Kanu Kawa Ni A Matu
6: Sharin Shaga Ai Lam
Lachyum
Sharin shaga ai ngu ai gaw, lam matsun nna sharin achyin ya ai hpe tsun ai re. Kalang lang, kashu kasha ni a n kaja ai akyang ni hpe shading sharai ya ai lam lawm ai. Law malawng gaw, akyang lailen kaja wa hkra shaman shakyang ya ai lam lawm ai.
Hpa Majaw Ahkyak Ai Kun?
Lai wa sai 10 ning ladaw ni laman, nkau dinghku ni hta sharin shaga ai lam n nga ai daram byin wa ai. Ma ni a tinang hkum tinang kam ai myit yawm mat na hpe tsang ai majaw re. Raitim, hpaji rawng ai kanu kawa ni gaw, htap htuk ai tara ni jahkrat nna, ma ni hkan sa lu hkra shaman shakyang ya ma ai.
“Akyang lailen kaja nna myitsu ai hku kaba wa na matu, tara ni ra ai. Sharin shaga ai lam n nga yang, li hkang n nga ai li zawn du kam ai de du nna, hten run mat na re.”—Pamela.
Galaw Mai Ai Lam
Tsun Ai Hte Galaw Ai Lam Bung Ra Ai. Jahkrat da ai tara ni hpe ma ni n hkan sa yang, lu wa ai akyu ni hpe hkamsha shangun u. Hkan sa ai aten ni hta gaw, shakawn ya u.
“Madat mara ai lam n nga ai mungkan hta, kashu kasha ni madat mara ai majaw, jahkring hkring shakawn ya ai. Shakawn ya ai gaw ra ahkyak ai zawn, shading sharai ai shaloi hkap la na matu mung loi shangun ai.”—Hkristin.
Chyum Laika Npawt Tara: “Masha gaw gat hkai ai hte maren, dan la na ra ai.”—Galati 6:7.
Rap ra ai ningmu nga u. Ma a asak hte atsam hpe hkan nna sharin shaga u. Galaw dat ai mara hte htuk ai dam jaw ai gaw akyu nga ai. Ga shadawn, phone hpe shut ai hku jailang ai nga yang, masat da ai aten hta phone hpe zing la kau u. Raitim, kaji kajaw lam ni hpe grai ahkyak ai hku hkum galaw.
“Ma gaw dingsang ga n madat ai kun? N dum shami galaw shut ai kun? ngu ai hpe ngai atsawm myit nna dawdan ai. Ru hte nawng baw kau ra ai lailen ni nga ai zawn, galaw shut ai mara hpe madun nna tsun dat ai hte sha ngut mat ai mara mung nga ai.”—Winde.
Chyum Laika Npawt Tara: “Nanhte a ma ni myit n kaji u ga, shanhte hpe hkum jahte nga mu.”—Kolose 3:21.
Tsawra myit rawng u. Kanu kawa ni gaw tsawra nna sharin shaga ai hpe ma ni chye yang, hkap la loi shangun ai.
“An a kasha mara galaw ai shaloi, lai wa sai aten hta kaja ai dawdan lam ni jahkrat wa ai majaw shi a matu grai arawng la ai ngu tsun dan ai. Galai shai na nga yang, n hpang hkrat shi ai. Nu yan wa karum ya na re ngu nna tsun dan ai.”—Daniye.
Chyum Laika Npawt Tara: “Tsawra ai myit gaw galu kaba nga ai, sumnung shingdi nga ai.”—1 Korinhtu 13:4.
