Madi madun lam ni hku nna, Yesu gaw A.D. 29, hkalup hkam ai aten hta, Hkinjawng Agyi byin wa ai. Gara madi madun lam ni nga ai kun? Yesu hkalup hkam ai shaloi, Karai a “myit ra ai” lam ngu ai ga shadawn hkungri hta shi a asak hpe gawng malai hkungga jaw wa ai. (Gal 1:4; Heb 10:5-10) Hkungri gaw nawku htingnu a ahkyak ai daw langai re ai majaw, Yesu hkalup hkam ai shaloi kaw nna nan, wenyi htingnu mung nnan nga hpang wa ai re. Yehowa a grau htum ai wenyi htingnu gaw, Yesu a gawng malai hkungga hpe madung tawn ai tengman ai hku nawku daw jau ai lam hpe malai tsun ai re.​—Mat 3:16, 17; Heb 5:4-6.

Wenyi htingnu nga wa sai majaw, dai hta magam gun na matu hkinjawng agyi langai ra ai. Dai majaw, Yehowa gaw Yesu hpe “chyoi pra ai Wenyi hte” namman jaw ya nna, hpung atsam jaw wa ai. (Kas 10:37, 38; Mrk 1:9-11) Yesu n si shi ai aten hte n hkrung rawt shi ai aten hta, Hkinjawng Agyi hku nna aya tang hkrum ai ngu gara hku chye lu ai kun? Mawshe a tara npu hta, hkinjawng agyi ni hku nna magam gun wa ai Arun hte shi a aya hkam la ai ni a lam hpe bai sawn maram yu ga.

Jep ai tara hku nga yang Chyoi Pra Htum Ai Gawk de hkinjawng agyi langai sha shang na ahkang nga ai. Chyoi Pra Htum Ai Gawk hte Chyoi Pra Ai Gawk hpe nba grang hte grang da ai. Htingrai Htingrat Nhtoi hta sha, Hkinjawng agyi gaw nba grang hpe lai nna kata de shang ai. (Heb 9:1-3, 6, 7) Arun hte shi a aya hkam ai ni gaw, nawku sum a nba grang hpe garai n lai shi yang, hkinjawng agyi ni hku nna aya tang hkrum ngut chyalu rai ra ai. Dai hte maren, Yesu mung garai n si shi yang, “shi a hkum hkrang” ngu ai “nba grang hpe lai di” nna, sumsing asak aprat de n hkrung rawt shi yang, Yehowa a wenyi nawku htingnu hta Hkinjawng Agyi hku nna aya tang hkrum ngut chyalu rai ra ai. (Heb 10:20, JCLB) Dai majaw, kasa Pawlu gaw Yesu hpe ‘lata hte n gap tawn ai . . . grau kaba nna, hkum tsup ai naw ku sum’ re ai ‘sumsing lamu de’ lung mat ai “hkinjawng agyi” hku nna tsun da ai re.​—Heb 9:11, 24.

Sumsing lamu de Yesu lung mat nna hkum tsup ai asak hpe anhte a matu sak jaw ai shaloi, ga shaka nnan hpe shagrin ya ai lamang hpang wa ai. Dai lamang hta hpa lam ni lawm ai kun?

Langai, Yehowa a man de Yesu shang ai. Lahkawng, Yesu a gawng malai hkungga hpe Yehowa hpang ap ya ai. Masum, Yesu a manu dan ai asai hpe Yehowa hkap la ai. Dai lam 3 galaw ngut yang she, ga shaka nnan grin wa na re.

Yesu a gawng malai hkungga hpe galoi aten hta Yehowa hkap la ai hpe gaw Chyum Laika hta tup hkrak n tsun da ai. Dai majaw, ga shaka nnan hpe galoi aten hta shagrin ya wa ai hpe anhte tup hkrak n lu tsun ai. Raitim, Pentekoti Poi garai n du shi ai 10 ya hta, sumsing lamu de Yesu lung mat ai hpe gaw anhte chye ai. (Kas 1:3) Dai aten kadun laman hta, Yesu gaw shi a manu dan ai gawng malai hkungga hpe Yehowa hpang ap ya ai. Yehowa mung hkap la ai. (Heb 9:12) Pentekoti Poi hta byin wa ai laklai ai mabyin gaw ga shaka nnan akyu byin hpang wa sai hpe sakse madun nga ai. (Kas 2:1-4, 32, 33) Ga shaka nnan grin wa nna, akyu byin hpang wa ai gaw dan dawng nga ai.

Kadun dawk hku nga yang, Yesu a manu dan ai sai hpe Yehowa hkap la ngut ai hpang, namman chya hkam ai ni ga shaka nnan hta lawm wa ai hpang, dai ga shaka nnan grin wa ai. Htingrai Htingrat Ya Ai Wa re ai Hkinjawng Agyi Yesu hku nna, ga shaka nnan gaw akyu byin hpang wa ai.​—Heb 7:25; 8:1-3, 6; 9:13-15.