Daw 2
Karai Kasang Gaw Kadai Rai Ta?
1. Karai Kasang hpe anhte hpa majaw nawku ra ai kun?
Teng man ai Karai Kasang gaw, nga yawng nga pra a Hpan Da Madu re. Shi gaw npawt hte jahtum n nga ai. (Shakawn 90:2) Chyum Laika hta lawm ai kabu gara shiga gaw Karai Kasang kaw na re. (1 Timohti 1:11) Karai Kasang gaw, anhte hpe asak jaw da ai majaw, shi langai hpe sha nawku ra ai.—Shingran 4:11 hpe hti u.
2. Chyum Laika hta Karai Kasang a lam hpa tsun da a ta?
Karai Kasang gaw, Wenyi Hkum rai nna, masha hkum hta grau madang tsaw ai majaw, shi hpe kadai mung n mu yu ai. (Yawhan 1:18; 4:24) Karai Kasang hpan da ai ni hpe yu yang, shi a atsam ningja ni hpe mu lu ai. Ga shadawn, amyu baw hkum la ai namsi namsaw ni hte, nampu nampan ni gaw, shi a tsawra myit hte nyan hpaji hpe tsun dan ai. Dam lada la ai sumsing lamu hte ginding aga gaw, shi a hpung atsam hpe madun dan nga ai.—Yeremia 10:12 hpe hti u.
Chyum Laika hti nna, Karai Kasang a atsam ningja ni hpe, anhte grau sharin la mai ai. Ga shadawn, Karai Kasang ra sharawng ai hte n ra ai lam, masha ni hte gara hku kanawn mazum ai lam, mabyin masa ni hpe yu nna gara hku bai htang ai lam ni hpe, Chyum Laika hta tsun da ai.—Shakawn Kungdawn 103:7-10 hpe hti u.
3. Karai Kasang a amying gaw hpa rai ni?
“Sumsing lamu na anhte a Wa e, Na a amying nsang chyoi pra nga lit ga” nga nna Yesu tsun ai. (Mahte 6:9) Karai Kasang hta arawng ningsang amyu myu nga ai. Raitim, amying gaw langai sha nga ai. Ga amyu baw hta hkan nna, amyu myu gang shaga ma ai. Jinghpaw hku gaw “Yehowa” re.—Shakawn Kungdawn 83:17 hpe hti u.
Chyum Laika law law hta Karai Kasang a amying hpe shaw kau nna Madu, shing n rai, Karai Kasang nga nna galai bang da ma ai. Raitim, Chyum Laika madung hta gaw, Karai Kasang a amying 7,000 lang daram lawm ai. Yesu gaw masha ni hpe, Karai Kasang a lam sharin ya ai shaloi, Karai Kasang a amying hpe tsun dan ai.—Yawhan 17:26 hpe hti u.
Karai Kasang Kaw Amying Nga Ai Kun? ngu ai video hpe yu u.
4. Yehowa anhte hpe lanu lahku nga ai kun?
Tsawra myit hpring tsup ai ndai kawa zawn, Karai Kasang mung prat tup akyu a matu galaw ya
Yakhkak jamjau ai lam ni law wa ai gaw, Karai Kasang anhte hpe lanu lahku lam n nga ai majaw kun? Karai Kasang gaw anhte hpe, yakhkak jamjau ai lam ni hte, chyam dinglik nga ai ngu masha nkau mi tsun ma ai. Raitim, dai gaw n jaw ai.—Yaku 1:13 hpe hti u.
Karai Kasang gaw masha ni hpe, myit ra ai hku lata na ahkang jaw da nna, shagrau da ai. Dai zawn lata na ahkang jaw da ai majaw, Karai Kasang hpe chyeju dum ra ai. (Yawshu 24:15) Raitim, masha law malawng gaw, nhkru ai amu galaw na matu lata ma ai majaw, yakhkak jamjau ai lam ni grau law wa ai. Dai zawn n tara ai lam ni hpe, Karai Kasang mu ai shaloi, grai yawn ai.—Ningpawt Ninghpang 6:5, 6 hpe hti u.
Yehowa gaw, anhte hpe lanu lahku ai Karai Kasang re. Anhte hpe, ngwi pyaw ai hte asak hkrung shangun mayu ai. Kade n na yang, yakhkak jamjau ai lam ni hte, dai zawn shabyin ai ni hpe, yeng seng kau sana re. Ndai laman hta, yakhkak jamjau ai lam ni, byin na ahkang jaw da ai gaw, Karai Kasang hta, yaw shada da ai lam nga ai majaw re. Dai lam ni hpe, daw 8 hta, sanglang dan na re.—2 Petru 2:9; 3:7, 13 hpe hti u.
5. Karai Kasang hte ni htep hkra gara hku galaw ra na rai?
Yehowa gaw, anhte hpe shi hpang de, akyu hpyi nna, ni htep hkra galaw na matu, saw shaga da ai. Shi gaw anhte langai hpra hpe, myit lawm ai. (Shakawn 65:2; 145:18) Shi gaw, mara raw dat na matu jin jin nga ai. Karai Kasang myit pyaw na matu, anhte galaw ai lam hta, kalang lang hkrat sum yang pyi, anhte shakut nga ai hpe shi chye ya ai. Dai majaw, n hkum tsup ai masha ni raitim, Karai Kasang hte ni htep hkra galaw mai ai.—Shakawn Kungdawn 103:12-14; Yaku 4:8 ni hpe hti u.
Yehowa gaw, anhte hpe asak jaw da ai majaw, kaga kadai hta mung, shi hpe grau tsawra ging ai. (Marku 12:30) Karai Kasang a lam grau hkaja na, shi tsun ai hku galaw nna, shi hpe tsawra ai lam madun yang, shi hte grau ni htep wa na re.—1 Timohti 2:4; 1 Yawhan 5:3 ni hpe hti u.
