1. Nang hpe Yehowa hpa galaw ya wa ai kun?

NANG gaw Yehowa Sakse gara hku byin wa ai kun? Kanu kawa ni, bungli manang ni, jawng manang ni, nta langai hpang langai hkaw tsun ai kaw na “kabu gara shi ga” hpe na lu wa ai rai na re. (Mrk 13:10) Dai hpang, marai langai gaw nang hpe aten jaw nna, Chyum Laika sharin ya wa ai rai na re. Yehowa gaw nang hpe tsawra ai lam chye wa ai majaw, shi hpe nang tsawra wa ai. Tengman ai lam de shi laula ai majaw, ya nga yang Yesu Hkristu a sape langai hku nna, htani htana asak hkrung lu ai myit mada lam nga wa sai. (Yhn 6:44) Tengman ai lam sharin ya na matu, marai langai hpe Yehowa shadut ya ai majaw, shi a mayam hku nna hkap la ai majaw, nang chyeju dum na re.

2. Ndai sumhpa hta hpa lam hkaja na kun?

² Anhte tengman ai lam chye wa sai majaw, asak lam hta anhte hte rau hkawm lu hkra kaga ni hpe karum ya lu ai ahkaw ahkang lu da sai. Kaga ni hpe hkaw tsun na matu gaw loi tim, Chyum Laika hkaja na matu saw shaga ai lam hte Chyum Laika sharin ya na matu anhte yak chye ai. Nang dai zawn byin nga ai kun? Rai yang, ndai sumhpa hta lawm ai hpaji jaw ga nkau gaw, nang hpe karum ya lu na re. Sape shatai ai bungli galaw lu na matu shadut ya lu ai lam ni hpe mung hkaja lu na re. Chyum Laika sharin ya na matu, htingnut chye ai lam ni hpe gara hku tawt lai lu ai lam hpe mung hkaja lu na re. Kabu gara shiga hpe hkaw tsun ai ni sha n-ga, sharin ya ai ni hpa majaw byin ra ai hpe shawng hkaja yu ga.

3. Anhte hpa majaw hkaw tsun ai kun?

³ Yesu mungkan ga kaw nga ai shaloi, shi hpang hkan ai ni hpe  lam matsun lahkawng jaw da ai. Langai, Mungdan kabu gara shiga hkaw tsun na matu htet da ai. Gara hku hkaw tsun na hpe mung madun dan ai. (Mat 10:7; Luk 8:1) Dai shiga hpe hkap la ai ni nga ai zawn, n hkap la ai ni mung nga na ngu tau hkrau tsun da ai. (Luk 9:2-5) Shi hpang hkan ai ni gaw, ‘masha amyu baw shagu a matu sakse’ byin na, hkaw tsun bungli mung dam lada wa na ngu tau hkrau tsun da ai. (Mat 24:14; Kas 1:8) Shanhte hkaw tsun ai hpe masha ni gara hku mi bai htang tim, Karai A Mungdan lam, dai Mungdan ngut kre lu na lam ni hpe tsun dan na matu, Yesu lam matsun jaw da ai.

4. Mahte 28:18-20 hku nga yang, Mungdan lam hpe hkaw tsun ai sha n-ga kaga hpa naw galaw ra ai kun?

⁴ Yesu jaw wa ai lahkawng ngu na lam matsun gaw hpa rai kun? Yesu gaw, shi a hkang da ai lam yawng hpe, hkan sa mayu ai masha ni hpe, sharin ya na matu htet da ai. Masha nkau mi tsun ai zawn, hkaw tsun ai hte sharin achyin ai bungli gaw tsa ban langai na ni hte sha seng ai kun? N re. Ndai grai ahkyak ai bungli hpe, “lamu ga aprat htum hkra” matut hkaw tsun na ngu Yesu tsun wa ai. (Mahte 28:18-20 hpe hti u.) Sape 500 jan a man hta shadan dan ai shaloi, ndai lam matsun hpe Yesu jaw wa na masa nga ai. (1 Ko 15:6) Yehowa a lam kaga ni sharin la lu hkra, sape yawng karum ya na hpe myit mada ai lam, Yawhan hpe jaw ai shingran laika hta, Yesu asan sha tsun da ai.​—Shr 22:17.

5. 1 Korinhtu 3:6-9 hku nga yang, hkaw tsun ai hte sharin achyin ai lam hte seng nna Pawlu gara hku ga shadawn jaw wa ai kun?

⁵ Kasa Pawlu gaw, sape shatai ai bungli hpe hpun langai tu kaba wa hkra yu lajang ai lam hte shing daw da ai. Dai gaw nli gat ai daram sha n-ga, grau galaw ra ai lam hpe madun dan ai. Korinhtu masha ni hpe shi ndai hku shadum ya ai: “Ngai gaw hkai da nngai, Apolo gaw ntsin jaw wu ai: . . . nanhte gaw Karai Kasang a yi hkauna . . . rai nga myit dai.” (1 Korinhtu 3:6-9 hpe hti u.) “Karai Kasang a yi hkauna” hta bungli galaw ai anhte gaw, nli gat ai daram sha n-ga, hka jaw ra ai, ayan na yu lajang ra ai. (Yhn 4:35) Nli ni hpe tu kaba hkra galaw ya lu ai gaw, Karai Kasang sha re ai hpe anhte chye ai.

6. Sharin achyin ya ai ni hku nna hpa ni galaw ra ai kun?

⁶ “Htani htana asak lu na matu myit madung hte shakut” ai ni hpe anhte hkan tam ga ai. (Kas 13:48, NW) Sape byin wa na matu, Chyum Laika hpe (1) chye na wa hkra, (2) hkap la wa hkra, (3) tatut hkan sa lu hkra anhte karum ya ra ai. (Yhn 17:3; Kol 2:6, 7; 1 Ht 2:13) Zuphpawng sa lung ai shaloi, anhte yawng gaw, alum ala hte hkap tau la let tsawra myit madun ai hku nna karum ya lu ai. (Yhn 13:35) Chyum ga sharin a ru jung nga ai akyang lailen ni, makam masham ni hpe kau da lu hkra, anhte a aten hte n-gun atsam law law hpe jailang nna karum ya ra chye ai. (2 Ko 10:4, 5) Shanhte galai shai lu hkra, shata law law karum ya ra chye ai. Rai yang, hkalup hkam ai du hkra atsam hpring wa na re. Dai hku shakut shaja ai lam gaw grai akyu nga ai.

7. Hkaw tsun ai hte sape shatai ai bungli hta shang lawm lu hkra anhte hpe hpa gaw shadut ya ai kun?

⁷ Hkaw tsun ai hte sape shatai ai bungli hta hpa majaw shang lawm ai kun? Langai, Yehowa hpe tsawra ai majaw re. Dai bungli hta dang lu ai daram shang lawm ai gaw, Karai Kasang hpe tsawra ai lam madun ai re. (1 Yh 5:3) Ndai lam hpe myit yu ga: Yehowa hpe tsawra ai myit gaw, hkaw tsun na matu, nang hpe shadut ya wa sai. Dai lam matsun hpe hkan sa na matu loi ai kun? N loi ai. Shawng nnan hkaw tsun ai shaloi, nang myit tsang wa ai kun? Myit tsang wa na re. Dai bungli hpe Yesu galaw shangun  mayu ai hpe nang chye ai majaw galaw wa ai re. Aten na wa magang, hkaw tsun bungli hta shang lawm na matu grau loi wa magang re. Chyum Laika sharin ya ai lam hte seng nna gaw gara hku kun? Dai hte seng nna nang myit tsang ai kun? Myit tsang na re. Chyum Laika sharin na matu kaga ni hpe saw shaga lu hkra, hkrit ai myit hpe tawt lai lu hkra, Yehowa hpe karum hpyi u. Rai yang, dai bungli hpe galaw mayu ai myit grau nga wa hkra karum ya na re.

8. Marku 6:34 hku nga yang kaga ni hpe sharin ya na matu anhte hpe hpa gaw shadut ya lu ai kun?

⁸ Lahkawng, masha ni hpe tsawra ai myit gaw shanhte hpe tengman ai lam sharin ya na matu shadut ya ai. Kalang mi hta, Yesu hte sape ni gaw hkaw tsun bungli hta shakut shaja let galaw wa sai majaw, grai pu ba nga ai. Shanhte hkring sa na matu shara tam nga ai shaloi, masha hpawng gaw shanhte hpe tam mu mat ai. Matsan dum myit a majaw, Yesu gaw shanhte hpe “law law” sharin achyin ya wa ai. (Marku 6:34 hpe hti u.) Shi grai pu ba nga tim, shakut shaja let galaw wa ai. Hpa majaw kun? Masha hpawng a hkamsha lam hpe chye na ya ai majaw re. Shanhte kade daram jamjau nga ai, myit mada lam kade daram ra nga ai hpe chye ai majaw, karum ya mayu ai. Dai ni aten na masha ni mung dai hte maren sha re. Shanhte hpe ntsa lam sha yu nna n mai dawdan ai. Shanhte gaw dam mat ai sagu ni hte bung nna, lanu lahku ya na sagu rem ni mung n nga ai. Karai Kasang hpe n chye nna, myit mada lam n nga ai masha ni hte bung ai ngu kasa Pawlu tsun wa ai. (Ehp 2:12) “Hten bya ai de hkrang ai lam” hta du nga ai ni re. (Mat 7:13) Lawk hta nga ai ni a wenyi lam hpe myit yu na nga yang, shanhte hpe karum ya na matu, tsawra myit hte matsan dum myit gaw anhte hpe shadut ya na re. Karum ya lu ai kaja htum lam gaw, shanhte hpe Chyum Laika hkaja na matu saw shaga ai hku nna re.

9. Hpilipi 2:13 hku nga yang, Yehowa nang hpe gara hku karum ya lu ai kun?

⁹ Chyum Laika sharin ya na matu aten law law ra ai majaw, Chyum Laika hkaja na matu saw shaga na hpe htingnut ai rai na re. Rai yang, Yehowa hpe na a hkamsha lam ni tsun dan u. Chyum Laika sharin ya lu ai marai langai ngai hpe tam mu hkra Yehowa kaw karum hpyi u. (Hpilipi 2:13 hpe hti u.) Karai Kasang ra sharawng ai hte maren, hpyi ai akyu hpyi ga ni hpe Karai Kasang mahtai jaw na ngu kasa Yawhan tsun da ai. (1 Yh 5:14, 15) Dai majaw, sape shatai ai bungli hta shang lawm mayu ai myit grau nga wa hkra Yehowa karum ya na hpe kam mai ai.

10-11. Chyum Laika sharin ya na matu hpa majaw htingnut chye ai kun?

¹⁰ Sharin achyin ya na matu grai ahkyak ai hpe anhte chye ai. Raitim, sape shatai ai bungli hpe anhte galaw mayu ai daram law law galaw lu na matu yak chye ai. Dai mayak mahkak nkau mi gaw hpa ni re ai lam hte dai ni hpe gara hku tawt lai lu ai lam hpe bawngban yu ga.

¹¹ Anhte a masa gaw shadawn sharam sha re ai ngu hkamsha chye ai. Ga shadawn, hkaw tsun masha nkau mi gaw asak kaba ai ni, hkam n kaja ai ni re. Na a masa mung dai zawn byin nga ai kun? Rai yang, Kobit-19 kap bra ana byin ai laman, sharin la lu ai lam langai hpe hkaja yu ga. Chyum Laika hpe phone ni hte tang du hkra sharin ya mai ai lam hpe chye wa ai. Dai majaw, nta kaw na sha Chyum Laika sharin ya mai ai. Akyu nga ai kaga lam naw nga ai. Nkau mi gaw Chyum Laika sharin mayu ai. Raitim, anhte hkaw tsun sa chye ai aten ni hta shanhte n rau ma ai. Jahpawt jau jau (sh) shana aten hta rau chye ai. Dai aten ni hta, nang sharin ya mai na kun? Yesu gaw, Nikodi sharin mayu ai shana aten hta sharin ya wa ai.​—Yhn 3:1, 2.

12. Atsawm sharin ya chye ai wa byin na matu, gara lam ni gaw nang hpe karum ya lu na kun?

 ¹² Chyum Laika sharin ya na matu atsam n nga ai ngu hkamsha chye ai. Marai langai ngai hpe Chyum Laika garai n sharin ya shi yang, tinang gaw machye machyang (sh) atsam rawng ai wa byin ging ai ngu hkamsha chye ai. Rai yang, tinang hkum tinang kam ai myit grau nga wa shangun ai lam 3 hpe hkaja yu ga. Langai, nang hta kaga ni hpe sharin ya lu ai atsam nga ai ngu Yehowa myit ai. (2 Ko 3:5) Lahkawng, sumsing lamu hte ginding aga hta, “uphkang na ahkang” lu da ai Yesu gaw, kaga ni hpe sharin ya na matu htet da ai. (Mat 28:18) Masum, kaga ni a karum shingtau lam hpe kamhpa mai ai. Yesu gaw, Kawa sharin ya ai lam hpe sha kamhpa ai. Nang mung dai hku galaw mai ai. (Yhn 8:28; 12:49) Dai sha n-ga, Chyum Laika sharin hpang na matu, gara hku sharin ya na hpe chye na matu, magam lawk hpa-awn, atsam hpring ai ningshawng, mahkrum madup nga ai hkaw tsun masha hpe karum hpyi mai ai. Atsawm sharin ya chye ai wa byin lu ai lam langai gaw, shanhte a Chyum Laika sharin ya ai lamang hta hkan dung ai hku nna re.

13. Ladat nnan hpe anhte hpa majaw sharin la ra ai kun?

¹³ Ladat nnan ni, hkingrai nnan ni hpe chye lang na matu yak chye ai. Chyum Laika sharin ya ai ladat gaw ya galai shai mat sai. Htani Htana Ngwi Pyaw Ai Prat! ngu ai madung hkaja na laika gaw, anhte hkyen lajang ai shaloi, sharin ya ai shaloi, lai wa sai aten na ladat ni hte grai shai mat sai. Hti na laika pang ni yawm mat ai, sharin hkam la ai wa hte law law bawngban na matu lajang da ai. Sharin ya ai shaloi, video ni hte JW Library^® zawn re ai electronic hkingrai ni hpe law law lang ra ai. Dai hkingrai ni hpe n chye lang ai nga yang, chye lang hkra kaga ni hpe karum hpyi u. Shinggyim masha ni gaw shaman la yang chye galaw ai ni re. Lama ma hpe ladat nnan hte sharin la na matu gaw n loi ai. Raitim, Yehowa hte kaga ni a karum shingtau lam hte aloi sha sharin la lu wa na re. Kaga ni hte Chyum Laika hkaja ai shaloi hta mung grau pyaw wa na re. Ndai ladat nnan hte sharin ai gaw, “sharin la ai wa hte sharin ya ai wa lahkawng yan grai pyaw ai” ngu ningshawng langai tsun ai.

14. Hkaw tsun na matu yak ai lawk hta hkaw tsun ra ai shaloi, hpa hpe myit dum ging ai kun? 1 Korinhtu 3:6, 7 gaw anhte hpe gara hku n-gun jaw ya lu ai kun?

¹⁴ Chyum Laika hkaja ai lamang nnan hpang na matu yak ai lawk hta nga ai rai na re. Nkau mi gaw anhte a shiga hpe myit n lawm ai, ninghkap ai lam ni pyi galaw chye ai. Dai zawn lawk hta kaja ai ningmu matut nga hkra, hpa gaw karum ya lu ai kun? Manghkang ni hte hpring nga ai ndai mungkan hta, masha ni a masa ni gaw alawan galai shai chye ai. Moi aten hta, myit n lawm ai ni gaw, shanhte a prat hta Karai a lam matsun ra ai ngu myit wa chye ai. (Mat 5:3) Laili laika ni hpe galoi mung n hkap la chye ai masha nkau mi gaw, hpang hta Chyum Laika hkaja na matu hkap la wa ai. Yehowa gaw “mam Madu” re. (Mat 9:38) Shi gaw anhte matut nna hkai na matu, hka jaw na matu ra sharawng ai. Raitim, shi chyu sha galu kaba hkra galaw ya lu ai. (1 Ko 3:6, 7) Ya aten hta, Chyum Laika hkaja ai lamang hpe garai n lu hpang tim pyi, Yehowa gaw lu la ai akyu hpe n re ai sha, anhte shakut shaja ai lam hpe shaman chyeju jaw ai hpe chye ai gaw n-gun lu shangun ai. *

15. Marai langai gaw Chyum Laika hkaja ai lam hpe hkap la nna, chye wa ai lam ni hpe tatut hkan sa ai nga yang, Yehowa gara hku hkamsha ai kun?

¹⁵ Marai langai gaw, Chyum Laika tengman  lam hpe hkap la nna, kaga ni hpe tsun dan ai nga yang Yehowa grai pyaw ai. (Gsh 23:15, 16) Dai ni aten hta byin nga ai lam ni hpe Yehowa mu ai shaloi grai pyaw na re. Ga shadawn, 2020 magam shaning laman, mungkan ting hta kap bra ana byin nga tim, Chyum ga sharin 7,705,765 galaw lu nna, marai 241,994 hpe Yehowa kaw apnawng nna hkalup hkam ai du hkra karum ya lu wa sai. Dai sape nnan ni mung, Chyum Laika sharin ya ai lam ni, sape shatai ai lam ni hta bai shang lawm wa na re. (Luk 6:40) Dai bungli hta, anhte shang lawm yang Yehowa grai pyaw na re.

16. Kaja ai bandung gaw hpa rai kun?

¹⁶ Sape shatai ai bungli gaw shakut shaja ra ai bungli re. Raitim, sape nnan ni sumsing Kawa hpe tsawra wa hkra, Yehowa a karum shingtau lam hte sharin ya lu ai. Yawm htum, Chyum ga sharin langai hpang lu na matu, bandung tawn mai na kun? Htap htuk ai masa shagu hpe akyu jashawn nna, Chyum Laika hkaja na matu saw shaga ai nga yang, lu wa ai akyu hpe mu ai shaloi nang mau mat na re. Anhte a shakut shaja ai lam hpe Yehowa shaman chyeju jaw na hpe kam mai ai.

17. Chyum ga sharin galaw ai nga yang gara hku hkamsha lu na kun?

¹⁷ Kaga ni hpe tengman ai lam hkaw tsun na matu, sharin ya na matu, anhte ahkaw ahkang lu da ai. Dai bungli gaw jet ai ngwi pyaw lam lu shangun ai. Htesaloni masha law law hpe sape byin wa hkra karum ya wa ai kasa Pawlu gaw, shi a hkamsha lam hpe ndai hku tsun ai: “Anhte a Madu Yesu a man e, shi a bai du ai hta, anhte a myit mada shara, kabu gara shara hte gumrawng na janmau gaw, hpa mi rai nga a ta? Nanhte nan dai rai nga myit dai, n rai myit ni? Nanhte gaw anhte a hpung shingkang hte kabu gara shara rai nga myit dai.” (1 Ht 2:19, 20; Kas 17:1-4) Dai ni aten na masha law law mung, dai hte maren hkamsha lu ai. Masha law law hpe hkalup hkam ai du hkra, madu wa hte rau karum ya lu wa ai nauna Stehpani ndai hku tsun ai: “Masha ni hpe tinang hkum tinang Yehowa kaw apnawng ai du hkra karum ya lu ai hta grau ai kabu gara lam n nga sai.”