Yehowa a ra sharawng ai lam lu mayu yang, makam masham nga ra ai. Raitim, “masha shagu wa makam masham rawng nga ai n rai” ngu Chyum Laika hta tsun da ai. (2 Ht 3:2) Shi hpe hkan zingri nga ai grai nhkru ai masha ni hte seng nna Pawlu tsun nga ai re. Raitim, makam masham hte seng nna Pawlu tsun dat ai ga gaw grai dam lada ai. Masha nkau gaw, Hpan Madu nga ai hpe n kam ai. (Rom 1:20) Nkau gaw, grau atsam kaba ai ngu shanhte sawn la ai arai (sh) masha hpe kamsham ai ngu tsun ma ai. Raitim, Yehowa a ra sharawng ai lam hpe lu shangun ai makam masham gaw, dai zawn makam masham n re.

Yehowa Karai Kasang gaja wa nga ai lam, ngang kang ai makam masham nga ai ni hpe shi kumhpa jaw ai ngu ai hpe anhte kam ra ai. (Heb 11:6) Makam masham gaw, chyoi pra ai wenyi a majaw byin wa ai atsam ningja re. Dai majaw, chyoi pra ai wenyi lu na matu, Yehowa kaw akyu hpyi ra ai. (Luk 11:9, 10, 13) Chyoi pra ai wenyi lu mai ai kaga lam langai gaw, chyoi pra ai wenyi a lam matsun hte ka da ai Chyum Laika hpe hti ai re. Hti ai hpe myit sawn sumru ra ai. Tatut hkan sa ra ai. Rai yang, Karai a ra sharawng ai lam hpe lu shangun ai makam masham hte maren asak hkrung lu hkra, chyoi pra ai wenyi gaw karum ya na re.