2018, January 24, bat masum ya jahpawt hta, Yehowa Sakse ni a uphkang hpung kaw, hpunau Kenneth Cook, Jr. gaw uphkang hpung shang nnan hku nna lawm wa sai lam shana ai hpe na lu ai majaw, Amerikan hte Kaneda kaw na Behtela nta masha ni grai kabu ma ai.

Hpunau Cook gaw Pennsylvania, U.S.A. hta shangai wa nna, dai kaw sha kaba wa ai. Shi gaw lahta tsang jawng ngut na aten hta, shi a jawng manang kaw nna teng man ai lam hpe sharin la wa ai. 1980, June 7 hta, hkalup hkam la wa ai. 1982, September 1 hta, aten galu ningshawng hku nna aten hpring magam hpe gun hpai wa ai. Ningshawng galaw nna lahkawng ning na ai hpang, Behtela kaw magam gun na matu saw shaga hkrum ai. Shi a Behtela magam shaning gaw 1984, October 12 hta hpang ai.

Dai hpang shaning 25 ning laman, Hpunau Cook gaw, Laika Dip Shapraw Dap hte Behtela Rung hta magam lit amyu myu hpe gun hpai wa ai. 1996 hta Jamie hte hkungran la nna, Wallkill Behtela kaw sha rau magam gun hpai wa ai. 2009, December hta, shan gaw Patterson, New York hta nga ai Sin Langchyi Hpaji Jaw Dap de htawt ai. Dai hta, Hpunau wa gaw, Laika La Laika Sa Dap hta lit ang ai. Dai hpang Wallkill de chyahkring bai wa nna 2016 April hta, shan gaw Brooklyn, New York de bai htawt ai. Shata manga na ai hpang, shan gaw ginjaw rung re ai Warwick, New York de bai htawt ai. 2017, January hta, Hpunau Cook gaw, Uphkang Hpung a Laika Lajang Komiti a karum ya ai wa hku nna aya tang hkrum ai.