1-2. Kasa 8:27-31, 35-38 hta tsun da ai hte maren hkalup hkam la na matu Ehtiopi unuk hpe hpa gaw shadut ya wa ai kun?

HKRISTU a sape langai hku nna nang hkalup hkam mayu ai kun? Tsawra myit hte chyeju dum myit gaw, dai hku galaw na matu masha law law hpe shadut ya ai. Ehtiopi hkawhkam jan a kunhting wa a lam hpe yu yu ga.

² Shi gaw, Chyum Laika lam ni hpe chye wa ai hte maren kalang ta hkan sa ai. (Kasa 8:27-31, 35-38 hpe hti u.) Shi hpe hpa gaw shadut ya ai kun? Leng jawn nga ai shaloi, Esaia laika kaw nna Chyum daw nkau hpe shi hti nga ai hpe yu yang, Karai A Mungga hpe manu shadan ai lam chye lu ai. Shi hpe Hpilip ga shaga ai shaloi, Yesu galaw ya wa ai lam ni hpe chyeju dum wa ai. Rai yang, shi gaw Yerusalem de hpa majaw sa ai kun? Yehowa hpe tsawra ai majaw re. Gara hku chye lu ai kun? Yerusalem hta Yehowa hpe sa nawku ai hpe yu yang chye lu ai. Moi na shi a nawku htung kaw nna pru wa ai rai na masa nga ai. Dai hpang, tengman ai Karai Kasang hpe apnawng nna, Karai a amyu masha ni hte kanawn wa ai rai na re. Yehowa hpe tsawra ai majaw, Yesu a sape byin wa na matu hte hkalup hkam na matu, matut nna galaw ra ai lam hpe shi galaw wa ai.​—Mat 28:19.

3. Hkalup hkam na matu masha langai hpe hpa gaw hkum pat chye ai kun? (“ Na A Myit Masin Hta Hpa Nga Ai Kun?” ngu ai lawk hpe yu u.)

³ Yehowa hpe tsawra ai myit gaw, hkalup hkam na matu nang hpe shadut ya lu ai. Raitim, dai tsawra chye ai myit sha hkalup hkam na matu mung hkum pat chye ai. Gara hku nna kun? Ga shadawn nkau hpe yu yu ga. Nang gaw n kamsham ai nta masha ni hte manang ni hpe grai tsawra na re. Nang hkalup hkam  dat yang, shanhte nju n dawng mat na hpe mung myit tsang chye ai. (Mat 10:37) Shing nrai, Karai Kasang nju n dawng ai akyang lailen ni hpe nang tsawra nna, dai hpe jahkring kau na matu yak nga ai mung rai na re. (Shk 97:10) Shing nrai, shut shai ai nawku htung hte matut mahkai nga ai poi ni galaw ai hta, nang nga kaba wa ai mung rai na re. Dai hku galaw wa ai hpe nang grai ra sharawng ai mung rai na re. Dai majaw, Yehowa n ra sharawng ai htung lailen ni hpe jahkring kau na matu yak chye ai. (1 Ko 10:20, 21) “Gara lam (sh) kadai hpe grau tsawra ai kun?” ngu ai hpe nang dawdan ra ai.

4. Hkalup hkam na matu shadut ya lu ai madung lam gaw hpa rai kun?

⁴ Nang hta tsawra myit hte chyeju dum myit madun na matu, kaja ai lam law law nga ai. Ga shadawn, Yehowa Sakse ni hte nang garai n hkrum shi ai kaw nna, Chyum Laika hpe grai manu shadan wa na re. Yesu hpe mung tsawra na re. Ya gaw Yehowa Sakse ni hte chye wa sai majaw, shanhte hte kanawn mazum mayu wa ai. Raitim, dai zawn kaja ai lam ni hpe tsawra ai hte sha, tinang hkum tinang Yehowa kaw apnawng nna, hkalup hkam na matu, n mai shi ai. Yehowa hpe tsawra ai myit sha, hkalup hkam na matu madung hku nna shadut ya lu ai. Yehowa hpe kaga lam yawng hta na grau tsawra yang, shi hpe nawku ai kaw nna gara lam mung, kadai mung pat shingdang lu na n re. Yehowa hpe tsawra ai myit gaw, hkalup hkam na matu shadut ya lu nna, hkalup hkam ngut ai hpang mung matut sadi dung na matu, nang hpe karum ya na re.

5. Gara ga san ni hpe hkaja na kun?

⁵ Yehowa hpe myit kraw lawang mahkra, myit masin mahkra, myit mang mahkra, n-gun lagaw mahkra hte tsawra ra ai lam Yesu tsun ai. (Mrk 12:30) Yehowa hpe dai zawn tsawra na matu hte hkungga na matu gara hku sharin la lu na kun? Anhte hpe tsawra ai Yehowa a tsawra myit gaw shi hpe bai tsawra na matu shadut ya lu ai. (1 Yh 4:19) Ahkyak htum ai tsawra myit rawt jat wa yang, gara hkamsha lam ni hte galaw ai lam ni nga wa na kun? *

6. Roma 1:20 hku nga yang Yehowa hte seng nna hkaja lu ai lam langai gaw hpa rai kun?

⁶ Yehowa a hpan da ai lam kaw nna shi a lam sharin la u. (Roma 1:20 hpe hti u; Shr 4:11) Hpun ni hte du sat ni a hkrang nsam amyu myu hta mu lu ai Yehowa a nyan hpaji hpe sumru yu u. Na a hkum hkrang shachyaw da ai lam hpe mung myit yu u. (Shk 139:14) Jan hta mu lu ai Yehowa a n-gun atsam hpe myit yu u. Jan gaw wan hkying hku law ai shagan ni kaw nna langai sha naw re. * (Esa 40:26) Dai lam hpe myit yu yang, Yehowa hpe grau nna hkungga wa na re. Yehowa a nyan hpaji hte n-gun atsam hpe chye ai gaw, shi hte hku hkau lam a npawt nhpang sha naw re. Yehowa hte ngang kang ai tsawra myit gawgap na matu, shi a lam grau nna chye ra ai.

7. Yehowa hpe tsawra na matu nang hpa hpe kam ra ai kun?

⁷ Yehowa nang hpe lanu lahku ai lam kam ra ai. Sumsing lamu hte ginding aga a Hpan Madu gaw, nang hpe lanu lahku nna, shi nang hpe atsawm chye ai lam kam na matu yak nga ai kun? Rai yang, Yehowa gaw “anhte kadai hte mung tsan nga ai n rai” ngu ai hpe dum u. (Kas 17:26-28) Shi gaw “myit masin mahkra hpe sawk yu” nna, “nang shi hpe tam yang, mu na” ngu ga sadi jaw da ai. (1 Hl 28:9) “Ngai nang hpe dun la” na ngu Yehowa tsun da ai  majaw, nang Chyum Laika hkaja nga ai re. (Yer 31:3) Nang hpe Yehowa galaw ya wa ai lam ni hpe chyeju dum magang, shi hpe grau tsawra wa magang rai na re.

8. Yehowa a tsawra myit hpe gara hku bai htang lu na kun?

⁸ Yehowa a tsawra myit hpe bai htang lu ai lam langai gaw, shi kaw akyu hpyi ai hku nna re. Na a myit tsang ai lam ni hpe tsun dan nna, nang hpe galaw ya ai lam ni a matu chyeju dum ai lam tsun dan yang, Karai Kasang hpe tsawra ai myit rawt jat wa na re. Na a akyu hpyi ga ni hpe mahtai jaw ai hpe mu yang, Yehowa hte na a hku hkau lam grau ngang kang wa na re. (Shk 116:1) Shi nang hpe chye na ya ai hpe mung kam wa na re. Raitim, Yehowa hte grau ni htep wa na matu, shi a myit mang ai lam ni hpe chye ra ai. Nang kaw na shi hpa ra sharawng ai hpe mung chye ra ai. Dai machye machyang hpe lu la na matu, madung hku nna Chyum Laika hpe hkaja ra ai.

9. Chyum Laika hpe manu shadan ai lam gara hku madun lu ai kun?

⁹ Karai a Mungga re ai Chyum Laika hpe manu shadan u. Chyum Laika kaw sha Yehowa a tengman ai lam, nang hte seng nna shi a yaw shada lam hpe mu lu ai. Chyum Laika hpe shani shagu hti ai, hkaja na matu hkyen lajang ai, sharin la wa ai lam ni hpe hkan sa ai hku nna, Chyum Laika hpe manu shadan ai lam madun mai ai. (Shk 119:97, 99; Yhn 17:17) Nang hta Chyum Laika hti na matu chyarang nga ai kun? Dai chyarang hte maren shani shagu hti ai kun?

10. Chyum Laika a laklai ai lam langai gaw hpa rai kun?

¹⁰ Chyum Laika a laklai ai lam langai gaw, Yesu hpe myi hte chyaw mu wa ai masha ni ka da ai labau ni lawm ai re. Na a matu Yesu galaw ya wa ai lam ni hpe sanglang dan ai tup hkrak tengman ai laika buk gaw ndai sha re. Yesu tsun ai, galaw ai lam ni hpe nang hkaja yang, shi hte hku hkau mayu wa na re.

11. Yehowa hpe tsawra na matu gara hku sharin la lu ai kun?

¹¹ Yehowa hpe grau tsawra wa na matu, Yesu hpe tsawra hkra sharin la u. Hpa majaw kun? Yesu gaw Kawa a atsam ningja ni hpe htep lahti hkan sa ai majaw re. (Yhn 14:9) Yesu a lam grau hkaja magang, Yehowa a lam grau chye wa nna grau manu shadan wa magang re. Matsan  ai, machyi makaw ai, gawng kya ai majaw, kaga ni a yu kaji hkrum ai ni hpe Yesu madun wa ai tsawra matsan dum myit hpe myit yu u. Nang hpe jaw ai tatut re ai hpaji jaw ga ni hte shi a ga madat ai majaw, na a prat rawt jat wa ai lam ni hpe mung myit yu u.​—Mat 5:1-11; 7:24-27.

12. Yesu a lam grau chye wa yang hpa galaw na matu shadut ya ai kun?

¹² Yesu jaw wa ai shagu hkungga a majaw, mara raw dat hkrum ai hpe atsawm myit yang, shi hpe grau tsawra wa na re. (Mat 20:28) Yesu gaw na a matu sharawng awng let si hkam wa ai hpe chye na wa yang, myit malai lu na matu hte Yehowa a mara raw hkrum na matu nang shakut na re. (Kas 3:19, 20; 1 Yh 1:9) Yehowa hte Yesu hpe tsawra wa yang, shan hpe tsawra ai ni hte arau nga mayu wa na re.

13. Yehowa nang hpe hpa madi shadaw ya ai kun?

¹³ Yehowa a dinghku hpe tsawra na matu sharin la u. Yehowa hpang tinang hkum tinang apnawng ai hpe, n kamsham ai nta masha ni hte moi na manang ni gaw chye na yang she chye na ya na re. Shanhte gaw nang hpe pyi ning hkap wa chye ai. Hpunau nauna ni hku nna Yehowa nang hpe madi shadaw ya na re. Shanhte hte ni htep hkra nga yang, nang ra nga ai tsawra myit hte madi shadaw lam lu la na re. (Mrk 10:29, 30; Heb 10:24, 25) Lani mi hta, na a nta masha ni gaw, Yehowa hpe nawku wa nna, shi a tsang madang ni hte maren asak hkrung wa chye ai.​—1 Pe 2:12.

14. 1 Yawhan 5:3 hta tsun da ai hte maren Yehowa a tsang madang ni hte seng nna hpa hpe chye wa ai kun?

¹⁴ Yehowa a tsang madang ni hpe manu shadan nna hkan sa na matu sharin la u. Yehowa hpe garai n chye shi ai shaloi, tinang a tsang madang ni hte maren asak hkrung lai wa na re. Raitim, ya gaw Yehowa a tsang madang ni gaw, grau kaja ai hpe nang chye wa ai. (Shk 1:1-3; 1 Yawhan 5:3 hpe hti u.) Madu jan, madu wa, kanu kawa, ma ni hte seng nna Chyum Laika hpaji jaw ai lam hpe myit yu u. (Ehp 5:22–6:4) Dai hpe hkan sa ai shaloi, na a dinghku ngwi pyaw wa ai n re i? Manang hpe hpaji rawng ai hku lata ai hte seng nna, Yehowa a lam matsun ni hpe hkan sa ai shaloi akyang lailen ni grau rawt jat wa ai n re i? Grau mung pyaw wa ai n re i? (Gsh 13:20; 1 Ko 15:33) Re ai ngu nang htai na re.

15. Chyum Laika npawt tara ni hpe gara hku hkan sa na hpe n chye yang hpa galaw ra ai kun?

¹⁵ Kalang lang, nang chye wa ai Chyum Laika npawt tara ni hpe gara hku hkan sa na hpe chye na matu yak na re. Dai majaw, jaw ai hte shut ai hpe ginhka chye na matu, Yehowa gaw uhpung hpe akyu jashawn nna, Chyum Laika hpe madung tawn ai laili laika ni hpe lajang ya ai. (Heb 5:13, 14) Dai laili laika ni hpe nang hti nna hkaja ai shaloi, tatut akyu lu nna tup hkrak tengman ai hpe chye wa na re. Yehowa a uhpung hta mung shang lawm mayu wa na re.

16. Yehowa gaw shi a masha ni hpe gara hku hpawng de da ai kun?

¹⁶ Yehowa a uhpung hpe tsawra na matu hte madi shadaw na matu sharin la u. Yehowa gaw shi a masha ni hpe nawku hpung ni hte hpawng de da ya ai. Shanhte yawng hpe shi a Kasha Yesu woi awn nga ai. (Ehp 1:22; 5:23) Dai ni aten hta, Yesu gaw shi galaw mayu ai magam bungli ni hpe woi awn na matu, namman chya hkam ai hpung kaji hpe aya tang da ai. Dai hpung hpe “sadi ai hte myit su ai mayam” ngu nna Yesu tsun ai. Shanhte gaw wenyi nshat jaw sha na matu hte wenyi lam hta makawp maga ya na matu kang ka let karum ya nga ai. (Mat 24:45-47) Myitsu ai mayam kaw nna nang hpe lanu lahku ai lam langai gaw, woi awn na matu atsam nga ai myitsu salang ni hpe aya tang da ai hku nna re. (Esa 32:1, 2; Heb 13:17; 1 Pe 5:2, 3) Myitsu salang ni gaw nang hpe shalan shabran ya na matu, Yehowa  hte nang grau nna ni htep wa na matu, sharawng awng let dang lu ai daram karum ya mayu ai. Raitim, ahkyak htum lam langai gaw, Yehowa a lam kaga ni hpe sharin ya lu na matu karum ya ai lam re.​—Ehp 4:11-13.

17. Roma 10:10, 13, 14 hku nga yang Yehowa a lam kaga ni hpe hpa majaw tsun dan mayu ai kun?

¹⁷ Yehowa hpe tsawra wa hkra kaga ni hpe karum ya u. Yesu gaw shi hpang hkan ai ni hpe Yehowa a lam kaga ni hpe sharin ya na matu htet da ai. (Mat 28:19, 20) Dai lam matsun hpe madat ging ai majaw, anhte madat ga ai. Yehowa hpe tsawra ai myit rawt jat wa yang, “an chyawm gaw, mu la, na la sai lam ni hpe n tsun ai, n nga lu ga ai” ngu tsun wa ai kasa Petru hte Yawhan zawn anhte mung hkamsha na re. (Kas 4:20) Yehowa hpe tsawra wa hkra marai langai hpe anhte karum ya lu yang grai kabu ga ai. Ehtiopi wa hpe Chyum Laika tengman ai lam chye na na matu hte hkalup hkam la ai du hkra karum ya lu ai shaloi, Hpilip kade daram kabu na hpe shingran yu u. Hpilip hpe kasi la nna, hkaw tsun na matu Yesu htet da ai lam hpe hkan sa ai gaw, nang mung Yehowa Sakse langai byin mayu ai hpe sakse madun ai re. (Roma 10:10, 13, 14 hpe hti u.) Dai shaloi, “ngai baptisma hkam na, hpa hkum shara nga a ta?” ngu nna san wa ai Ehtiopi masha zawn, nang mung san mayu wa na re.​—Kas 8:36.

18. Hpang na sumhpa hta hpa lam chye lu na kun?

¹⁸ Hkalup hkam na matu dawdan ai gaw, na a prat hta ahkyak htum lam hpe dawdan ai re. Grai ahkyak ai lahkam re ai majaw, atsawm myit yu ra ai. Hkalup hkam ai hte seng nna chye na na matu hpa galaw ra ai kun? Hkalup garai n hkam shi ai aten hte hkam ngut ai hpang hpa galaw ra ai kun? Dai ga san ni a mahtai hpe hpang na sumhpa hta chye lu na re.