1. Sadi maja ai ngu ai gaw hpa rai kun? (2 Timohti 4:5)

 MAYAK mahkak ni hkrum wa ai shaloi, Yehowa hte uhpung hpe sadi dung ai lam chyam dinglik hkrum wa chye ai. Dai mayak mahkak ni hpe gara hku tawt lai lu na kun? Sadi maja ra ai. Makam masham hta ngang ngang kang kang tsap nga ra ai. (2 Timohti 4:5 hpe hti u.) Myit hpe azim sha tawn ai, asan sha myit ai, masa lam ni hpe Yehowa mu ai zawn mu ai hku nna, sadi maja let nga lu ai. Rai yang, tinang myit ai lam ni hpe hkamsha lam gaw shingkang ka-up sana n re.

2. Ndai sumhpa hta hpa lam bawngban na kun?

² Nawku hpung shinggan kaw na sa chye ai mayak mahkak 3 a lam hpe shawng na sumhpa hta bawngban wa sai. Yehowa hpe sadi dung ai lam chyam dinglik hkrum shangun ai nawku hpung kaw na sa chye ai mayak mahkak 3 a lam hpe ndai sumhpa hta bawngban na re. (1) Hkristan langai a majaw hkra machyi ai shaloi, (2) sharin shaga hkrum ai shaloi, (3) uhpung galai shai ai lam ni hpe hkap la na matu yak nga ai shaloi hta re. Dai mayak mahkak ni hkrum wa ai shaloi, gara hku nna sadi maja lu na kun? Yehowa hte uhpung hpe gara hku nna matut sadi dung lu na kun?

3. Hkristan langai a majaw hkra machyi ai shaloi, gara hku bai htang hkrup chye ai kun?

³ Hkristan langai ngai a majaw, lit nga ai hpunau langai a majaw hkra machyi ga ai kun? Nang hpe hkra machyi hkra dingsang galaw ai rai yang she rai na re. (Rom 3:23; Yak 3:2) Raitim, shi galaw ai lam a majaw, myit hkra machyi ai lam ni  byin chye ai. Dai lam chyu sha myit nna, n lu yup ai baw pyi byin chye ai. ‘Lama na, hpunau langai dai zawn galaw ai nga yang, Karai a uhpung ajet gaw rai kun?’ ngu nna mung myit chye ai. Satan dai hku myit shangun mayu ai. (2 Ko 2:10, 11) Dai zawn n kaja ai hku myit ai gaw, Yehowa hte mung, uhpung hte mung tsan mat shangun chye ai. Dai majaw, Hkristan langai a majaw hkra machyi ai shaloi, gara lam hku nna sadi maja nga lu na kun? Shoihpa nga ai myit jasat ni hpe gara hku koi lu na kun?

4. N tara ai hku kanawn mazum hkrum ai shaloi, Yosep gara hku sadi maja nga ai kun? Anhte hpa sharin la lu ai kun? (Ningpawt 50:19-21)

⁴ Myit hkum machyi. Yosep gaw asak shi ning jan hta, kahpu ni a n tara ai hku kanawn mazum hkrum wa ai. Kahpu ni gaw Yosep hpe n ju n dawng nna, nkau nga yang, sat pyi sat mayu ma ai. (Nin 37:4, 18-22) Hpang hta, mayam hku nna dut sha kau ai. Dai majaw, 13 ning daram grai yakhkak ai lam ni hkrum sha wa ai. Yehowa gaja wa shi hpe tsawra ai kun? Karum shingtau ra nga ai shaloi, kau da mat sai kun? ngu myit hkrup chye ai. Raitim, Yosep myit n machyi wa ai. De a malai, myit hpe azim sha tawn nna, sadi maja nga ai. Ahkaw ahkang lu ai aten hta pyi, kahpu ni hpe matai n htang wa ai. Tsawra myit madun wa ai. Mara raw ya wa ai. (Nin 45:4, 5) Dai zawn galaw lu ai gaw, asan sha myit sawn sumru lu ai majaw re. Mayak mahkak ni hpe sha myit maju jung na malai, Yehowa myit ra ai lam hpe sha myit maju jung ai. (Ningpawt 50:19-21 hpe hti u.) Hpa sharin la lu ai kun? N tara ai hku kanawn mazum hkrum ai shaloi Yehowa hpe myit hkum machyi. Shi kau da mat sai ngu hkum myit la. De a malai, mayak mahkak ni hpe hkam jan lu na matu, Karai Kasang gara hku karum ya nga ai hpe sha myit maju jung u. Kaga ni atsawm n kanawn mazum ai shaloi, shanhte a mara ni hpe tsawra myit hte ka-up ya dat u.​—1 Pe 4:8.

5. N tara ai hku kanawn mazum hkrum ai shaloi, Mika gara hku matut sadi maja nga ai kun?

⁵ Dingda Amerika hta nga ai myitsu salang hpunau Mika a lam hpe yu yu ga. b Lit nga ai hpunau ni, grai mazut ai hku kanawn mazum ai hpe hkrum ga ai. Shi ndai hku tsun ai: “Dai daram myit pu ba ai baw kalang mung n hkrum ga ai. Grai kajawng mat ai. Shana pyi n lu yup ai. Karum shingtau lam n nga ai ngu hkamsha nna hkrap pyi hkrap ai.” Raitim, Mika matut sadi maja nga ai. Hkamsha lam ni hpe hkang na matu shakut ai. Chyoi pra ai wenyi jaw na matu, hkam jan lu ai atsam jaw na matu, akroi anoi akyu hpyi ai. Karum shingtau lam lu shangun na uhpung kaw na shapraw ai laili laika ni hpe tam ai. Hpa sharin la lu ai kun? Hkristan langai ngai gaw, tinang hpe n tara ai hku kanawn mazum ai ngu hkamsha ai shaloi, matut nna azim sha nga u. N kaja ai myit jasat ni hpe hkang na matu shakut u. Gara masa ni a majaw, dai zawn shi tsun hkrup, galaw hkrup ai ngu ai hpe anhte n chye lu ai. Dai majaw, masa lam ni hpe shanhte a maga kaw na mu chye hkra karum ya na matu, Yehowa kaw akyu hpyi u. Rai yang, dai wa hpe ntsen ai myit matut nga sana n re. Hkra machyi ai lam hpe ahkyak shatai taw sana n re. (Gsh 19:11) Na a masa hpe Yehowa chye ai, hkam jan lu ai atsam jaw na re ai lam hpe dum u.​—2 Hl 16:9; Hpj 5:8.

6. Anhte hpe tsawra ai majaw Yehowa sharin shaga ai ngu ai hpe chye na na matu hpa majaw ahkyak ai kun? (Hebre 12:5, 6, 11)

⁶ Sharin shaga hkrum ai shaloi, grai yawn chye ai. Raitim, yawn ai hpe sha myit maju jung na nga yang, sharin shaga ai lam hpe  ahpa atang myit hkrup chye ai. N tara ai, grai mazut ai ngu nna pyi hkamsha wa chye ai. Anhte hpe tsawra ai majaw, Yehowa sharin shaga ai ngu ai lam hpe pyi malap mat chye ai. (Hebre 12:5, 6, 11 hpe hti u.) Tinang a hkamsha lam hpe sha myit maju jung na nga yang, Satan hpe ahkaw ahkang jaw ai hte bung mat na re. Satan gaw, sharin shaga ai lam hpe nyet kau shangun mayu ai. Yehowa hte mung, uhpung hte mung tsan mat shangun mayu ai. Nang sharin shaga hkrum ai nga yang, gara lam hku nna matut sadi maja nga lu na kun?

7. (a) Sumla hta madun da ai hte maren sharin shaga ai hpe Petru hkap la ngut ai hpang, Yehowa gara hku matut akyu jashawn ai kun? (b) Petru kaw na hpa sharin la lu ai kun?

⁷ Sharin shaga ai hpe hkap la u. Ra ang ai hku galai shai u. Kaga kasa ni a man hta Petru hpe Yesu kalang sha n-ga sharin shaga wa ai. (Mrk 8:33; Luk 22:31-34) Dai majaw Petru kaya hkrum wa chye ai. Raitim, Yesu a ntsa matut sadi dung ai. Sharin shaga ai lam hpe hkap la ai. Shut ai lam kaw na sharin la ai. Petru a sadi dung ai lam hpe Yehowa kumhpa jaw ai. Nawku hpung hta lit kaba ni jaw wa ai. (Yhn 21:15-17; Kas 10:24-33; 1 Pe 1:1, 2) Petru a mabyin kaw na hpa sharin la mai ai kun? Sharin shaga hkrum ai majaw gara hku hkamsha ra ai hpe sha myit maju jung na malai, sharin shaga ai hpe hkap la na, ra ang ai hku galai shai na nga yang, tinang mung, kaga ni mung akyu lu na re. Yehowa hte hpunau nauna ni a matu, grau akyu rawng wa na re.

8-9. Sharin shaga hkrum ai hpang, nnan hta Banado gara hku hkamsha ai kun? Raitim, myit mang ai lam hpe galai shai na matu hpa gaw karum ya ai kun?

⁸ Mozambik mungdan kaw na hpunau Banado a lam hpe myit u ga. Myitsu salang aya dawm la hkrum ai. Nnan hta gara hku hkamsha ai kun? “Tinang sharin shga hkrum ai hpe n ra ai majaw myit machyi ai” ngu tsun ai. Nawku hpung hta kaga ni gara hku mu na hpe sha myit tsang ai. “Masa hpe jaw ai hku mu na matu, Yehowa hte uhpung hpe kam ai myit bai nga wa na matu shata grai na mat ai” ngu tsun ai. Jaw ai hku mu na matu Banado hpe hpa gaw karum ya ai kun?

⁹ Tinang a myit mang ai lam hpe shading sharai ai. “Myitsu salang hku nna magam gun wa ai shaloi, Yehowa sharin shaga ai lam hpe jaw ai hku mu na matu kaga ni hpe karum ya ai shaloi, Hebre 12:7 hpe ngai lang wa ai. Ya, ‘dai Chyum daw hpe kadai hkan sa ra na kun?’ ngu tinang hkum tinang bai san ai. Ngai hte  hpawn, Yehowa a mayam yawng re” ngu tsun ai. Yehowa hte uhpung hpe kam ai myit bai nga wa hkra, kaga galai shai ai lam ni mung galaw wa ai. Chyum Laika hpe aten grau jaw nna hti ai. Hti ai hpe grau nna sung sung myit sawn sumru ai. Hpunau nauna ni gara hku mu na kun? ngu ai hpe naw myit tsang nga tim, shanhte hte rau hkaw tsun magam hta, nawku zuphpawng ni hta shang lawm ai. Aten na wa ai shaloi, myitsu salang hku nna lit bai ap hkrum ai. Nang mung, Banado zawn sha sharin shaga hkrum ai nga yang, gara hku hkamsha ai hpe sha myit maju hkum jung. Sharin shaga ai hpe hkap la u. Ra ang ai hku galai shai u. c (Gsh 8:33; 22:4) Rai yang, Karai Kasang hte mung, uhpung hte mung ni ni htep htep nga ai majaw, shaman chyeju lu na re.

10. Gara hpawng de hkrang galai shai ai lam a majaw, Israela nkau a sadi dung ai lam chyam dinglik hkrum wa ai rai na kun?

¹⁰ Uhpung a galai shai ai lam ni gaw, sadi dung ai lam hpe chyam dinglik chye ai. N sadi yang, Yehowa hte pyi tsan gang mat chye ai. Ga shadawn, Israela ni a matu galai shai lam gara hku byin wa ai hpe myit yu u. Mawshe a Tara n nga shi ai shaloi, hkinjawng lit hpe dinghku a baw ni gun hpai wa ai. Hkungri ni gawgap ai. Nta masha ni a malai, Yehowa hpe shagu hkungga ni nawng wa ai. (Nin 8:20, 21; 12:7; 26:25; 35:1, 6, 7; Yob 1:5) Raitim, Tara lu wa ai shaloi, dai laksan ahkaw ahkang hpe dinghku a baw ni n mai galaw sai. Shagu hkungga nawng na matu, Arun a dinghku kaw na masha ni hpe hkinjawng hku nna Yehowa lit ap ai. Dai zawn galai shai ai lam byin wa ai shaloi, Arun a amyu n re ai dinghku a baw langai hkinjawng hku nna galaw na nga yang si dam hkrum chye ai. d (Jaw 17:3-6, 8, 9) Dai galai shai ai lam a majaw, Mawshe hte Arun a ahkang aya hpe Kora, Dahtan, Abira hte amyu lakung ningbaw 250 gumlau wa ai rai na re. (Bhk 16:1-3) Tup hkrak gaw n lu tsun ai. Hpa mi raitim, Kora hte shi hpang hkan ai ni gaw Yehowa a ntsa matut sadi n dung wa ai. Uhpung a galai shai ai lam ni a majaw, sadi dung ai lam chyam dinglik hkrum ai shaloi, nang hpa galaw lu ai kun?

11. Lewi lakung Kohat la nkau kaw na hpa sharin la lu ai kun?

¹¹ Uhpung a galai shai ai lam ni hpe hpring tup madi shadaw u. Nam maling hta kawan hkawm ai laman, Kohat Lakung gaw laksan lit langai gun hpai ra ai. Dap htawt shagu, Kohat Lakung a la nkau gaw masha yawng a man hta ga shaka sumpu hpe hpai ra ai. (Bhk 3:29, 31; 10:33; Ysh 3:2-4) Laksan ahkaw ahkang nan re. Raitim, Ga Sadi Tawn Da Ai Mungdan de du ai hpang hta gaw, galai shai lam ni byin wa ai. Ga Shaka Sumpu hpe shara n htawt ra sai. Dai majaw, Hkawhkam Shawlumon hkaw dung ai aten laman, Kohat la nkau gaw mahkawn mangoi ai ni, chyinghka sin ai ni, htingnu sut dek hpe up ai ni hku nna lit ap hkrum ai. (1 Hl 6:31-33; 26:1, 24) Dai hpe Kohat la ni aput angun tsun ai, grau dan dawng ai lit langai ngai hpyi shawn ai ngu ai labau n nga ai. Hpa sharin la lu ai kun? Uhpung a galai shai ai lam ni gaw, tinang a lit hpe hkra machyi wa yang pyi, myit masin mahkra hte madi shadaw u. Gara lit hpe lu ai raitim, kabu gara let magam gun u. Tinang a manu gaw, tinang a lit hta n madung ai hpe dum u. Lit hta na, madat  mara ai hpe sha Yehowa grau manu shadan ai.​—1 Sa 15:22.

12. Behtela kaw na lit galai shai ai shaloi, Zaina gara hku hkamsha ai kun?

¹² Lit galai shai hkrum nna, ra sharawng ai laksan ahkaw ahkang sum mat ai nauna Zaina a lam hpe myit yu ga. Dai nauna gaw, Sinpraw Ka-ang hta nga ai. Behtela hta 23 ning jan magam gun ngut ai hpang, laksan ningshawng bai galaw na matu lit lu ai. Shi ndai hku tsun ai: “Galai shai lam kaba re. Akyu n rawng sai ngu hkamsha ai. ‘Hpa shut ai lam galaw hkrup ai kun?’ ngu myit hkrup ai.” Nawku hpung kaw na hpunau nauna nkau gaw, “nau n ram ai majaw Behtela hta matut n nga lu ai re” ngu tsun ai shaloi grau hkamsha yak ai. Aten na na myit daw nna, shana shagu hkrap ai. Raitim, “Uhpung hpe mung, Yehowa a tsawra myit hpe mung ngai galoi mung ntsen ai myit n nga ai” ngu tsun ai. Zaina gara hku nna kaja ai myit jasat matut nga wa ai kun?

13. N kaja ai hkamsha lam ni hpe Zaina gara hku tawt lai lu wa ai kun?

¹³ N kaja ai myit jasat ni hpe Zaina tawt lai lu wa ai. Gara ladat hte kun? Tinang hkrum nga ai mayak mahkak ni a lam ka da ai uhpung a laili laika ni hti ai. 2001, February 1 shapraw ai Sin Langchyi “Myit Daw Ai Lam Hpe Nang Awng Dang Lu” (Myen) ngu ai sumhpa gaw, grai karum ya ai. Lit galai shai lam hkrum ai shaloi, Chyum Laika ka ai Marku mung dai zawn hkamsha chye ai ngu sumhpa hta sanglang da ai. “Marku a kasi gaw myit daw ai lam hpe tawt lai na matu tsi kaja nan re” ngu Zaina tsun ai. Manang ni hte mung Zaina matut hku hku hkau hkau kanawn mazum ai. Langai hkrai sha n nga ai. Tinang hkum tinang matsan n dum taw ai. Uhpung a dawdan lam ni hpe chyoi pra ai wenyi lam matsun nga ai lam, woi awn nga ai hpunau ni tinang hpe grai lanu lahku ai lam Zaina chye na wa ai. Uhpung gaw, Karai a bungli ngut kre na matu sha madung tawn ai hpe mung chye na wa ai.

14. Uhpung hte seng ai gara galai shai lam hpe hkap la na matu Balado yak ai kun? Hpa gaw shi hpe karum ya ai kun?

¹⁴ Slobeniya hta nga ai asak 73 rai sai myitsu salang hpunau Balado a lam hpe myit yu ga. Shi a nawku hpung hpe kaga nawku hpung hte pawng dat nna, Nawku Htingnu pat kau ai shaloi grai hkamsha wa ai. Shi ndai hku tsun ai: “Dai ram tsawm ai Nawku Htingnu hpe hpa majaw pat kau ai kun? ngu ai hpe n chye na wa ai. Nau n na shi ai shaloi hta she htingnu hpe  bai gram da ai majaw grau myit htum mat ai. Ngai gaw lasama sara re. Htingnu hta lang na rai nnan ni hpe ngai galaw ya wa ai. nawku hpung pawng kau ai majaw galai shai lam ni galaw ra ai gaw anhte zawn asak kaba ai ni a matu n loi ai” ngu tsun ai. Dai dawdan lam hpe madi shadaw ya na matu, Balado hpe hpa gaw karum ya ai kun? “Yehowa uhpung a galai shai ai lam ni hpe hkap la ai gaw galoi shagu shaman chyeju lu shangun ai. Htawm hpang hta hkrum na grau kaba ai galai shai lam ni a matu shajin ya ai” ngu tsun ai. Nawku hpung hpe pawng dat ai majaw, lit galai mat ai majaw galai shai na matu nang yak nga ai kun? Na na hkamsha lam hpe Yehowa chye na ai hpe kam u. Dai zawn galai shai ai lam ni hpe madi shadaw nna Yehowa hte mung, Karai Kasang akyu jashawn nga ai uhpung hte mung ni ni htep htep nga yang, shaman chyeju hkamsha lu na re.​—Shk 18:25.

15. Nawku hpung kaw na sa ai mayak mahkak ni hkrum ai shaloi, gara hku matut sadi maja lu na kun?

¹⁵ Nhkru ai ndai mungkan htum wa hkyen sai hte maren, nawku hpung kata kaw na sa ai mayak mahkak ni grau hkrum wa chye ai. Dai mayak mahkak ni gaw, Yehowa a ntsa tawn ai sadi dung ai lam hpe chyam dinglik chye ai. Dai majaw, sadi maja ra ai. Hpunau nauna langai ngai a majaw, n tara ai hku kanawn mazum hkrum ai shaloi, myit hkum machyi nga. Sharin shaga hkrum ai shaloi, kaya hpa hkamsha lam ni hpe sha myit maju hkum jung. Sharin shaga ai lam hpe hkap la u. Ra ang ai hku galai shai u. Yehowa uhpung a galai shai ai lam ni gaw tinang hpe hkra machyi wa ai shaloi, myit masin mahkra hte hkap la u. Lam matsun hte maren hkan sa u.

16. Yehowa hte uhpung a ntsa kam ai myit gara hku matut hkang da lu ai kun?

¹⁶ Sadi dung ai lam chyam dinglik hkrum ai shaloi, Yehowa hte uhpung a ntsa kam ai myit matut hkang da lu ai. Dai hku byin lu hkra, sadi maja ra ai. Tsun mayu ai gaw, myit simsa lam nga ra ai. Asan sha myit sawn sumru ra ai. Masa lam ni hpe Yehowa mu ai zawn mu ra ai. Tinang hte bung ai mayak mahkak ni hpe awng dang hkra tawt lai wa ai Chyum Laika hta lawm ai ni a lam hpe hkaja na matu, shanhte a kasi ningli hpe myit sawn sumru na matu dawdan da u. Yehowa kaw akyu hpyi nna karum hpyi u. Nawku hpung hte galoi mung san san hkum nga. Rai yang, hpa mi hkrum wa tim Yehowa hte mung, nawku hpung hte mung tsan mat hkra, Satan gara hku mung pat shingdang lu na n re.​—Yak 4:7.