1. Sadi dung ai masha ni gaw Yehowa hte gara zawn hku hkau lam nga lu ai kun?

YEHOWA a dinghku hta, “hpan da ai arai yawng mayawng hta alat” re ai Yesu, lamu kasa ni hte hpawn shi hpe nawku dawjau ai ni yawng lawm ai. (Kol 1:15; Shk 103:20) Yehowa hpe Kawa hku nna shinggyim masha ni sawn la mai ai hpe Yesu mungkan ga hta nga ai shaloi sharin ya wa ai. Sape ni hte ga shaga ai aten hta, Yehowa hpe “nye a Wa hte nanhte a Kawa” ngu nna shaga wa ai. (Yhn 20:17) Yehowa hpang, apnawng nna hkalup hkam ai aten hta, anhte gaw tsawra myit nga ai hpunau nauna ni a nta masha byin wa ai.​—Mrk 10:29, 30.

2. Ndai sumhpa hta hpa lam hkaja lu na kun?

² Nkau mi gaw Yehowa hpe tsawra myit nga ai Kawa hku nna mu na matu yak ai. Nkau mi mung, hpunau nauna ni hpe tsawra myit gara hku madun na hpe n chye ma ai. Ndai sumhpa hta, Yehowa hpe tsawra myit nga ai Kawa hku nna mu wa hkra, Yesu gara hku karum ya wa ai hpe hkaja lu na re. Hpunau nauna ni hte kanawn mazum ai shaloi, Yehowa hpe gara hku kasi la mai ai hpe mung hkaja lu na re.

3. Yesu sharin ya ai akyu hpyi ga gaw anhte hpe Yehowa hte gara hku nihtep shangun ai kun?

³ Yehowa gaw tsawra myit nga ai Kawa re. Grai mazut ai wa n re ai sha, aten shagu nihtep lu ai Kawa, tsawra myit nga ai Kawa hku nna Yehowa hpe Yesu mu mada ai. Anhte hpe mung dai zawn mu mada shangun mayu ai. Akyu hpyi na matu sape ni hpe sharin ya ai shaloi, dai lam dan dawng ai. Akyu hpyi ga hpe “anhte a Wa” ngu nna nnan hpang da ai. (Mat 6:9) “Chyahtum chyalai n-gun rawng ai wa,” “Hpan da Madu,”  htani htana Hkawhkam zawn re ai arawng sadang ni hte Yehowa hpe shaga na matu Yesu sharin ya mai ai. (Nin 49:25; Esa 40:28; 1 Tm 1:17) Raitim, “Wa” ngu nna hku hkau let shaga na matu sharin ya ai.

4. Yehowa gaw anhte hte nihtep mayu ai lam gara hku chye lu ai kun?

⁴ Yehowa hpe tsawra myit nga ai Kawa hku nna mu na matu yak nga ai kun? Nga kaba wa ai shingdu labau a majaw, tsawra myit nga ai kawa ngu nna hkap la na matu, nkau mi yak chye ai. Anhte a hkamsha lam hpe Yehowa chye na ya ai gaw kabu hpa re. Karai Kasang gaw anhte hte nihtep mayu ai. Dai majaw, “Karai Kasang hpang de sit sa wa mu; shaloi shi nanhte hpang de sit wa na ra ai” ngu nna Chyum Laika hta n-gun jaw da ai. (Yak 4:8) Anhte hpe Yehowa tsawra ai, kaja htum Kawa byin ya na ngu tsun ai.

5. Luka 10:22 hku nga yang, Yehowa hte nihtep na matu Yesu hpa majaw karum ya lu ai kun?

⁵ Yehowa hte nihtep hkra Yesu karum ya lu ai. Yesu gaw, Yehowa a lam atsawm chye nna, Karai Kasang a atsam ningja ni hpe htep lahti hkan sa ai majaw, “Ngai hpe mu yu ai wa gaw, Wa hpe mu yu nu ai” ngu tsun ai. (Yhn 14:9) Kawa hpe hkungga nna madat mara ai lam gara hku madun na, Kawa a myiman lu na matu, gara hku galaw ra na ngu ai hpe kahpu ba langai zawn, Yesu sharin ya ai. Yehowa kade daram tsawra matsan dum myit nga ai lam hpe mung chye na hkra karum ya ai. (Luka 10:22 hpe hti u.) Ga shadawn nkau hpe bawngban yu ga.

6. Yesu a akyu hpyi ga hpe Yehowa madat ai lam ga shadawn tsun dan u.

⁶ Kasha ni a ga hpe Yehowa madat ai. Kasha alat a ga hpe, gara hku madat ai lam myit yu u. Kasha mungkan ga hta nga ai shaloi, shi a akyu hpyi ga law law hpe Yehowa madat ya ai. (Luk 5:16) Kasa 12 lata ai zawn re ai, ahkyak ai dawdan lam ni a matu, Yesu akyu hpyi ai hpe na ai. (Luk 6:12, 13) Myit ru myit tsang nga ai aten hta akyu hpyi ai hpe mung na ai. Sadi run n hkrum shi ai aten hta mung, shawng hta hkrum ra na chyam dinglik ai lam ni a matu, Kawa kaw Yesu akroi anoi akyu hpyi ai. Yehowa gaw Yesu a akyu hpyi ga hpe  na ai sha n-ga, n-gun jaw na matu, lamu kasa langai hpe dat ya ai.​—Luk 22:41-44.

7. Akyu hpyi ga ni hpe Yehowa madat ai lam chye lu ai majaw gara hku hkamsha ai kun?

⁷ Dai ni aten hta mung, mayam ni a akyu hpyi ga hpe Yehowa madat ya nga ai. Htap htuk ai aten hta, kaja htum lam hku nna mahtai jaw ai. (Shk 116:1, 2) Indiya kaw na nauna langai a lam hpe myit yu u. Hkrum nga ai manghkang ni hte seng nna, Yehowa kaw ja ja akyu hpyi ai. “Myit tsang ai lam ni hpe gara hku tawt lai ra na ngu ai 2019, May shata na JW TV lamang gaw ngai ra nga ai hte hkrak sha re. Akyu hpyi ga ni a mahtai re” ngu shi tsun ai.

8. Yesu hpe Yehowa tsawra ai lam gara lam ni hte madun wa ai kun?

⁸ Yesu ginding aga hta asak hkrung wa ai laman, Yehowa tsawra myit madun nna, lanu lahku wa ai zawn anhte hpe mung, tsawra nna lanu lahku ya ai. (Yhn 5:20) Yesu a wenyi lam, myit masin hte hkum hkrang hta ra nga ai lam yawng hpe madi shadaw ya wa ai. Tsawra ai lam, ra sharawng ai lam hpaw tsun dan ai. (Mat 3:16, 17) Tsawra myit nga ai Kawa hpe galoi shagu kamhpa mai ai lam chye ai majaw, shi hkrai sha re ngu Yesu kalang mung n hkamsha wa ai.​—Yhn 8:16.

9. Anhte hpe Yehowa tsawra ai lam gara madi madun lam ni nga ai kun?

⁹ Yesu zawn, anhte mung Yehowa a tsawra myit hpe lam amyu myu hku nna hkamsha nga ai. Ga shadawn, anhte hpe shi laula da ai. Myit daw nga ai shaloi, anhte hpe n-gun jaw ya lu nna ngwi pyaw lam lu shangun ai wenyi kun dinghku hpe jaw da ai. (Yhn 6:44) Makam masham ngangkang shangun ai Chyum Laika lam ni hpe hkyen lajang da ya ai. Shani shagu ra kadawn ai lam ni hpe madi shadaw ya ai. (Mat 6:31, 32) Yehowa a tsawra myit hpe sumru na nga yang, shi hpe tsawra ai myit rawt jat wa na re.

10. Hpunau nauna ni hpe Yehowa kanawn mazum ai lam kaw na hpa sharin la lu ai kun?

¹⁰ Yehowa gaw hpunau nauna ni hpe tsawra ai. Raitim, anhte gaw shanhte hpe tsawra na matu, tsawra myit madun na matu ayan gaw loi na n re. Htunghking, shingdu labau n bung ai majaw re. Kaga ni hpe myit hkra machyi shangun ai, myit daw shangun ai mara ni anhte yawng galaw hkrup chye ai. Raitim, tsawra myit rawt jat hkra galaw lu ai. Gara hku nna kun? Hpunau nauna ni hpe Karai Kasang madun ai tsawra myit hpe kasi la ai hku nna re. (Ehp 5:1, 2; 1 Yh 4:19) Yehowa a kasi ningli kaw na hpa sharin la lu ai lam hpe yu yu ga.

11. Yehowa a “matsan dum” myit hpe Yesu gara hku kasi la ai kun?

¹¹ Yehowa gaw “matsan dum” myit madun ai. (Luk 1:76) Matsan dum myit nga ai ni gaw, kaga ni yakhkak hkrum ai hpe mu yang, myit n pyaw nna karum ya na matu shakut ai. Yesu gaw shinggyim masha ni hte kanawn mazum ai shaloi, Yehowa a matsan dum myit hpe kasi la ai. (Yhn 5:19) Kalang mi hta, masha hpawng hpe mu ai shaloi, “shi shanhte hpe matsan dum da mu ai: . . . shanhte gaw, sagu rem ai wa n nga ai majaw, ru tsang hkrum ai hte bra mat wa ai sagu hte bung” ai majaw re. (Mat 9:36) Yesu a matsan dum myit gaw hkamsha lam daram sha n re. Machyi ai ni hpe shamai ya ai. “Hki ba la nna lit li gun ai ni” hpe shalan shabran ya ai.​—Mat 11:28-30; 14:14.

12. Matsan dum myit gara hku madun mai ai hpe ga shadawn tsun dan u?

¹² Hpunau nauna ni hpe matsan dum myit n  madun shi yang, shanhte hpa manghkang ni hkrum nga ai hpe myit yu ra ai. Ga shadawn, nauna langai gaw grai machyi sawng nga ai ngu saga. Dai hte seng nna shi kalang mi mung n tsun ga tim, karum ya yang gaw chyeju dum na re. Nta masha ni a ra kadawn nga ai lam ni hpe shi gara hku galaw nga ai kun? Shat shadu ai, nta san seng ai lam ni hpe jawm galaw ya lu na kun? Hpunau langai gaw bungli n lu mat ai ngu saga. Shi n chye ai lam hte, gumhpraw loi mi karum ya ai gaw bungli lu ai du hkra, jut shara mi kaw na madi shadaw ai lam byin shangun na kun?

13-14. Yehowa zawn, gam jaw gam ya ai lam gara hku madun mai ai kun?

¹³ Yehowa gaw n hpaw n-ya jaw ya ai wa re. (Mat 5:45) Yehowa zawn, anhte mung tinang maga hku nna tsawra myit shawng madun ra ai. Hpunau nauna ni karum hpyi wa ai du hkra n la ging ai. Karai Kasang gaw anhte n hpyi ra ai sha, shani shagu jan pru ya ai. Chyeju dum chye ai ni a matu sha n-ga, masha shagu jan a nhtoi kaw na akyu lu la ai. Anhte ra ai lam hpe jahpring shatsup ya ai gaw, Yehowa tsawra myit madun nga ai n re i? Tsawra matsan dum nna, n hpaw n-ya jaw ya ai majaw, Yehowa hpe grai tsawra ai.

¹⁴ Sumsing Kawa hpe kasi la ai hku nna, hpunau nauna law law gaw, tinang maga kaw na shawng, gam jaw gam ya nga ai. Ga shadawn, 2013, Supa Taihpun Haiyan nbung laru a majaw, Hpilipai hta grai htenza mat ai. Hpunau nauna law law gaw, nta ni, arung arai ni sum mat ai. Mungkan ting na hpunau nauna ni gaw, kalang ta karum ya ma ai. Gawgap bungli a matu alu bang ai. Gawgap bungli hta shang lawm ma ai. Dai majaw, laning mi n hpring shi yang, nta 750 daram hpe bai gram, bai gap ya lu wa ai. Kobit-19 kap bra ana byin ai laman hta mung, hpunau nauna ni shada da karum ya ma ai. Kalang ta karum madi shadaw ya ai hku nna tsawra myit madun nga ai.

15-16. Luka 6:36 hku nga yang, sumsing Kawa hpe kasi la mai ai ahkyak htum lam langai gaw hpa rai kun?

¹⁵ Yehowa gaw matsan dum ai, mara raw ya ai. (Luka 6:36 hpe hti u.) Sumsing Kawa a matsan dum myit hpe anhte shani shagu hkamsha nga ai. (Shk 103:10-14) Sape ni n hkum tsup tim, Yesu gaw matsan dum ai,  mara raw ya ai. Anhte mara raw hkrum na matu, asak hpe pyi, sharawng awng let sak jaw wa ai. (1 Yh 2:1, 2) Yehowa hte Yesu a matsan dum myit, mara raw ya ai lam a majaw, shanhte hte grau nihtep wa ai n re i?

¹⁶ Anhte mung sharawng awng let “mara raw” ya na nga yang, hpunau nauna ni hte tsawra myit grau ngangkang wa na re. (Ehp 4:32) Kaga ni hpe mara raw na matu, kalang lang grai yak chye ai majaw, shakut shaja ra ai. “Tsep Kawp Mara Raw Ya U” ngu ai Sin Langchyi sumhpa gaw, nauna langai hpe karum ya wa ai. * “Ndai sumhpa gaw jaw ai ningmu nga na matu, anhte hpe karum ya ai. Kaga ni hpe tsep kawp mara raw ya ai ngu ai gaw, shanhte a shut ai lam hpe hkap la ai (sh) shanhte a shut ai lam gaw tinang hpe n hkra machyi ai ngu sawn la ai n re. Shanhte a shut ai lam a majaw, matut nna masin n pawt ai, tinang a myit hta simsa lam nga hkra shakut ai hpe tsun mayu ai ngu sumhpa hta sanglang da ai” ngu nauna ka wa ai. Hpunau nauna ni hpe mara raw ya ai gaw, shanhte hpe tsawra myit madun ai, Kawa Yehowa hpe kasi la nga ai re.

17. Mahte 5:16 hku nga yang, sumsing Kawa hpe gara hku shagrau lu ai kun?

¹⁷ Tsawra myit nga ai wenyi kun dinghku hta nta masha byin lu ai gaw laksan ahkaw ahkang re. Nawku dawjau ai lam hta masha law law shang lawm wa na matu anhte myit mada ai. Dai majaw, Yehowa a amyu masha (sh) sumsing Kawa Yehowa a sari n jahpoi hkrum hkra, hpa mung n galaw hkrup na matu sadi ga. Anhte a kaja ai akyang lailen a majaw, kabu gara shiga hpe masha ni myit lawm wa hkra ayan shakut nga ga.​—Mahte 5:16 hpe hti u.

18. Nden marai hte sakse hkam lu na matu hpa gaw karum ya lu ai kun?

¹⁸ Sumsing Kawa hpe madat mara mayu ai majaw, anhte kalang lang jahpoi asawng hkrum ai, zingri zingrat pyi hkrum chye ai. Kaga ni hpe makam masham hte seng ai lam tsun na matu, hkrit nga yang hpa galaw na kun? Yehowa hte Kasha kaw karum hpyi  u. Gara hku tsun ra na, hpa tsun ra na ngu ai hpe n tsang na matu, sape ni hpe Yesu htet da ai. “Dai ahkying hta, hpa tsun mai na gaw, nanhte hpe shadum na ma rin dai . . . ga tsun nga ai ni nanhte n rai, nanhte a Kawa a Wenyi gaw nanhte hta ga tsun nga ai” ngu Yesu tsun ai.​—Mat 10:19, 20.

19. Nden marai hte sakse hkam wa ai marai langai a lam hpe tsun dan u. 

¹⁹ Hpunau Rawbat a lam hpe myit yu u. Chyum Laika machye machyang nau n nga shi ai Chyum ga sharin prat hta, Dingda Ahprika kaw na, hpyen tara rung de shaga hkrum ai. Hkristan hpunau nauna ni hpe tsawra ai majaw, lapran nga mayu ai lam nden marai hte sanglang dan ai. Wenyi kun dinghku na shi a shara hpe manu shadan ai. Tara agyi gaw, “nang na hpunau nauna ni gaw kadai ni rai?” ngu nna san ai. N myit mada ai sha, dai zawn san hkrum ai shaloi, dai shani na chyum daw hpe kalang ta myit dum mat ai. “Sumsing lamu hta nga ai nye Wa a myit hku hkan galaw ai ni kadai mung, ngai nau, ngai jan, ngai nu, rai nga ma ai” ngu ai Mahte 12:50 re. Chyum Laika lam sharin hpang ai aten naw raitim, Yehowa a chyoi pra ai wenyi gaw, dai ga san hte kaga ga san ni hpe htai lu na matu, Rawbat hpe karum ya ai. Shi hpe Yehowa grai arawng la nga na re. Yakhkak ai masa ni hta, nden marai hte sakse hkam na matu, Yehowa hpe kamhpa na nga yang, anhte hpe mung shi arawng la nga na re.

20. Hpa galaw na matu dawdan da ging ai kun? (Yawhan 17:11, 15)

²⁰ Kaja htum Kawa hte tsawra myit nga ai hpunau nauna ni hpe anhte lu da ai. Dai shaman chyeju hpe matut manu shadan u. Galoi mung, ahpa atang hkum sawn la. Satan hte shi hpang hkan ai ni gaw, sumsing Kawa a tsawra myit hpe anhte ntsen ai myit nga hkra, kahkyin gumdin lam htenza mat hkra shakut nga ai. Raitim, anhte zinlum nga hkra makawp maga ya na matu, Yesu akyu hpyi ya ai. (Yawhan 17:11, 15 hpe hti u.) Dai akyu hpyi ga hpe Yehowa mahtai jaw ai. Sumsing Kawa a tsawra myit hte madi shadaw ya ai lam hpe ntsen ai myit n nga na matu, Yesu hpe kasi la ga. Yehowa a wenyi kun dinghku hte matut hku hkau nga na matu dawdan da ga.