1. Yehowa kaw akyu hpyi lu ai ahkang hpe gara hku mu mada ging ai kun?

 SUMSING lamu hte ginding aga hpe hpan ai Hpan Madu gaw, shi kaw akyu hpyi sit shang lu ai ahkaw ahkang jaw da ai. Ndai lam hpe myit yu u: Tau hkrau ahkang n hpyi ra ai sha, aten shagu, gara amyu ga hte raitim, Yehowa kaw myit masin mahkra hte hpaw tsun dan lu ai. Tsi rung yupra kaw na raitim, htawng gawk kaw na raitim, anhte a akyu hpyi ga hpe tsawra myit nga ai Kawa madat ya nga ai hpe kam nna hpyi mai ai. Dai ahkaw ahkang hpe anhte grai manu shadan ai.

2. Akyu hpyi lu ai ahkang hpe manu shadan ai lam Hkawhkam Dawi gara hku madun ai kun?

² Akyu hpyi lu ai ahkang hpe Hkawhkam Dawi manu shadan ai. Dai majaw ndai hku ka wa ai: “Ngai akyu hpyi ai ga, na a man e, manam pyaw ai baw zawn, . . . rai nga u ga.” (Shk 141:1, 2) Dawi a aten hta, jet ai nawku dawjau lam a matu, hkinjawng ni lang ai manam pyaw ai baw hpe atsawm hkyen lajang ra ai. (Pru 30:34, 35) Manam pyaw ai baw hpe atsawm hkyen lajang ra ai zawn, Dawi mung sumsing Kawa hpe hpa ni tsun na ngu ai hpe atsawm myit nna hkyen lajang ai. Anhte mung, Yehowa ra sharawng ai lam hte maren akyu hpyi mayu ga ai.

3. Gara zawn myit jasat hte Yehowa hpang akyu hpyi sit shang ging ai kun? Hpa majaw kun?

³ Yehowa kaw akyu hpyi ai shaloi, ahpa atang n mai galaw ai. Grai hkungga ging ai. Esaia, Ezekela, Daniela hte Yawhan ni a shingran hpe myit yu u. Shanhte a shingran ni hta, bung ai lam nkau nga ai. Shanhte yawng, Yehowa hpe grau htum ai Hkawhkam hku nna tsun ma ai. “Madu [Yehowa] gaw, galu kaba nna tsaw htum ai tingnyang hta dung nga ai hpe ngai mu nngai” ngu Esaia tsun ai. (Esa 6: 1-3) Grup-yin hta, “n-goilatum hte bung” ai nhtoi ni “htoi kabrim nga ai” sumsing wanleng ntsa Yehowa dung nga ai hpe Ezekela mu ai. (Eze 1:26-28) Palawng ahpraw hpun da ai “moi chyaloi nhkoi na wa langai mi” a tingnyang kaw na, wan shinglet ni pru nga ai hpe Daniela mu ai. (Dan 7:9, 10) Mya lungseng nsam n-goilatum htoi kabrim nga ai tingnyang ntsa Yehowa dung nga ai hpe Yawhan mu ai. (Shr 4:2-4) Yehowa a hpung shingkang a lam hpe myit ai shaloi, Karai Kasang kaw hkungga let, akyu hpyi sit shang lu ai ahkang gaw, grai ahkyak ai hpe bai dum shangun ai. Rai yang, gara hku akyu hpyi ging ai kun?

4. Mahte 6:9, 10 hta lawm ai Yesu sharin ya ai akyu hpyi ga a nnan hpang ai ga ni kaw na hpa sharin la lu ai kun?

⁴ Mahte 6:9, 10 hpe hti u. Karai ra sharawng ai ladat hte, akyu hpyi lu ai lam, Bum Ntsa Na Mungga hta, sape ni hpe Yesu sharin ya ai. “Nanhte gaw ning ngu akyu hpyi mu” ngu tsun ngut ai hpang, Yehowa a myit ra ai lam hte matut mahkai nga ai ahkyak ai lam ni hpe shawng tsun dan ai. Mying ningsang chyoi pra na matu, gumlau ai ni yawng hpe jahten kau na Mungdan du wa na matu, ginding aga hte shinggyim masha ni a matu yaw shada da ai htawm hpang shaman chyeju ni lu na matu re. Dai lam ni hpe hpyi shalawm ai hku nna, anhte a matu Karai Kasang a myit ra ai lam gaw, grai ahkyak ai hpe anhte madun dan nga ai re.

5. Tinang a matu akyu hpyi ai gaw htap htuk ai kun?

⁵ Tinang a matu akyu hpyi ai gaw, htap htuk ai hpe Yesu matut tsun ai. Lani mi na matu malu masha jaw na matu, mara ni raw ya na matu, chyam dinglik ai lam kaw n lawm mat hkra karum ya na matu, nhkru ai wa a lata kaw na hkye la na matu, Yehowa kaw akyu hpyi mai ai. (Mat 6:11-13) Dai hku akyu hpyi ai gaw, Karai Kasang hpe shamyet shanat ra ai lam chye na ai re. Karai a myiman lu mayu ai lam madun dan ai mung re.

6. Yesu sharin ya ai akyu hpyi ga hta lawm ai lam ni a matu sha, hpyi ra na kun? Sanglang dan u. 

⁶ Dai akyu hpyi ga hte maren, sape ni raw hkan hpyi na matu, Yesu n myit mada ai.  Masa hku hkan nna, ahkyak ai lam amyu myu a matu Yesu akyu hpyi wa ai. (Mat 26:39, 42; Yhn 17:1-26) Anhte mung, myit tsang ai lam ni a matu hpyi mai ai. Dawdan lam n jahkrat shi yang, nyan hpaji, machye machyang lu na matu hpyi mai ai. (Shk 119:33, 34) Yak ai lit ni gun hpai ra ai shaloi, gara hku galaw ra na hpe chye hkra hpyi mai ai. (Gsh 2:6) Kanu kawa ni gaw kasha ni a matu, kasha ni gaw kanu kawa ni a matu hpyi mai ai. Chyum ga sharin ni a matu, tinang hkaw tsun ai ni a matu hpyi ya mai ai. Hpyi mung hpyi ya ging ai. Raitim, hpyi sha hpyi ai baw n byin ging ai.

7. Yehowa hpe hpa majaw shakawn ging ai kun?

⁷ Akyu hpyi ai shaloi, Yehowa hpe shakawn na matu mung dum ra ai. Anhte a shakawn shagrau ai lam hpe Shi daram kadai n lu ging ai. Shi gaw, “mai kaja nga nna, mara raw kau ya” na matu jin jin re. Bai nna, Shi gaw “matsan dum chye ai, Sumnung re ai, myit galu ai, chyeju kaba hte, Sadi sahka rawng ai” Karai re. (Shk 86:5, 15) Yehowa hpe shakawn na lam ni grai nga ai.

8. Gara lam ni a matu Yehowa hpe chyeju dum mai ai kun? (Shakawn 104:12-15, 24)

⁸ Akyu hpyi ai shaloi, Yehowa hpe shakawn ai sha n-ga, mauhpa hkyen lajang ya ai lam ni a matu mung chyeju dum ra ai. Ga shadawn, nsam hkum ai namhpan, namchyim hkum ai malu masha ni, hku hkau ai manang ni a matu chyeju dum mai ai. Anhte ngwi pyaw na matu, tsawra myit nga ai Kawa gaw, ra ai hta jan nna jaw da ai. (Shakawn 104:12-15, 24 hpe hti u.) Grau ahkyak ai gaw, makam masham ngang kang shangun na wenyi nshat ni hpring tup lajang da ya ai lam hte mauhpa htawm hpang myit mada lam ni a matu chyeju dum ging ai.

9. Yehowa hpe chyeju dum na matu hpa gaw karum ya ai kun? (1 Htesaloni 5:17, 18)

⁹ Yehowa galaw ya ai lam yawng a matu, chyeju dum na matu aloi sha malap kau hkrup chye ai. Myit dum na matu hpa gaw karum ya ai kun?  Tinang laksan hpyi mayu ai ni hpe jahpan galaw da u. Yehowa gara hku mahtai jaw ai hpe chyahkring hkring bai san jep nna, karum ya ai majaw, chyeju shakawn u. (1 Htesaloni 5:17, 18 hpe hti u.) Myit yu ga: Marai langai ngai gaw, tinang hpe chyeju dum ai lam madun ai shaloi kabu ai. Chyeju chye dum ai ngu hkamsha ai. Akyu hpyi ga ni mahtai jaw ai majaw, Yehowa hpe chyeju dum ai lam anhte madun ai shaloi Shi kabu ai. (Kol 3:15) Yehowa hpe chyeju dum ging ai lam ni naw nga ai.

10. 1 Petru 2:21 hku nga yang, ginding aga de Yesu hpe dat ya ai majaw, Yehowa hpe chyeju dum na lam hpa ni nga wa ai kun?

¹⁰ 1 Petru 2:21 hpe hti u. Anhte hpe sharin ya na matu, tsawra ai Kasha hpe dat ya ai majaw, Yehowa hpe chyeju dum ging ai. Yesu a lam hkaja ai shaloi, Yehowa a lam, Karai ra sharawng ai lam lu mai ai lam hpe law law chye wa ai. Hkristu a gawng malai jahpu hpe kam ai lam madun na nga yang, Yehowa Karai Kasang hte hku hkau lam kaja nna, ngwi pyaw simsa lam lu na re.​—Rom 5:1.

11. Yesu a mying gang nna hpa majaw akyu hpyi ma ai kun?

¹¹ Kasha kaw nna, Yehowa hpang akyu hpyi lu ai majaw mung, chyeju dum ging ai. Akyu hpyi ga ni hpe, Yesu kaw nna Yehowa mahtai jaw ai. Yesu a mying gang nna, hpyi ai akyu hpyi ga ni hpe madat ya ai, mahtai jaw ai. “Wa gaw Kasha a marang e hpung shingkang lu la hkra, nye a amying gang nna, nanhte hpyi mahpyi, ngai madat ya na nngai” ngu Yesu tsun ai.​—Yhn 14:13, 14.

12. Kasha hpe jaw ai majaw, Yehowa hpe chyeju dum ging ai hpa lam naw nga ai kun?

¹² Yesu a gawng malai hkungga hpe madung tawn nna, anhte a mara ni hpe Yehowa raw dat ya ai. Yesu gaw, “hkinjawng agyi” hku nna “sumsing lamu na daru magam a tingnyang hkra maga de, wa dung nga” ai ngu Chyum Laika hta tsun da ai. (Heb 8:1) Yesu gaw, Kawa hte rau nga nga nna, “htinglu htinglai ya” na wa re. (1 Yh 2:1) Anhte a gawngkya lam hpe myit tau ya lu ai, “anhte a matu” htinglu htinglai ya lu ai Hkinjawng Agyi jaw da ai majaw, chyeju dum hpa re. (Rom 8:34; Heb 4:15) N hkum tsup ai shinggyim masha ni re ai anhte gaw, Yesu a shagu hkungga n nga yang, Yehowa kaw akyu hpyi sit shang lu na n re. Tsawra ai Kasha hpe jaw da ai majaw, Yehowa hpe anhte chyeju dum ai.

13. Sape ni hpe tsawra ai lam n si shi ai shana hta Yesu gara hku madun wa ai kun?

¹³ Sape ni hpe “n shawp n kap ai hta na . . . makawp maga” ya na matu, n si shi ai shana hta Yesu grai na hkra akyu hpyi wa ai. (Yhn 17:15) Tsawra myit lawm ai lam re. Kade n na yang, yakhkak ai chyam dinglik ai lam ni hkrum ra sana. Dai pyi, kasa ni a shawng lam a matu myit tsang ya wa ai.

14. Hpunau nauna ni hpe tsawra ai lam gara hku sakse madun ging ai kun?

¹⁴ Yesu hpe kasi la ai hku nna anhte gaw, tinang hkum tinang sha, myit maju n jung ging ai. Hpunau nauna ni a matu ayan akyu hpyi ya mai ai. Dai zawn akyu hpyi ai gaw, shada da tsawra u ngu ai Yesu a ga hpe hkan sa ai hte bung ai. Kamsham shada hpe kade daram tsawra ai lam Yehowa hpe sakse madun ai re. (Yhn 13:34) Hpunau nauna ni a matu akyu hpyi ya ai gaw, majoi n byin ai. “Ding hpring ai wa a hpyi nem ai ga gaw, shabyin lu na atsam law law rawng nga lu ai” ngu Chyum Laika hta tsun da ai.​—Yak 5:16, 17.

15. Hpunau nauna ni a matu anhte hpa majaw akyu hpyi ya ra ai kun?

 ¹⁵ Hpunau nauna ni gaw, chyam dinglik lam amyu myu hkrum nga ai majaw, anhte akyu hpyi ya ra ai. Machyi makaw ai lam, shingra tsin-yam, majan, zingri zingrat ai lam hte kaga mayak mahkak ni hpe shanhte hkamjan lu hkra karum ya na matu, Yehowa kaw akyu hpyi mai ai. Ra nga ai ni hpe tingkyeng akyu n tam ai sha, karum ya nga ai hpunau nauna ni a matu mung hpyi ya mai ai. Mayak mahkak hkrum nga ai nkau hpe chye yang, mying shalawm nna, hpyi ya mai ai. Hkamjan lu hkra karum ya na matu, akyu hpyi ya ai hku nna jet ai tsawra myit madun mai ai.

16. Woi awn ai ni a matu hpa majaw akyu hpyi ging ai kun?

¹⁶ Nawku hpung hta woi awn nga ai ni a matu akyu hpyi ya yang, shanhte grai chyeju dum ai. Shanhte mung akyu lu la ai. Kasa Pawlu ndai hku tsun ai: “Kabu gara shi ga a sung htum ai lam hpe nden ja ai myit hte shana ya lu nna, . . . n hkrit n kang ai sha tsun dan lu hkra, nye a n-gup hpaw ai shaloi, tsun dan lu na mung sumtu, ngai hpe jaw ya u ga, nye a matu mung akyu a hpyi nga mu.” (Ehp 6:19, 20) Dai ni aten hta mung, anhte hpe woi awn nga ai hpunau law law gaw, bungli grai shakut ai. Shanhte a galaw ai lam hpe shaman chyeju jaw ya na matu, Yehowa kaw akyu hpyi ai hku nna, shanhte hpe tsawra ai lam anhte madun ai.

17-18. Gara masa ni hta, kaga ni a malai akyu hpyi ya ra chye ai kun? Hpa hpe dum ging ai kun?

¹⁷ Kaga ni a malai akyu hpyi ya ai aten ni nga chye ai. Ga shadawn, Chyum ga sharin ya ai nauna gaw, shi hpang hkan nang ai nauna hpe akyu hpyi shangun chye ai. Chyum ga sharin a lam hpe atsawm n chye ai majaw, sharin ngut ai hpang hta sha, grau akyu hpyi ya mayu na re. Rai yang she, Chyum ga sharin a matu, hpa lam hpyi ya yang kaja na kun ngu ai hpe atsawm chye lu na re.

¹⁸ Magam hkrum tsup hpawng, nawku zuphpawng ni a matu, hpunau langai akyu hpyi ya ra chye ai. Dai shaloi, zuphpawng a yaw shada lam hpe myit dum ging ai.  Akyu hpyi ai aten gaw, sharin achyin ya ra na aten, lama ma hpe shana ya ra na aten n re. Nawku zuphpawng law malawng hta mahkawn hkawn, akyu hpyi na matu, aten yawng minit 5 sha lu ai majaw, lit ang ai hpunau gaw, laksan hku nna zuphpawng nnan hta, “galu galang” n hpyi ging ai.​—Mat 6:7.

19. Yehowa a tara jeyang ai nhtoi hta jin jin rai nga na matu hpa gaw karum ya na kun?

¹⁹ Yehowa a tara jeyang ai nhtoi, ni wa sai hte maren, akyu hpyi ai hpe grau ahkyak shatai ra ai. “Dai byin wa na ra ai lam ni yawng hta na nanhte lawt lu nna, . . . akyu hpyi let, ahkying aten shagu hta a maja nga mu” ngu Yesu tsun ai. (Luk 21:36) Ayan akyu hpyi ai gaw, makam masham ngang kang na matu karum ya ai. Rai yang she, Karai a tara jeyang ai nhtoi a matu jin jin rai nga na re.

20. Anhte a akyu hpyi ga ni gaw, gara lam hku nna manam pyaw ai baw hte bung lu na kun?

²⁰ Hpa ni chye wa sai kun? Akyu hpyi lu ai ahkang hpe anhte grai manu shadan ai. Yehowa a yaw shada lam hte ding tawk matut mahkai nga ai lam ni a matu, ahkyak shatai akyu hpyi ya ging ai. Karai a Kasha a matu, Mungdan uphkang lam a matu, chyeju shakawn ging ai. Hpunau nauna ni a matu mung, akyu hpyi ya ging ai. Hkum hkrang hte wenyi lam a matu mung, hpyi mai ai. Hpa ni hpyi shalawm ging ai hpe atsawm myit ai gaw, akyu hpyi lu ai ahkang hpe manu shadan ai lam madun ai re. Rai yang, anhte a akyu hpyi ga ni gaw, manam pyaw ai baw hte bung ai majaw, Yehowa “awng sharawng” na re.​—Gsh 15:8.