Hpung a lit ni hpe gun hpai ai Hkristan la ni hpe “myitsu salang ni” hte “magam tau ni” ngu nna, hpan lahkawng hku Chyum Laika hta tsun da ai. (Hpilipi 1:1, NW) Hpung law malawng hta, myitsu salang ni hte magam tau ni nga ma ai. Magam tau ni gaw anhte akyu a matu gara lit ni gun hpai ai kun?

Myitsu salang ni hpe karum ya ai. Magam tau hpunau ni gaw, wenyi lam hta kung hpan ai ni, kam mai ai ni, kangka ai ni rai nna, nkau mi gaw asak kaji nna nkau gaw asak kaba ai. Shanhte gaw hpung hte Nawku Htingnu ni hta, ra ai bungli ni hpe galaw ya ai majaw, myitsu salang ni gaw sharin achyin ai lam hte, sagu rem ai lam hta grau myit maju jung lu ai.

Shanhte gaw tatut ra ai amu ni hpe galaw ya ai. Nkau magam tau ni gaw, zuphpawng sa lung ai ni yawng hpe hkap tau na matu lit lu ai. Nkau mi gaw nsen jak jum ai, laili laika garan shabra ai, hpung a jahpan lang ai, magam lawk hpe woi awn ya ai lit ni lu ma ai. Nawku Htingnu hpe gram lajang ai hta mung karum ya ai. Grai asak kaba ai ni hpe karum ya na matu, myitsu salang ni shanhte hpe hpyi shawn ma ai. Magam tau ni gaw hpa lit mi lu lu, sharawng ai myit hte galaw ai majaw, hpung gaw shanhte a shakut ai lam hte, sharawng ai myit hpe hkungga ma ai.​—⁠1 Timohti 3:13.

Hkristan la ni hku kasi kaja madun ai. Wenyi lam hta kaja ai ni hpe, magam tau amu gun na matu lata ma ai. Shanhte gaw, hpung zuphpawng lamang nkau hpe woi awn nna, anhte a makam masham ngang kang hkra karum ya ai. Hkaw tsun bungli hta woi awn nna, anhte a myit hpe sharawt ya ai. Shanhte gaw, myitsu salang ni a ga madat nna jawm galaw ai majaw, ngwi pyaw lam, kahkyin gumdin lam ni rawt jat wa ai. (Ehpesu 4:16) Htawm hpang hta shanhte mung, myitsu salang hku magam gun na matu atsam marai hpring wa ai.

• Magam tau ni hta gara atsam ni nga ra a ta?

• Hpung bungli ni atsawm sha matut galaw lu hkra, magam tau ni gara hku karum ya a ta?