“Si ging ai mara a majaw si mat ai wa a wenyi gaw, ngarai de kalang ta du mat nna ‘htani htana wan’ ngarai hta ari jaw hkrum ai.” (Catechism of the Catholic Church) Ngarai hta ari jaw hkrum ai ni gaw Karai Kasang hte tsep kawp tsan gang mat ai ngu nna, makam masham ningbaw nkau sharin achyin ya ma ai.

“Yubak galaw ai myit masin gaw, si na ra ai.” (Ezekela 18:4) “Si mat ai ni chyawm gaw hpa n chye ma ai.” (Hpaji 9:5) Si mat ai wa gaw hpa hpe mung n chye ai nga yang, gara hku nna “htani htana wan” ngarai hta ari jaw hkrum na kun? Karai Kasang hte tsan gang mat ai hpe gara hku chye lu na kun?

Chyum Laika hta “ngarai” ngu ga gale da ai Hebre ga hte Grik ga gaw, yu maya lup hpe tsun mayu ai re. Ga shadawn, Karai Kasang hpe sadi dung ai Yoba gaw, grai sawng ai ana hkrum sha nga ai aten hta, “nang ngai hpe katsan ga [ngarai] e makoi da e” nga nna akyu hpyi wa ai. (Yoba 14:13) Yoba gaw ari jaw hkrum ai shara (sh) Karai Kasang hte tsan gang ai shara hta n re ai sha, lup hta hkring sa la mayu ai re.

Karai Kasang gaw zingri zingrat chye ai wa re nga nna masha ni shadu ai shaloi, shi hpe tsawra na malai nju ndawng wa ma ai. Meksiko mung na Rosiaw ndai hku tsun ai: “Ngai kaji nga ai aten kaw nna ngarai hte seng ai lam sharin achyin hkrum wa ai. Karai Kasang hpe nau hkrit nna, shi hta hpa atsam ningja mung nga na n re ngu shadu wa ai. Galoi shagu masin pawt taw ai wa ngu nna ngai mu wa ai.”

Karai Kasang a tara dawdan ai lam ni, si mat ai ni a masa hte seng nna Chyum Laika hta asan sha tsun dan da ai hpe, Rosiaw chye wa ai shaloi, Karai Kasang ntsa shi a mu mada lam galai shai mat ai. “Nye a myit kaw nna Karai Kasang hte seng ai lit kaba, ya she hkrat mat ai. Karai Kasang gaw masha ni a matu kaja htum byin shangun mayu ai, anhte hpe tsawra ai, anhte mung shi hpe tsawra mai ai lam ngai kam wa ai. Karai Kasang gaw tinang a ma hpe lata gindun nna shaga mat ai, ma a matu kaja htum byin shangun mayu ai Kawa langai hte bung ai.”—Esaia 41:13.

Masha law law gaw ngarai hkrat na hpe hkrit nna wenyi lam galaw ma ai. Raitim, Karai Kasang gaw shi hpe hkrit nna nawku ai hpe n ra sharawng ai. Dai majaw, Yesu gaw “Na a Karai Kasang hpe, . . . nang tsaw ra lu na ndai” ngu tsun wa ai. (Marku 12:29, 30) Dai ni aten hta, Karai Kasang gaw n tara ai lam ni hpe n galaw ai lam, anhte chye da na nga yang, htawm hpang hta mung shi a tara jeyang ai lam ni gaw, tara rap ra na re ai hpe kam lu na re. “Tara tawt lai ai gaw Karai Wa hte, shut hpyit ai gaw chyahtum chyalai n-gun rawng ai wa hte, tsan nga u ga” ngu nna Yoba a manang Elihu tsun ai zawn, anhte mung teng sha lu tsun na re.—Yoba 34:12.