ni grai n-gun lu wa ai. Ga gale ai ni gaw, langai hte langai nga ai shara n bung tim, mungga ni, sumla hkrung ni, mahkawn ni hpe amyu ga 500 jan hte ga gale nsen bang na matu jawm galaw lu wa ai.”

Mungkan ting na hpunau nauna ni a matu “Tut Nawng E Kabu Gara Nga Mu”! 2020 Ginwang Zuphpawng hpe galaw lu na matu shakut wa ai lam law law hta ndai lamang mung lawm ai. donate.jw.org hte kaga lam ni hku nna hpunau nauna ni sharawng awng let alu bang wa ai majaw, ya na zawn ra nga ai arai ni hpe mari la lu wa ai re.