1-2. Yehowa gaw shi a nta masha byin na matu hpa majaw lam hpaw ya wa ai kun? Gara hku nna kun?

YEHOWA gaw shi hpe nawku ai nta masha ni byin wa na matu, anhte hpe saw shaga da ai. Dai gaw mauhpa saw shaga lam re. Anhte a dinghku hta, Karai Kasang kaw apnawng da ai masha ni hte shi Kasha a gawng malai hkungga hpe kamsham ai lam madun ai ni lawm ai. Anhte a dinghku gaw grai ngwi pyaw ai. Ya aten hta mung lachyum nga ai aprat hpe lu la nna, htawm hpang hta mung sumsing lamu kaw (sh) mungkan Hparadisu kaw n htum n wai asak lu la na hpe myit mada mai ai.

² Yehowa gaw grai sak jaw ra tim, anhte hpe tsawra ai majaw, shi a nta masha byin wa na matu lam hpaw ya ai. (Yhn 3:16) Anhte hpe ‘jahpu manu daw nna mari da ai.’ (1 Ko 6:20) Gawng malai hkungga a majaw sha, Yehowa hte anhte hku hkau wa ai re. Ninggawn tawa hta grau htum ai wa hpe Wa ngu nna anhte shaga lu ai. Shawng na sumhpa hta hkaja wa sai hte maren, Yehowa gaw kaja htum Kawa re.

3. Anhte gara ga san ni san chye ai kun? (“ Yehowa Ngai Hpe Sadi Hkrup Ai Kun?” ngu ai lawk hpe yu u.)

³ Chyum Laika ka ai marai langai zawn, anhte mung ndai hku san chye ai: “Yehowa ngai hpe jaw ai chyeju nlang hte hpe, Ngai kaning di dang wa lu na rai nga a ta?” (Shk 116:12) Sumsing Kawa a chyeju hpe anhte galoi mung dang wa lu na gaw n re. Raitim, shi hpe anhte bai tsawra lu ai. Kasa Yawhan ndai hku ka wa ai: “Shi gaw shawng nnan e anhte hpe tsaw ra mi ai majaw, anhte mung, tsaw ra nga ga ai.” (1 Yh 4:19) Gara lam ni hku nna sumsing Kawa hpe tsawra ai lam madun mai ai kun?

4. Yaku 4:8 hku nga yang Yehowa hte ni htep na matu hpa majaw shakut ra ai kun?

⁴ Yehowa gaw anhte hpe shi hte ni htep shangun mayu nna,  matut mahkai lam nga shangun mayu ai. (Yaku 4:8 hpe hti u.) Anhte hpe “akyu hpyi ai hta htep lahti” rai nga na matu n-gun jaw da nna, anhte hpyi ai ga hpe galoi mung madat ya ai. (Rom 12:12) Akyu hpyi ga hpe n madat ya lu hkra amu kyin ai (sh) ba ai lam n nga ai. Chyum Laika hte Chyum Laika hpe grau chye na hkra karum ya ai laili laika ni hpe hti ai gaw shi a ga hpe madat ai re. Hkristan zuphpawng ni hta atsawm myit maju jung ai mung shi a nsen hpe madat ai re. Ma ni gaw kanu kawa ni hte ni htep na matu ayan matut mahkai ra ai zawn, anhte mung Yehowa hte ni htep na matu ayan matut mahkai ra ai.

5. Anhte a akyu hpyi ai atsam rawt jat hkra gara hku galaw mai ai kun?

⁵ Karai Kasang hte matut mahkai ai hte seng ai lam hpe myit yu u. Yehowa gaw myit masin mahkra hte akyu hpyi ai hpe ra sharawng ai. (Shk 62:8) Ndai ga san ni hpe tinang hkum tinang san ging ai: ‘Nye a akyu hpyi ga gaw ntsa lam sha rai kun? Dai ga ni hpe sha kahtap nna bai tsun ai kun? (sh) Myit masin mahkra hte kun?’ Nang gaw Yehowa hpe grai tsawra nna shi hte hku hkau lam matut kaja mayu na re. Rai yang, shi hte ayan matut mahkai lam galaw ra ai. Shi hpe na a hkamsha lam yawng hpe hpaw tsun dan u. Nang pyaw ai, yawn hkyen ai lam ni hpe tsun dan u. Shi hpe karum hpyi mai ai hpe kam u.

6. Sumsing Kawa hte ni htep na matu anhte hpa galaw ra ai kun?

⁶ Sumsing Kawa hte ni htep hkra nga na matu, anhte hta chyeju dum ai myit nga ra ai. Shakawn kungdawn sara a ndai ga hpe anhte myit hkrum na re: “Nye a Karai Kasang Yehowa e, Anhte a matu nang galaw da ai mauhpa hte hpaji daw ai amu, law la lit dai; Nang hte shadawn yu na gaw n nga ai: Dai ni a lam ngai tsun shana ya mayu yang, Dai ni gaw n dang hti hkra law la nga ai.” (Shk 40:5) Yehowa hpe chyeju dum ai myit nga ai sha n-ga, tsun ai, galaw ai lam ni hku nna tatut madun ra ai. Dai gaw ya aten na masha ni hte n bung ai lam madun ai re. Dai ni na masha law law gaw, anhte a matu Karai Kasang galaw da ya ai lam ni hpe chyeju n chye dum ma ai. Dai gaw, “hpang jahtum na nhtoi ni” hta chyeju n chye dum ai masha ni nga na ngu tsun da ai aten hta, anhte asak hkrung nga ai hpe madun ai lam langai re. (2 Tm 3:1, 2) Anhte dai zawn n byin mayu ai.

7. Yehowa anhte hpe hpa galaw shangun mayu ai kun? Hpa majaw kun?

⁷ Kanu kawa ni gaw ma ni dang rang hkat ai hpe n ra ai sha, hku hkau na hpe ra sharawng ai. Dai zawn sha, Yehowa mung shi a ma ni shada da hku hkau na hpe sha ra sharawng ai. Anhte shada da tsawra ai gaw jet ai Hkristan ni re ai hpe sakse madun nga ai re. (Yhn 13:35) “Yu mu, hpu nau ni myit hkrum nga nna, Rau hpawng nga lu ai gaw, Gade ngwi pyaw nga a hka!” ngu ka wa ai shakawn kungdawn sara a ga hpe anhte myit hkrum ai. (Shk 133:1) Hpunau nauna ni hpe tsawra myit madun ai gaw, Yehowa hpe anhte tsawra ai lam sakse madun nga ai re. (1 Yh 4:20) “Shada da mai kaja ai, matsan dum ai myit madun hkat” ai hpunau nauna ni nga ai dinghku hta nga lu ai gaw grai ngwi pyaw hpa re.​—Ehp 4:32.

8. 1 Yawhan 5:3 hku nga yang Yehowa a ga hpe anhte hpa majaw madat ai kun?

⁸ Ma ni hpe kanu kawa ni a ga madat na matu Yehowa ra sharawng ai zawn, shi a ga hpe mung madat shangun mayu ai. (Ehp 6:1) Shi gaw Hpan Madu rai nna, anhte hpe asak jaw ai wa, kanu kawa yawng hta na hpaji rawng htum ai wa re ai majaw, shi a ga madat ging ai. Madung hku nna, Yehowa hpe tsawra ai majaw shi a ga madat ai re. (1 Yawhan 5:3 hpe hti u.) Yehowa a ga hpe madat ging ai lam law law nga tim, madat na matu atik anang shi n galaw ai. Yehowa gaw anhte hpe wanglu wanglang lata na  ahkang jaw da ai. Dai majaw, shi hpe tsawra nna madat mara na matu lata yang shi grai kabu ai.

9-10. Karai Kasang a tsang madang ni hpe chye na matu hte dai hte maren asak hkrung na matu hpa majaw ahkyak ai kun?

⁹ Kanu kawa ni gaw ma ni hpe shim lum shangun mayu ai. Dai majaw, ma ni akyu lu na matu, akyang lailen hte seng ai tsang madang ni hpe jahkrat ya ai re. Dai lam matsun hpe ma ni hkan sa ai gaw, kanu kawa ni hpe kamhpa nna hkungga ai lam madun ai re. Dai majaw, anhte gaw sumsing Kawa a tsang madang ni hpe chye nna, dai hte maren asak hkrung na matu grai ahkyak ai. Yehowa hpe tsawra nna hkungga ai lam madun yang, anhte nan mung akyu hkamsha lu na re. (Esa 48:17, 18) Raitim, Yehowa hte shi a tsang madang ni hpe nyet kau ai ni gaw, tinang hkum tinang hkra machyi hkra galaw ai re.​—Gal 6:7, 8.

¹⁰ Yehowa ra sharawng ai hku asak hkrung yang, anhte gaw myit masin, hkum hkrang hte wenyi lam hkra machyi ai kaw nna makawp maga hkrum na re. Gara gaw anhte a matu kaja htum re ai hpe Yehowa chye ai. Amerikan mungdan na nauna Awrora ndai hku tsun ai: “Yehowa hpe madat mara ai prat gaw kaja htum prat re ai hpe ngai chye ai.” Dai ga gaw yawng a matu teng ai. Yehowa a tsawra myit rawng ai lam matsun hpe hkan sa ai kaw nna akyu lu ga ai kun?

11. Akyu hpyi ai gaw anhte hpe gara hku karum ya ai kun?

¹¹ Madat na matu yak tim pyi, madat lu hkra akyu hpyi ai gaw karum ya lu ai. Kalang lang, Yehowa a ga madat na matu yak chye ai. Raitim, mara galaw mayu ai myit hpe anhte ninghkap ra ai. Shakawn kungdawn sara gaw  Karai Kasang hpe ndai hku hpyi shawn wa ai: “Nang hpe madat mara mayu ai myit ngai hta bang ya e.” (Shk 51:12, JCLB) Aten galu ningshawng nauna Deni ndai hku tsun ai: “Yehowa a matsun ga langai hpe hkan sa na matu yak wa yang, jaw ai hpe galaw lu ai atsam nga hkra akyu hpyi ai.” Dai zawn akyu hpyi ga ni hpe Yehowa teng sha mahtai jaw na hpe anhte kam mai ai.​—Luk 11:9-13.

12. Ehpesu 5:1 hku nga yang anhte hpa galaw ging ai kun?

¹² Ehpesu 5:1 hpe hti u. * Anhte gaw Yehowa “tsawra ai kashu kasha ni” re ai majaw, shi hpe kaja htum kasi la ai. Kaga ni hpe mara raw ya ai, tsawra matsan dum myit madun ai hku nna, shi a atsam ningja ni hpe kasi la ai. Karai Kasang hpe n chye ai ni gaw anhte a kaja ai arawn alai hpe mu nna, shi a lam sharin la mayu ai myit nga wa chye ai. (1 Pe 2:12) Hkristan kanu kawa ni gaw, Yehowa anhte hpe kanawn mazum ai lam hte maren, tinang a ma ni hpe kanawn mazum ging ai. Dai hku galaw yang, ma ni gaw tsawra myit nga ai Kawa hte shanhte nan hku hkau mayu wa na re.

13. Nden marai nga wa hkra hpa galaw ging ai kun?

¹³ Ma kasha gaw shi kawa hpe arawng la nna, kawa a lam tsun mayu ai. Dai hte maren, sumsing Kawa Yehowa hpe anhte arawng la nna, kaga ni hpe shi a lam chye shangun mayu ai. “Nye a myit masin Yehowa hta gumrawng na ra ai” ngu tsun wa ai Hkawhkam Dawi zawn, anhte  mung hkamsha ai. (Shk 34:2) Anhte dai zawn tsun na matu kaya ai nga yang gara hku kun? Nden marai nga wa hkra gara hku galaw na kun? Yehowa myit pyaw hkra gara hku galaw na, kaga ni shi a lam sharin la yang gara hku akyu lu la na hpe myit maju jung yang, nden marai nga wa na re. Anhte ra nga ai nden marai hpe Yehowa jaw na re. Tsa ban langai na hpunau ni hpe nden marai nga wa hkra shi karum ya wa ai zawn, anhte hpe mung karum ya na re.​—1 Ht 2:2.

14. Sape shatai ai bungli gaw grai ahkyak ai hpe madun ai lam nkau gaw hpa rai kun?

¹⁴ Yehowa gaw myi man n lata ai. Anhte gaw kaga ni a shingdu labau gara hku mi raitim, tsawra myit madun ai hpe mu ai shaloi shi grai kabu ai. (Kas 10:34, 35) Kaga ni hpe tsawra myit madun mai ai kaja htum lam langai gaw, shanhte hpe kabu gara shiga tsun dan ai hku nna re. (Mat 28:19, 20) Dai bungli gaw hpa hpe ngut kre shangun lu ai kun? Anhte a shiga hpe madat ai ni gaw ya aten hta shanhte a prat rawt jat wa nna, htawm hpang hta htani htana asak lu na matu mung myit mada lam nga wa ai.​—1 Tm 4:16.

15-16. Gara lam ni gaw anhte hpe kabu gara shangun ai kun?

¹⁵ Yehowa gaw tsawra myit nga ai kawa re ai majaw, shi a nta masha ni hpe ngwi pyaw shangun mayu ai. (Esa 65:14) Anhte hta yakhkak ai lam ni nga tim, ya aten hta kabu gara lu ai lam law law nga ai. Ga shadawn, sumsing Kawa gaw anhte hpe grai tsawra ai lam kam mai ai. Anhte hta Chyum Laika hte seng ai tengman ai machye machyang nga ai. (Yer 15:16) Yehowa hte shi a tsang madang ni hpe tsawra nna, shada da tsawra ai masha ni hte hpawng de da ai laklai ai dinghku hta, nta masha byin lu ai.​—Shk 106:4, 5.

¹⁶ Htawm hpang hta grau kaja ai asak aprat lu la na ngu ai jet ai myit mada lam anhte hta nga ai majaw, matut nna kabu gara lu ai. Kade n na yang, Yehowa gaw nhkru ai lam yawng hpe yeng seng kau nna, ginding aga hpe Hparadisu bai byin wa hkra, shi a Mungdan hku nna galaw ya na hpe anhte chye ai. Si mat ai ni bai hkrung rawt wa nna, shanhte tsawra ai ni hte bai hkrum zup lu na ngu ai mauhpa myit mada lam mung anhte hta nga ai. (Yhn 5:28, 29) Dai gaw grai kabu hpa re. Ahkyak htum gaw, kade n na yang sumsing lamu hte ginding aga hta nga ai ni gaw, tsawra myit nga ai Kawa hpe shagrau lu nna, shi lu ging ai nawku daw jau lam hpe anhte jaw lu sana re.