1. Anhte hpe gara myit mada lam Yehowa jaw da ai kun?

 GRAI kaja ai htani htana myit mada lam hpe Yehowa jaw da ai. Nkau gaw, sumsing lamu hta, n si lu ai wenyi hkum ni hku nna htani htana asak hkrung na matu, law malawng gaw ginding aga hta, ngwi pyaw hkamja let, htani htana asak hkrung na matu myit mada nga ai. (1 Ko 15:50, 53, Shr 21:3, 4) Sumsing lamu kaw raitim, ginding aga kaw raitim, anhte a matu, htani htana asak myit mada lam gaw grai manu dan ai myit mada lam re.

2. Anhte a myit mada lam gaw gara kaw madung tawn ai kun? Hpa majaw dai hku lu tsun ai kun?

² Chyum Laika hta lang da ai “myit mada ai lam” ngu ai ga si hpe “kaja ai lam ni byin wa sana myit mada lam” ngu lachyum hpaw mai ai. Yehowa kaw na sa ai majaw, anhte a htawm hpang myit mada lam gaw teng sha byin wa na re. (Rom 15:13) Karai Kasang hpa ga sadi ni jaw da ai lam, dai ga sadi ni hpe hpring tsup hkra galaw ya ai lam anhte chye da ai. (Bhk 23:19) Yehowa gaw ga sadi yawng hpe hpring tsup hkra galaw ya mayu ai myit nga ai sha n-ga, atsam mung nga ai. Dai majaw, anhte a myit mada lam gaw, shingran yup mang daram sha n re. Madi madun lam ni, gaja wa nga ai lam ni ntsa madung tawn ai.

3. Ndai sumhpa hta hpa lam bawngban na kun? (Shakawn 27:14)

³ Sumsing Kawa gaw anhte hpe tsawra ai. Shi hpe kamhpa shangun mayu ai. (Shakawn 27:14 hpe hti u.) Yehowa hpe tsep kawp kam yang, mayak mahkak ni hpe hkam jan lu na re. Htawm hpang hpe ngwi pyaw let nden marai hte tawt lai lu na re. Myit mada lam gaw gara hku makawp maga ya ai hpe bawngban yu ga. Shawng nnan, myit mada lam gaw hpri chyinghkyi, hpri gup chyawp hte gara hku bung ai lam bawngban na re. Anhte a myit mada lam gara hku ngang kang lu ai hpe mung bawngban na re.

4. Myit mada lam gaw hpri chyinghkyi hte gara hku bung ai kun? (Hebre 6:19)

⁴ Hebre Hkristan ni hpang de kasa Pawlu ka ai laika hta myit mada lam hpe hpri chyinghkyi hte shingdaw da ai. (Hebre 6:19 hpe hti u.) Pawlu gaw, panglai hta chyahkring hkring hkawm ga ai wa re ai majaw, sanghpaw n yawng mat hkra chyinghkyi jahkrat ra ai hpe chye ai. Kalang mi hta, laja lana re ai nbung laru hte hkrum ai. Nbung laru ru nga ai laman, lung rawk ni hte n adawt hkra, sanghpaw hpe makawp maga na matu, sanghpaw la ni hpri chyinghkyi jahkrat ma ai hpe Pawlu mu ai. (Kas 27:29, 39-41) Sanghpaw hpe shangang ya ai hpri chyinghkyi zawn, myit mada lam mung, anhte manghkang hkrum ai aten hta, Yehowa hte gau ngwi ngwi n tsan mat hkra makawp maga ya ai. Ngang kang ai myit mada lam gaw, nbung laru ngut yang, bungshi sa na ngu ai hpe chye shangun ai majaw, mayak mahkak ni hpe simsa let tawt lai lu hkra karum ya ai. Anhte zingri hkrum na ngu Yesu sadi jaw wa ai hpe hkum malap. (Yhn 15:20) Dai majaw, Yehowa ga sadi jaw da ai htawm hpang lam hpe myit sawn sumru ai gaw, Shi hpe matut nawku lu hkra karum ya ai.

5. Si hkrung si htan hte hkrum ra ai aten hta, myit mada lam gaw Yesu hpe gara hku n-gun lu shangun ai kun?

⁵ N ni n kri hkrum let si ra sana hpe chye tim, matut sadi dung na matu Yesu hpe myit mada lam gaw gara hku karum ya ai hpe myit yu ga. Yesu kade daram myit simsa nga na hpe tsun na matu, A. D. 33, Pentikoti poi shani hta, Shakawn Kungdawn Laika a myihtoi ga langai hpe Petru ndai hku lakap da ai: “Nye a hkum shan mung myit mada ai kaw rai na ra ai; . . . nang nye a myit masin hpe katsan ga e kau da ya na n rai; Na a chyoi pra ai wa hten byak hkrum na, nang hkraw na n rai. . . . Na a myi man hte nang ngai hpe kabu gara ai hte jahpring ya na rin dai, nga ai.” (Kas 2:25-28; Shk 16:8-11) Si ra sana ngu ai hpe chye tim, Karai Kasang bai hkrung rawt ya na, sumsing lamu hta Karai Kasang hte bai hkrum tsup lu na ngu ai ngang kang ai myit mada lam Yesu hta nga ai.​—Heb 12:2, 3.

6. Myit mada lam hte seng nna hpunau langai hpa tsun ai kun?

⁶ Hkristan myit mada lam gaw, hpunau nauna law law hpe hkam jan lu shangun ai. Ingalan mung na sadi dung ai hpunau Lenat Chin a lam hpe myit yu u. Nambat 1 Mungkan Majan laman, hpyen magam n gun ai majaw, htawng jahkrat hkrum ai. Shata 2 gawk kaw pat da hkrum ngut ai hpang, laja lana bungli galaw ra ai. “Hkam jan lu ai atsam nga shangun ai myit mada lam gaw grai manu dan ai hpe, nye a mabyin kaw na chye wa ai. Yesu, kasa ni, myihtoi ni a kasi ningli ni, Chyum Laika hta lawm ai manu dan ai ga sadi ni lu da ai. Dai lam ni yawng gaw, htawm hpang myit mada lam hte hkam jan lu ai atsam nga shangun ai” ngu shi tsun ai. Lenat a matu, myit mada lam gaw, hpri chyinghkyi zawn byin wa ai zawn, anhte a matu mung byin wa lu ai.

7. Mayak mahkak ni gaw, myit mada lam hpe gara hku shangang shakang ya ai kun? (Roma 5:3-5; Yaku 1:12)

⁷ Mayak mahkak ni hpe hkam jan lu ai, Yehowa a karum shingtau lam hte myiman lu nga ai hpe chye wa ai shaloi anhte a myit mada lam grau ngang kang wa ai. (Roma 5:3-5; Yaku 1:12 hpe hti u.) Dai hku nna, kabu gara shiga hpe shawng nnan hkap la ai aten hta na, myit mada lam grau ngang kang wa ai. Mayak mahkak ni hta lup mat hkra, Satan byin shangun mayu tim, Yehowa a karum shingtau lam hte anhte hkam jan lu ai.

8. Myit mada lam gaw, hpri gup chyawp hte gara hku bung ai kun? (1 Htesaloni 5:8)

⁸ Chyum Laika hta, myit mada lam hpe hpri  gup chyawp hte shingdaw da ai. (1 Htesaloni 5:8 hpe hti u.) Hpyen la ni gaw, hpyen ni a majaw baw hpe n hkra hkra, makawp maga na matu, hpri gup chyawp chyawp ma ai. Satan hte gasat ai majan hta mung, anhte a myit mang lam hpe makawp maga ra ai. Myit mang lam hpe htenza shangun ai chyam dinglik ai lam amyu myu, ladat amyu myu hpe Satan lang nga ai. Hpri gup chyawp gaw, hpyen la a baw hpe makawp maga ya ai zawn, myit mada lam mung Yehowa hpe matut sadi dung lu hkra myit mang lam hpe makawp maga ya ai.

9. Masha ni myit mada lam n nga ai majaw hpa byin nga ai kun?

⁹ Htani htana asak myit mada lam gaw, hpaji rawng let, ginhka chye ai atsam hte galaw lu na matu karum ya na re. Raitim, myit mada lam yawm wa sai, ra marin ai myit ni hpe sha myit wa sai nga yang, htani htana asak bandung hpe malap kau ai baw byin chye ai. Korinhtu mare na Hkristan nkau mi a lam hpe myit yu ga. Grai ahkyak ai Karai a ga sadi re ai hkrung rawt ai myit mada lam hpe n kam mat sai. (1 Ko 15:12) Hkrung rawt ai myit mada lam n nga ai ni gaw, ya aten a matu sha asak hkrung nga ai ngu Pawlu tsun ai. (1 Ko 15:32) Karai a ga sadi ni hpe n myit mada ai dai ni aten na masha law law gaw, ya aten pyaw pyaw nga na matu sha myit lawm ma ai. Anhte gaw, Karai jaw ai htawm hpang hpe kam ai. Dai gaw hpri gup chyawp zawn, anhte a myit mada lam hpe makawp maga ya ai. Tinang a matu sha myit nna, Yehowa hte hku hkau lam htenza shangun ai prat hkrun lam hpe koi na matu mung karum ya ai.​—1 Ko 15:33, 34.

10. Myit mada lam gaw, shut shai ai myit mang lam ni n shang wa hkra gara hku makawp maga ya ai kun?

¹⁰ Yehowa ra sharawng ai lam lu na matu shakut tim, hpa mung laklai wa na n re ngu ai myit ni n shang wa hkra mung, myit mada lam gaw makawp maga ya ai. Ga shadawn, ‘htani htana asak lu na ni hta ngai galoi mung lawm na n re. Ngai dai daram n myitsu ai. Karai a tsang madang ni hpe galoi mung hkan sa lu na n re’ ngu nkau myit hkrup chye ai. Yoba a hpyi hpun ai manang Elihpa gaw, dai zawn tsun wa ai hpe sadi yu u. “Shinggyim masha gaw hpa wa rai nga nna, chyoi pra lu a ni?” “Shi gaw shi a chyoi pra ai ni hpe pyi n kam nna, sumsing lamu mung, shi a man e san seng nga ai, n rai” ngu Elihpa tsun ai. (Yob 15:14, 15) Masu ai lam re. Dai zawn myit mang ai lam a shingdu hta Satan nga ai hpe dum u. Nang dai zawn myit wa yang, myit mada lam yawm wa na hpe Satan chye ai. Dai majaw, dai zawn masu magaw ga ni hpe nyet kau u. Yehowa a ga sadi ni hpe myit maju jung u. Nang hpe Karai Kasang htani htana asak hkrung shangun mayu ai lam, dai hku byin lu hkra mung karum ya na lam hpe ntsen ai myit n nga ging ai.​—1 Tm 2:3, 4.

11. Myit mada lam hpring tsup na aten hpe la nga let myit galu na matu hpa majaw ra ai kun?

¹¹ Myit mada lam ngang kang na matu ayan n loi ai. Karai Kasang hpe la let myit n galu ai baw byin wa chye ai. Raitim, Yehowa gaw htani htana grin ai majaw, aten hpe Shi mu mada ai lam gaw anhte hte bung na n re. (2 Pe 3:8, 9) Tinang a yaw shada lam hpe Karai Kasang kaja htum ladat hte galaw na raitim, anhte myit mada da ai aten hte maren byin yang she byin na re. Ga sadi ni hpe Karai Kasang hpring tsup shangun na aten hpe anhte myit galu let la nga ai shaloi, myit mada lam ngang kang hkra hpa gaw karum ya lu ai kun?​—Yak 5:7, 8.

12. Hebre 11:1, 6 hku nga yang, myit mada lam gaw makam masham hte gara hku matut mahkai nga ai kun?

¹² Myit mada lam hpring tsup hkra galaw ya na ngu ga sadi jaw da ai Madu Yehowa hte matut hku hkau hkra shakut na nga yang, myit mada lam ngang kang nga na re. Karai Kasang  nga ai, “Shi e hkan tam ai ni hpe chyeju htang jaw” ai Madu re ai hpe kam yang she, myit mada lam ngang kang nga na re. (Hebre 11:1, 6 hpe hti u.) Yehowa hpe grau kam magang, ga sadi yawng hpe hpring tsup ya na ngu ai hpe grau kam magang rai na re. Yehowa hte hku hkau lam grau kaja hkra, myit mada lam grau ngang kang hkra, karum ya na tatut re ai lam ni hpe bawngban yu ga.

13. Karai Kasang hte gara hku nihtep lu na kun?

¹³ Yehowa kaw akyu hpyi u. Chyum Laika hti u. Yehowa hpe n mu lu tim Shi hte nihtep lu ai. Karai Kasang madat ya na hpe kam nna akyu hpyi ga shaga mai ai. (Yer 29:11, 12) Chyum Laika hti ai, myit sawn sumru ai hku nna, Karai Kasang tsun ai hpe madat mai ai. Moi na sadi dung ai mayam ni hpe Yehowa gara hku lanu lahku ai lam lu hti ai shaloi, myit mada lam grau ngang kang wa na re. Chyum Laika hta ka da ai lam yawng gaw, “anhte hpe sharin achyin na matu rai nga ai. . . . Chyum Laika hta na lu la ai hkam sharang ai lam hte myit n-gun lu la shangun ai lam a majaw myit mada shara lu la na lam rai nga ai.”​—Rom 15:4, JCLB.

14. Kaga ni a matu Yehowa galaw ya ai lam ni hpe hpa majaw myit sawn sumru ging ai kun?

¹⁴ Ga sadi ni hpe Yehowa gara hku jahpring shatsup na lam myit sawn sumru u. Abraham yan Sara a matu, Karai hpa galaw ya ai hpe myit yu ga. Shanhte gaw ma n mai lu ai asak rai nga sai. Raitim, ma lu wa na ngu Karai Kasang ga sadi jaw ai. (Nin 18:10) Abraham gara hku bai htang ai kun? Chyum Laika hta ndai hku tsun da ai: “amyu baw law law a kawa tai” na ngu ai ga sadi hpe Abraham “kam sham” ai ngu Chyum Laika hta tsun da ai. (Rom 4:18) Masha ningmu hku yu yang, n mai byin ai zawn raitim, Yehowa ga sadi hpring tsup na ngu ai hpe shi kam ai. Dai sadi dung ai wa myit daw na lam n byin wa ai. (Rom 4:19-21) Kade daram n mai byin ai zawn raitim, ga sadi ni hpe Yehowa hpring tsup ya na ngu ai hpe galoi mung kam mai ai lam dai zawn labau ni gaw sharin ya ai.

15. Anhte a matu Karai Kasang galaw ya wa ai lam ni hpe hpa majaw myit sawn sumru ging ai kun?

¹⁵ Na a matu Yehowa galaw ya wa ai lam ni hpe myit sawn sumru u. Chyum Laika hta lawm ai Karai a ga sadi ni hpring  tsup nga ai lam kaw na nang gara hku akyu lu nga ai hpe myit yu u. Ga shadawn, prat hta ra kadawn ai lam ni hpe, Karai Kasang madi shadaw ya na ngu Yesu ga sadi jaw ai. (Mat 6:32, 33) Chyoi pra ai wenyi hpyi yang, Yehowa jaw na ngu nna mung ga sadi jaw da ai. (Luk 11:13) Dai ga sadi ni hpe Yehowa shagrin ya ai. Na matu, Karai Kasang hpring tsup ya wa ai kaga ga sadi ni mung nga na re. Ga shadawn, nang hpe mara raw ya na, shalan shabran ya na, aten dep wenyi lusha jaw sha na ngu ga sadi jaw da ai. (Mat 6:14; 24:45; 2 Ko 1:3) Na matu, Karai Kasang galaw ya wa ai lam ni hpe myit sawn sumru na nga yang, htawm hpang hta, Karai Kasang galaw ya na lam ni a ntsa myit mada lam grau ngang kang wa na re.

16. Myit mada lam gaw hpa majaw grai manu dan ai kun?

¹⁶ Htani htana asak myit mada lam gaw, Karai jaw ai manu dan kumhpa re. Grai kaja ai htawm hpang hpe anhte la nga ai. Dai htawm hpang hpe anhte gaja wa lu la na hpe kam mai ai. Mayak mahkak ni, zingri zingrat ai lam ni, si ai lam ni hpe pyi hkam jan lu hkra, myit mada lam gaw hpri chyinghkyi zawn simsa lam jaw ai. Shut ai hpe koi nna, jaw ai hpe galaw lu hkra, myit mada lam gaw hpri gup chyawp zawn myit mang lam hpe makawp maga ya ai. Chyum Laika hpe madung tawn ai myit mada lam gaw, Karai hte hku hkau shangun ai. Anhte hpe Karai Kasang kade daram tsawra ai lam chye shangun ai. Myit mada lam ngang kang hkra galaw nga yang, akyu law law lu na re.

17. Myit mada lam gaw hpa majaw kabu gara shangun ai kun?

¹⁷ “Myit mada let kabu gara nga mu” ngu Roma nawku hpung de ka ai laika hta, kasa Pawlu n-gun jaw da ai. (Rom 12:12) Matut sadi dung nga yang, sumsing lamu hta, htani htana asak lu na hpe hkrak chye ai majaw, Pawlu kabu gara lu ai. Anhte mung ga sadi ni hpe Yehowa hpring tsup ya na ngu ai hpe kam nna, myit mada lam a majaw kabu gara lu ai. Shakawn kungdawn sara tsun ai zawn, galoi mung sadi dung ai “Karai Kasang Yehowa hpe, myit mada nga ai wa gaw, a [kabu gara, NWT] nga ai.”​—Shk 146:5, 6.