Chyum Laika hpe myit lawm let hti nna, akyu lu la hkra gara hku galaw lu na kun? Masha law malawng a matu akyu lu la wa ai hpaji jaw ga 5 hpe yu yu ga.

Htap htuk ai grup-yin hpe lata u. Azim sha re ai shara hpe tam u. Dingbai dingna n nga yang she, hti ai lam hpe myit maju jung lu na re. Nhtoi hte nbung kaja atsawm lu ai shara re yang hti ai grau manu na re.

Jaw ai myit jasat nga u. Chyum Laika gaw sumsing Kawa kaw na re ai majaw, kanu kawa ni kaw nna sharin la na matu, jin jin re nga ai ma langai a myit jasat zawn, nang kaw nga yang akyu law law lu la na re. N kaja ai myit jasat ni, Chyum Laika hte seng nna, shawng de tinang hkap la da ai lam ni jung taw ai nga yang, dai ni hpe yen kau u. Rai yang she, Karai Kasang sharin achyin ya lu na re.​—Shakawn 25:4.

Garai n hti shi yang akyu hpyi u. Chyum Laika hta Karai Kasang a myit mang ai lam ni lawm ai. Dai majaw, dai lam ni hpe chye na na matu, shi a karum shingtau lam ra ai. Karai Kasang gaw ‘hpyi ai ni hpe chyoi pra ai Wenyi jaw na’ ngu nna ga sadi jaw da ai. (Luka 11:13) Chyoi pra ai wenyi gaw Karai Kasang a sumru ai lam hpe chye na na matu karum ya lu ai. Dai hpang “Karai Kasang a sung htum ai” lam ni hpe chye na na matu, na a myit hpe hpaw ya na re.​—1 Korinhtu 2:10.

Chye na hkra hti u. Ngut na matu daram sha hti ai baw hkum galaw. Hti ai lam ni hpe atsawm myit yu u. Tinang hkum tinang ndai hku san yu u: ‘Ngai hti taw nga ai kaw lawm ai wa hta, gara atsam ningja ni nga ai kun? Dai hpe nye prat hta gara hku tatut hkan sa mai ai kun?’

Tup hkrak re ai bandung ni tawn u. Tinang a asak aprat a matu, akyu lu la shangun ai lam ni hpe sharin la na ngu ai bandung tawn nna, Chyum Laika hti na nga yang, akyu grai law hkra lu la na re. ‘Karai Kasang a lam grau chye hkra galaw na,’ ‘kaja ai madu wa, kaja ai madu jan byin hkra galaw na’ ‘grau kaja ai masha byin hkra galaw na’ ngu ai bandung ni hpe tawn mai ai. Ngut nna dai bandung ni hpring hkra karum ya lu ai Chyum Laika lam ni hpe lata nna hti na. *

Dai hpaji jaw ga 5 gaw nang hpe Chyum Laika hti hpang lu na matu karum ya lu na re. Raitim, Chyum Laika hti ai hpe grau nna myit lawm wa hkra hpa ni naw galaw mai ai kun? Dai lam hpe hpang na sumhpa hta madun da ai.