1. Karai a masha law law gaw gara sak jaw ai lam ni galaw ma ai kun? Shanhte hpa majaw dai hku galaw ai kun?

DAI ni aten na wan hku law ai Karai a masha ni gaw sak jaw ai lam ni galaw ma ai. Hpunau nauna law law gaw dinghku n de na matu lata ma ai. Dinghku de da ai ni mung, ya aten hta ma n la na matu dawdan da ma ai. Dinghku nkau mi mung prat hpe asan sha tawn ma ai. Dai zawn dawdan ai gaw, Yehowa a magam hpe myit maju jung let gun hpai mayu ai majaw re. Shanhte hta myit dik lam nga nna, ra kadawn ai lam ni hpe Yehowa madi shadaw ya na hpe mung kam ai. Shanhte myit daw ma ai kun? N daw ai. Hpa majaw kun? ‘Kamsham ai nlang hte a kawa’ re ai Abraham hpe Yehowa shaman chyeju jaw wa ai hpe chye ai majaw re.​—Rom 4:11.

2. (a) Hebre11:8-10, 16 hku nga yang Abraham gaw Ura mare hpe sharawng awng let hpa majaw kau da wa ai kun? (b) Ndai sumhpa hta hpa lam hkaja na kun?

² Abraham gaw Ura mare hta nga ai shi a ngamu ngamai ai prat hpe sharawng awng let kau da wa ai. Hpa majaw kun? “Npawt nhpang grin nga ai” mare hpe la nga ai majaw re. (Hebre 11:8-10, 16 hpe hti u.) Dai “mare” gaw hpa rai kun? Dai mare gawgap na aten hpe la nga ai laman, Abraham gaw hpa mayak mahkak ni hkrum wa ai kun? Abraham hte anhte gara hku bung lu ai kun? Dai ni aten hta shi a kasi ningli hpe kadai ni hkan sa nga ai kun?

3. Abraham la nga ai mare gaw hpa rai kun?

³ Abraham la nga ai mare gaw Karai Kasang A Mungdan re. Dai Mungdan hpe Yesu Hkristu hte namman chya hkam ai Hkristan 144,000 hte gawgap da ai. Pawlu gaw dai mungdan hpe “Karai Kasang a mare ngu ai sumsing lamu na Yerusalem mare” ngu tsun da ai. (Heb 12:22; Shr 5:8-10; 14:1) Dai mungdan  du wa na matu, Yesu gaw sape ni hpe akyu hpyi shangun ai. Rai yang she, Karai a myit ra ai lam gaw sumsing lamu hte ginding aga hta dik wa na re.​—Mat 6:10.

4. Ningpawt 17:1, 2, 6 hku nga yang Karai a ga sadi re ai Mungdan hpe Abraham kade daram chye ai kun?

⁴ Karai a Mungdan gawgap na hte seng nna ahkri ahkrai lam ni hpe Abraham chye wa ai kun? N chye ai. Tsa ban shaning law law hta, dai lam gaw “sung htum ai lam” rai nga ai. (Ehp 1:8-10; Kol 1:25, 27) Raitim, Abraham gaw shi a aru arat nkau kaw nna, hkawhkam ni yu hkrat wa na hpe gaw chye ai. Yehowa gaw shi hpe dai ga sadi tup hkrak jaw da ai majaw re. (Ningpawt 17:1, 2, 6 hpe hti u.) Karai a ga sadi ntsa tawn ai Abraham a makam masham gaw grai ngang kang ai. Karai Mungdan a Hkawhkam byin wa na Meshia (sh) Namman Chya Hkam Ai Wa hpe mu lu ai zawn nan kam wa ai. Dai majaw, Yesu gaw shi a aten na Yuda masha ni hpe ndai hku lu tsun ai: “Nanhte a kawa Abraham gaw, ngai du sa wa na nhtoi hpe mu lu na rai nna sharawng awng nga ai, dai nhtoi hpe mu lu ai shaloi mung kabu gara nga ai.” (Yhn 8:56, JCLB) Shi a aru arat ni gaw, Yehowa gawgap na mungdan hta lawm lu na hpe Abraham chye ai. Dai majaw, Yehowa a ga sadi ni hpring tsup wa na aten hpe sharawng awng let la nga ai re.

5. Karai Kasang gawgap da ai mare hpe Abraham la nga ai lam gara hku chye lu ai kun?

⁵ Karai Kasang gawgap na Mungdan (sh) mare hpe la nga ai lam Abraham gara hku madun wa ai kun? Abraham gaw ginding aga na gara mungdan a mung masha hku nna mung n hkam la wa ai. Shi gaw shara mi kaw sha shanu nna n nga ai sha, kawan nna nga hkawm ai. Gara shinggyim hkawhkam hpe mung madi shadaw ai lam n nga ai. Shi nan mungdan lu na matu mung n shakut ai. De a malai, Yehowa a ga sadi ni hpring tsup wa na hpe la nga nna, matut madat mara wa ai. Dai hku nna Abraham gaw, Yehowa hpe laklai ai makam masham madun wa ai. Shi hkrum wa ai chyam dinglik ai lam nkau hte shi a kasi ningli kaw nna anhte sharin lu ai lam hpe yu yu ga.

6. Ura gaw gara zawn mare rai kun?

⁶ Abraham kau da wa ai mare gaw, shim lum ai, prat dep ai, ngamu ngamai ai shara re. Dai mare a grup-yin hpe bunghku hte shinggrup da nna, bunghku a shinggan man 3 hpe gaw  hka hkawng hte makawp maga da ai. Ura mare masha ni gaw laika ka ai hpaji hte sawnhpan hpaji hta grai ram ai. Dai mare gaw hpaga yun-ga galaw ai madung shara byin wa na masa nga ai. Dai mare hta hpaga galaw wa ai hte seng ai madi madun lam ni hpe mu tam wa ai. Nta ni hpe wut hte grai hkik hkam hkra gap da nna, tsi ahpraw chya nna shatsawm da ai. Nta nkau mi hta gawk 13, 14 daram lawm nna, wang ting hpe nlung pa hte nep da ai.

7. Abraham gaw shi hte shi a dinghku hpe Yehowa makawp maga ya na ngu hpa majaw kam ra ai kun?

⁷ Abraham gaw shi hte shi a dinghku hpe Yehowa makawp maga ya na lam kam ra ai. Hpa majaw kun? Abraham yan Sara gaw grai shim lum ai, nga pyaw ai Ura mare na nta hpe kau da nna, Hkanan mung a layang ga hkan e sum ni gap nna nga ra na majaw re. Shi hte shi a dinghku hpe makawp maga ya na matu, mare bunghku ni hte hka hkawng ni mung n nga sai. Ya gaw shanhte hpe aloi sha sa gasat lu ai.

8. Kalang mi hta Abraham gara lam hte hkrum wa ai kun?

⁸ Abraham gaw Karai a myit ra ai lam hpe galaw wa ai. Raitim, kalang mi hta, shi a dinghku hpe malu masha madi shadaw ya na matu yak wa ai. Yehowa sa shangun ai mungdan hta lusha hku hku wa ai. Grai sawng wa ai majaw, Egutu mung de chyahkring mi htawt nga na matu dawdan ai. Dai shaloi, Hpara-u gaw shi a madu jan hpe woi la kau ai. Shi hpang de Sara bai wa lu na matu, Hpara-u hpe Yehowa shadut ya ai aten du hkra, shi kade daram myit tsang nga na hpe myit yu mai ai.​—Nin 12:10-19.

9. Abraham a dinghku hta hpa mayak mahkak ni hkrum wa ai kun?

⁹ Abraham a dinghku prat gaw grai yak wa ai. Shi tsawra ai madu jan Sara gaw ma n lu ai. De a majaw, shaning law law myit n pyaw wa ai. Hpang hta, shan yan a matu ma shangai ya lu hkra, Sara gaw mayam num Hagara hpe Abraham kaw ap ya ai. Raitim, Hagara gaw Ishmaela hpe gun wa ai shaloi Sara hpe n-gawn n sawn galaw wa ai. Masa grai sawng wa ai majaw, Sara gaw Hagara hpe nta kaw nna gawt shapraw kau ai.​—Nin 16:1-6.

10. Ishmaela hte Isak a mabyin hta Abraham a makam masham gara hku chyam dinglik hkrum wa ai kun?

¹⁰ Hpang de, Sara gaw ma hkum kap wa nna, Abraham a matu Isak hpe shangai ya ai. Abraham gaw shi a kasha Ishmaela hte Isak lahkawng yan hpe tsawra ai. Ishmaela gaw Isak hpe n hkru ai hku kanawn mazum ai majaw, Abraham gaw Ishmaela hte Hagara hpe tsan tsan de sa kau ai. (Nin 21:9-14) Shaning ni na mat ai hpang Isak hpe shagu hkungga hku nna sak jaw na matu, Abraham hpe Yehowa hpyi shawn ai. (Nin 22:1, 2; Heb 11:17-19) Ndai mabyin lahkawng yan hta Abraham gaw, shi a kasha yan hte seng ai Yehowa a ga sadi ni hpring tsup wa na hpe kam ai.

11. Abraham gaw Yehowa hpe hpa majaw myit galu let la wa ai kun?

¹¹ Dai aten ni laman Abraham gaw Yehowa hpe myit galu let la wa ai. Ura mare kaw nna pru wa ai shaloi asak 70 jan na sai. (Nin 11:31–12:4) Hkanan mung ting kawan nna, sum ni hta nga hkawm ai gaw shaning latsa daram re. Abraham gaw asak 175 hta si mat wa ai. (Nin 25:7) Shi kawan hkawm ai mungdan hpe, shi a aru arat ni hpe jaw na ngu ai Yehowa a ga sadi hpring tsup wa ai hpe gaw n mu wa ai. Dai mare ngu ai Karai A Mungdan gawgap ai aten hpe mu lu na daram mung asak n galu ai. Dai pyi Abraham hpe “myit dik ai aprat hte asak galu” nna si mat ai ngu tsun da ai. (Nin 25:8, NW) Abraham gaw mayak mahkak ni hkrum tim, makam masham matut ngang kang nna Yehowa hpe sharawng awng let la wa ai. Shi hpa majaw hkam jan lu wa ai kun? Abraham a prat ting hta, Yehowa gaw shi hpe makawp maga ya nna manang langai zawn, kanawn mazum  wa ai majaw re.​—Nin 15:1; Esa 41:8; Yak 2:22, 23.

12. Anhte hpa hpe la nga ai kun? Hpa lam hpe bawngban na kun?

¹² Abraham zawn, anhte mung npawt nhpang grin nga ai mare hpe la nga ai. Raitim, gawgap ai aten hpe gaw anhte n la ra sai. Karai A Mungdan hpe 1914 hta gawgap ngut nna, sumsing lamu hpe tsep kawp hkang da ngut sai. (Shr 12:7-10) Raitim, mungkan ga hpe tsep kawp hkang wa na aten hpe gaw anhte naw la nga ai. Dai aten hpe la nga ai laman, anhte mung Abraham yan Sara zawn yakhkak ai masa law law hpe hkam jan ra na re. Dai ni aten na Yehowa a mayam ni gaw Abraham a kasi hpe hkan sa nga ai kun? Sin Langchyi hta lawm ai prat labau ni hpe yu yang, Abraham yan Sara zawn makam masham hte myit galu ai lam nga ai hpe chye lu ai. Dai labau ni kaw nna anhte hpa sharin la lu ai hpe bawngban yu ga.

13. Hpunau Wawden a mahkrum madup kaw nna hpa sharin la lu ai kun?

¹³ Sharawng awng let sak jaw u. Mungdan hpe shawng tawn mayu yang, Karai a myit ra ai lam hpe sharawng awng let sak jaw wa ai Abraham zawn galaw ra na re. (Mat 6:33; Mrk 10:28-30) Hpunau Bi Wawden * a mabyin hpe myit yu ga. 1942 hta Bi gaw Chyum Laika hkaja hpang ai shaloi, Amerikan dakkasu kaw nna gawgap hpaji janmau gup na mahka re. Dakkasu sara gaw janmau gup ngut jang, shi hpe bungli jaw na matu lajang da ai. Raitim, shi nyet kau ai. Shang gumhpraw kaja ai bungli hpe hkap la na malai, Karai a magam hpe aten hpring galaw na matu, dawdan da ai lam sara hpe tsun dan ai. Kade n na ai hpang, hpyen magam gun na matu shaga la hkrum ai. Hkungga let n dang kau ai. Raitim, dawla 10,000 dam jahkrat hkrum nna, 5 ning htawng hkrat mat ai. 3 ning na ai hpang, shi bai pru wa ai. Dai hpang, shi gaw Gilat Jawng lung na matu saw shaga hkrum nna, Ahprika hta sasana magam gun ai. Eba hte hkungran la nna, sak jaw ai lam ni galaw ra ai Ahprika kaw shan magam gun wa ai. Shaning na na magam gun ngut ai hpang, Bi a kanu hpe yu lajang na matu, Amerika de bai wa ai. Shi a prat hpe bai  myit yu nna ndai hku tsun ai: “Yehowa hpe shaning 70 jan nawku daw jau lu ai ahkaw ahkang hpe bai myit dat shagu, grai kabu nna myi pri si pyi hkrat ai. Shi a magam hpe shawng tawn lu hkra lam madun ya ai majaw mung grai chyeju dum ai.” Nang mung Yehowa a magam hpe aten hpring galaw lu na kun?

14-15. Hpunau yan nauna Apostolidit a mahkrum madup kaw nna hpa sharin la lu ai kun?

¹⁴ Prat hta manghkang n nga na ngu hkum myit mada. Karai a magam hta prat tup apnawng da ai ni pyi, mayak mahkak ni hkrum chye ai hpe Abraham a mahkrum madup kaw nna chye lu ai. (Yak 1:2; 1 Pe 5:9) Aristotelit Apostolidit * a mahkrum madup hpe yu yu ga. Shi gaw Grik hta 1946 kaw hkalup hkam wa ai. Bandung bung ai nauna Eleni hte 1952 hta mahtan ai. Raitim, Eleni gaw grai machyi wa nna, bawnu mawng ana nga ai hpe chye dat ai. Dai shan tarum hpe ga shaw kau ngut ai hpang hkungran la ai. Shaning loi mi na ai hpang, dai shan tarum gaw bai tu wa nna, bai ga shaw kau ra ai. Raitim, Eleni gaw hkum chyen mi si mat nna, ga mung atsawm n lu shaga mat sai. Dai aten hta asuya ni a zingri zingrat ai lam ni nga taw nna, shi nan mung machyi nga tim myit rawt ai hkaw tsun masha matut byin nga ai.

¹⁵ Hpunau Aristotelit gaw madu jan hpe shaning 30 daram yu lajang wa ai. Dai aten laman, myitsu salang, ginwang zuphpawng komiti hte Zuphpawng Kaba Htingnu gawgap ai lamang hta karum ya ai. 1987 hta, Eleni gaw hkaw tsun nga ai shaloi, n myit mada ai sha hkra machyi ai lam langai byin wa ai. Shi gaw 3 ning malap mat nna, dai hpang si mat ai. Aristotelit gaw ndai hku tsun dan ai: “Mayak mahkak ni, chyam dinglik ai lam ni hte n myit mada da ai lam ni hkrum wa ai majaw, grai shakut shaja nna galaw ra wa ai. Raitim, dai mayak mahkak ni hpe tawt lai lu na matu, ra nga ai n-gun atsam hpe Yehowa galoi shagu jaw ai.” (Shk 94:18, 19) Mayak mahkak ni hkrum tim, dang lu ai daram sak jaw nga ai mayam ni hpe Yehowa grai tsawra ai.

16. Hpunau Naw gaw madu jan hpe gara hku n-gun jaw wa ai kun?

¹⁶ Htawm hpang myit mada lam hpe myit maju jung u. Abraham gaw Yehowa jaw na  htawm hpang shaman chyeju ni hpe myit maju jung ai majaw, mayak mahkak ni hpe tawt lai lu ai. Nauna . . Awdre Hai a shawng na madu wa Netan Naw gaw, mawng ana hte si mat nna, nambat lahkawng madu wa Glen Hai mung Ezaima ana byin wa ai. Raitim, shi gaw kaja ai ningmu matut nga na matu shakut wa ai. * Hpunau Naw garai n si shi ai bat loi mi daram hta tsun wa ai ga ni a majaw, shi hkamjan lu wa ai. Nauna ndai hku tsun dan ai: “‘Anhte a myit mada lam gaw teng sha byin wa na re. Si mat ai hpang, machyi ai lam ni mung nga sana n re’ ngu nna Netan ngai hpe shadum ai.” Shi ndai hku mung n-gun jaw ai: “Na a shaman chyeju ni hpe myit maju jung u. Kaga ni a matu lama ma karum ya lu hkra shakut nga u. Dai gaw nang hpe ngwi pyaw shangun na re.” Ndai hpaji jaw ga gaw kaga ni a matu kaja ai lam hpe galaw ya lu nna, “myit mada let kabu gara nga” na matu karum ya ai.​—Rom 12:12.

17. (a) Htawm hpang myit mada lam hpe myit maju jung na matu anhte hta gara lam ni nga ai kun? (b) Mihka 7:7 hpe hkan sa ai gaw htawm hpang shaman chyeju lu na matu anhte hpe gara hku karum ya ai kun?

¹⁷ Dai ni aten hta, htawm hpang hpe myit maju jung ging ai lam law law nga ai. Hpang jahtum nhtoi na jahtum daw hta anhte asak hkrung nga ai hpe mungkan a mabyin masa ni gaw madun nga ai. Mungkan ga hpe tsep kawp hkang lu sana npawt nhpang grin ai mare hpe anhte aten na na la ra sana n re. Dai shaman chyeju ni kaw nna langai gaw, si mat ai anhte a tsawra ai ni hte bai hkrum zup lu na lam re. Dai aten hta, Yehowa gaw Abraham hte shi a nta masha ni hpe asak bai jahkrung ya ai hku nna, shi a makam masham hte myit galu ai lam a matu shaman chyeju jaw na re. Shanhte hpe nang hkap tau la lu na kun? Abraham zawn Karai Mungdan a matu sharawng awng let sak jaw na, manghkang ni nga tim makam masham hpe matut madun na, Yehowa hpe myit galu let la na matu sharin la na nga yang, hkap tau lu na re.​—Mihka 7:7 hpe hti u.