Dinghku hta ra rawng ai ni hpe galaw na matu, gumhpraw ra ai. (Ga Shagawp 30:8) “Gumhpraw gaw makawp maga chye ai” ngu Chyum Laika hta tsun da ai. (Hpaji Ningli 7:12) Madu jan madu wa gaw, gumhpraw lam bawng na matu, yak ai raitim bawng ban ra ai. Dinghku hta gumhpraw a majaw, manghkang hkum shabyin. (Ehpesu 4:32) Gumhpraw gara hku jai na hpe, daw dan ai shaloi langai hte langai kam hpa let, rau galaw ging ai.

CHYUM LAIKA TSUN AI LAM: “Nanhte hta na masha langai mi, wahpang langchyi gaw mayu yang, dai ngut ram hkra shi lu ai gumhpraw law na n law na, hkrat ang ai jahpu hpe dung nna, shawng n sawn yu na masha nga a ni?” (Luka 14:28) Gumhpraw gara hku jai na hpe, rau bawng ban na matu grai ahkyak ai. (Amo 3:3) Hpa mari ra ai, kade daram jai na ngu ai hpe daw dan u. (Ga Shagawp 31:16) Gumhpraw nga shagu, rai n mari ra ai. Hka n kap hkra, nga ai hte law hkra jai u.​—⁠Ga Shagawp 21:5; 22:7.

NANG GALAW MAI AI LAM:

• Shata htum ai shaloi, gumhpraw naw jan yang, hpa galaw na hpe rau daw dan u

• Shang gumhpraw hta, jai gumhpraw grau law yang, jarik hpe gara hku shayawm na, atsawm lajang u. Ga shadawn, shing gan hta mari sha na malai, nta hta shadu sha u

CHYUM LAIKA TSUN AI LAM: “Langai hte langai tinang a htingbu wa hpe teng man ai ga tsun nga mu.” (Ehpesu 4:25) Kade lu ai, kade jai ai hpe na ningrum ningtau hpe teng ai hku tsun dan u.

Gumhpraw hte seng nna, ahkyak ai lam n daw dan shi yang, shi hte ayan jahkrup u. (Ga Shagawp 15:22) Gumhpraw lam bawng ban na nga yang, dinghku hta matut nna ngwi pyaw lu hkra karum ya na re. Na gumhpraw hpe nang na ngu n myit ai sha, dinghku a gumhpraw ngu myit u.​—⁠1 Timohti 5:8.

NANG GALAW MAI AI LAM:

• Njahkrup ra ai sha, jai lu na gumhpraw shadang hpe, nan lahkawng myit hkrum let masat da u

• Manghkang n byin shi ai kaw na, gumhpraw lam jahkrup da u