Ngai ma prat aten hta anhte a kun dinghku gaw, Sinpraw Jamani, Laizit mare makau hta nga wa ai. Dai mare gaw, Chyet (Czech) hte Polan mung ni a htingbu mungdan ni hte nau n tsan ai. Ngai asak 6 ning daram hta awa a bungli a majaw Barazi mungdan, bai nna Ikwedaw mungdan ni de dinghku nawng htawt nga ra ai.

Ngai asak 14 ning du ai shaloi, Jamani mung de bai wa nna, bawda jawng lung ai. Nu yan wa gaw, Dingda Amerika kaw nga ai majaw, nye hkum ngai bau maka wa ra ai. Dai hku nna, wang lu wang lang nga lu ai hpe ra sharawng wa ai. Tinang galaw dat ai majaw, kaga ni hkra machyi mat na hpe ngai kalang mi mung n myit yu ga ai.

Ngai asak 17 ning hta nu yan wa gaw, Jamani de bai du wa ai. Nnan hta gaw shanhte hte arau nga ai. Raitim, wang lu wang lang sha nga mayu ai majaw, nu yan wa a hkang ai npu hta n lu nga sai. Dai majaw, asak 18 ning hta nta kaw na pru wa ai.

Hpa galaw ra na hpe n chye tim, prat a yaw shada lam hpe tam wa ai. Prat hkrun lam amyu myu, uhpung amyu myu hpe tam sagawn wa ai. Hpang gaw shinggyim masha ni a majaw, ndai mungkan ga n htenza shi yang, mungkan a tsawm htap lam ni hpe yu hkamsha na matu dawdan dat ai.

Jamani mung kaw na Ahprika de sengke hte bu hkawm hpang ai. Nau n na yang, sengke gram na matu Urawpa dan de bai kayin wa ra ai. Hpang gaw, Paw-tugi mung na panglai hkin gau langai de du mat ai. Sengke hpe tawn da nna, sanghpaw hte sha bu hkawm sana ngu dawdan kau ai.

Atalantik nammukdara hta li yawng na matu hkyen nga ai ramma hpung langai hte sa hkrum ai. Hpang hta nye madu jan byin wa ai Lawri gaw, shanhte hta lawm ai. Shawng nna, Karibiyan zunlawng de li yawng nna, Pwaturiko zunlawng hta hkring ai. Dai hpang, Urawpa dan de bai wa ai. Matut bu hkawm na matu li langai hpe ngai hte Lawri hkan tam ai. Masha mung mai nga ai baw li tam ai. Hkan tam ai shata masum daram hta, Jamani kaw hpyen magam gun na matu shaga hkrum ai majaw, anhte lajang da ai lam ni hten mat ai.

Jamani hka dap kaw shata 15 daram amu gun wa ra ai. Dai laman hta Lawri hte hkungran la nna, matut bu hkawm na matu lajang ai. Hpyen magam garai n gun shi yang, ram daw re ai li langai hpe mari la lu wa ai. Ngai hpyen magam gun taw ai aten hta, dai li hpe bu hkawm mai ai li langai hku na gau ngwi ngwi galaw la ai. Anhte a yaw shada lam gaw li jawn nna shing-ra tara hpe kawan yu na matu re. Hpyen dap kaw na pru wa ai hpang, li hpe yawng n lajang ngut shi yang, Yehowa Sakse ni hte Chyum Laika hkaja hpang wa ai.

Shawng nnan hta gaw, nye a prat hta galai shai ra ai lam ni grai law hkra nga na ngu n shadu da ai. Ngai hte Lawri gaw tara shang hkungran da ai. Hkayawm mung moi kaw na dawn da ngut sai. (Ehpesu 5:5) Bu hkawm na matu lajang da ai lam mung, Karai a hpan da lam ni hpe sawk sagawn ai re ai majaw, gaja wa akyu nga ai bungli re ngu na mu mada da ai.

Raitim, ngai galai shai ra ai lam ni naw nga ai. Laksan hku na, nye a arawn alai ni hpe re. Ngai gaw grai gumrawng nna, wang lu wang lang nga mayu ai myit nga ai. Nye a atsam hte awng dang lam ni hpe sha, myit maju jung ai. Prat hta tinang a matu sha yu wa ai.

Lani mi hta, Yesu a Bum Ntsa Na Mungga a lam hti hkrup ai. (Mahte daw kaba 5-7) Nnan hta gaw ngwi pyaw ai lam hte seng ai Yesu tsun ai ga hpe atsawm n chye na wa ai. Kawsi hpang gara ai ni gaw, a lu ma ai ngu ai lam ni hpe re. (Mahte 5:6) Hpang gara nga ai she nga yang me, gara hku pyaw lu na ngu na ngai myit hkrup ai. Chyum Laika matut hkaja ai shaloi, dai gaw Karai Kasang hpe kamhpa ai myit hpe tsun mayu ai lam, dai hku byin na matu tinang maga hku na shagrit shanem myit ra ai ngu ai hpe chye na wa ai. “Wenyi hta matsan mayan rai nga ai ni gaw, a lu ma ai” ngu Yesu tsun wa ai zawn re.​—Mahte 5:3.

Jamani hta Chyum Laika hkaja ngut ai hpang, ngai hte Lawri gaw Pyintit mung, dai hpang Itali mung de htawt nga ai. Htawt nga ai shara shagu hta Yehowa Sakse ni hte hkrum ai. Shanhte shada da tsawra ai myit hte kahkyin gumdin ai lam gaw ngai hpe myit hkra shangun ai. Sakse Hkam ni gaw, jet ai mungkan grup hpunau nauna ni re. (Yawhan 13:34, 35) Hpang gaw, Lawri hte ngai gaw Yehowa Sakse ni hku nna hkalup hkam la ai.

Hkalup hkam ngut ai hpang hta mung, nye a arawn alai ni hpe naw galai shai ra ding yang re. An gaw Ahprika de li yawng wa ai. Dai hpang, Atalantik nammukdara hpe rap nna, Amerikan mung de li yawng ai. Sanghpaw langai hte sha dam lada la ai panglai hta, an lahkawng sha nga nga yang, grau htum ai Hpan Madu hte shing daw dat ai shaloi, an gaw hpa n re ai hpe myit hkrup ai. Panglai hta galaw na hpa n nga ai majaw, aten law law jaw nna Chyum Laika hti byin ai. Dai hku hti ai shaloi, laksan hku na Yesu a mungkan ga na prat hkrun lam gaw, ngai hpe myit hkra mat shangun ai. Yesu kaw ngai hta grau ai atsam marai ni grai nga tim, kaga ni shi hpe myit maju jung wa hkra, shi n galaw wa ai. Shi a prat gaw, shi a matu n re ai sha, Sumsing Kawa a matu sha rai wa ai.

Yesu a lam myit sawn sumru ngut ai hpang, prat hta ngai galaw mayu ai lam ni htan, Karai a Mungdan hpe shawng tawn ra ai lam chye wa ai. (Mahte 6:33) Hpang jahtum, Amerikan de an du mat ai shaloi, dai kaw sha shanu nga nna, Karai a magam hpe maju jung galaw sana ngu dawdan kau ai.

Prat hta nye hkum ngai kamhpa wa ai shaloi, kalang lang tinang a dawdan lam ni gaw, jaw n jaw hpe nau n chye ai. Ya chyawm gaw, n shut chye ai nyan hpaji a npawt hpe ngai tam mu sai. (Esaia 48:17, 18) Ya nga yang, kalang mi mung n lu ga ai lachyum nga ai prat hpe lu la nga sai. Karai hpe nawku lu ai ahkang lu ai sha n-ga, kaga ni hpe mung shi a lam sharin ya lu ai ahkang lu nga sai.

Chyum Laika npawt tara ni hpe hkan sa ai majaw, an a dinghku mung grau grau ngangkang wa ai. Dai sha n-ga, Yehowa Karai Kasang hpe chye nna tsawra ai, kaw lakai re ai shayi sha mung lu da ai.

Prat hta grai yakhkak ai lam ni hpe tawt lai ra wa ai aten ni mung nga ai. Raitim, Yehowa a karum shingtau lam hte shi hpe galoi mung nawku dawjau lu na matu, galoi mung kamhpa mat wa na matu dawdan da ai.​—Ga Shagawp 3:​5, 6.