Daw 7
Karai A Mungdan Ngu Ai Gaw Hpa Rai Ta?
1. Karai a Mungdan ngu ai gaw hpa rai ta?
Yesu gaw hpa majaw kaja htum Hkawhkam rai ta?—MARKU 1:40-42.
Karai a Mungdan gaw, sumsing lamu kaw nga ai asuya re. Dai asuya gaw, masha asuya ni yawng hpe yeng seng kau nna, sumsing lamu hte ginding aga ntsa hta, Karai Kasang ra sharawng ai lam byin wa hkra, galaw ya na re. Dai gaw kabu gara shiga re. Kade n na yang, Karai a Mungdan gaw kaja ai hku uphkang nna, masha ni a ra kadawn nga ai lam ni hpe, galaw ya na re. Mungkan ntsa na masha yawng hpe kahkyin gumdin ya na re.—Daniela 2:44; Mahte 6:9, 10; 24:14 ni hpe hti u.
Mungdan langai hta hkawhkam langai nga ra ai. Yehowa gaw, shi a Kasha Yesu Hkristu hpe Karai Mungdan a Hkawhkam aya ap da ai.—Shingran 11:15 hpe hti u.
Karai A Mungdan Ngu Ai Gaw Hpa Rai Ta? ngu ai video hpe yu u.
2. Yesu gaw hpa majaw kaja dik htum Hkawhkam rai a ni?
Karai Kasang a Kasha gaw, kaja htum Hkawhkam re. Hpa majaw nga yang, shi gaw matsan dum chye nna, teng man ai hta ngang ngang tsap ai majaw re. (Mahte 11:28-30) Yesu hta masha ni hpe karum ya na matu, hpung atsam nga ai. Hpa majaw nga yang sumsing lamu kaw nna, mungkan ga hpe uphkang na majaw re. Shi bai hkrung rawt ai hpang, lamu de lung nna hkawhkam aya lu na matu, Yehowa a hkra maga de dung nna, la nga ai. (Hebre 10:12, 13) Jahtum hta Karai Kasang gaw shi hpe uphkang na matu ahkang aya jaw na re.—Daniela 7:13, 14 hpe hti u.
3. Yesu hte rau kadai ni uphkang na kun?
“Chyoi pra ai masha ni” ngu ai uhpung gaw Yesu hte rau sumsing lamu hta uphkang na re. (Daniela 7:27) Shawng nnan hta, Yesu gaw sadi dung ai kasa ni hpe, lata ai. Yehowa gaw, ya aten du hkra sadi dung ai la, num ni hpe lata nga ai. Yesu Hkristu zawn, shanhte mung wenyi hkum hte hkrung rawt na re.—Yawhan 14:1-3; 1 Korinhtu 15:42-44 ni hpe hti u.
Masha kade daram lamu de lung na rai ta? Yesu gaw shanhte hpe “sagu hpung kaji” ngu shaga ai. (Luka 12:32) Shanhte gaw marai 144,000 rai nna, Yesu hte arau mungkan hpe, uphkang na re.—Shingran 14:1 hpe hti u.
4. Yesu nnan uphkang ai shaloi hpa lam ni byin ai rai?
Karai Kasang a Mungdan gaw, 1914 ning hta uphkang hpang sai. * Yesu gaw Hkawhkam hku nna, shawng nnan galaw ai gaw, Satan hte shi a nat ni hpe mungkan ga de, kabai jahkrat kau ai. Satan grai masin pawt nna, mungkan ga ntsa hta yakhkak jamjau ai lam ni byin hkra galaw ai. (Shingran 12:7-10, 12) Dai aten kaw na, yakhkak jamjau ai ni law wa ai. Hpyen majan, hku hku ai, ana zinli hte nnang nawn kaba ni gaw, kade nna yang mungkan hta byin nga ai lam ni hpe, Karai Kasang tara jeyang na aten ni wa sai hpe “kumla” madun nga ai.—Luka 21:7, 10, 11, 31 hpe hti u.
5. Karai a Mungdan gaw hpa lam ni hpe shabyin ya nga a ni?
Karai a Mungdan gaw, mungkan ting hta hkaw tsun bungli hte, masha amyu baw shagu hpe kahkyin gumdin da nga sai. Myit gyip ai masha wan law law gaw, Yesu a uphkang ai lam hpe hkap la nga ma ai. Karai a Mungdan gaw, ya byin nga ai mungkan a nhkru ai lam ni yawng hpe, jahten kau ai shaloi, myit gyip ai ni hpe hkye hkrang la na re. Dai majaw, Karai a Mungdan kaw na akyu lu la mayu ai ni gaw, Yesu uphkang ai npu hta madat mara ai ni byin hkra sharin la ra ai.—Shingran 7:9, 14, 16, 17 hpe hti u.
Yesu uphkang ai shaning 1,000 laman e, Karai a Mungdan gaw, masha ni hte seng ai, Karai a yaw shada lam hpring tsup hkra galaw na re. Mungkan ting gaw, hparadisu byin wa na re. Jahtum hta, Yesu gaw Karai a Mungdan hpe, shi a Kawa hpang de bai ap na re. (1 Korinhtu 15:24-26) Karai Mungdan a lam, kadai hpe nang tsun dan mayu ai rai?—Shakawn Kungdawn 37:10, 11, 29 hpe hti u.
^ စာပိုဒ်၊ 6 1914, ning hte seng nna, Chyum Laika hta gara hku tau hkrau tsun da ai hpe Chyum Laika Anhte Hpe Hpa Sharin Ya Ai Kun? ngu ai laika buk a laika man 217-220 ni hta hti yu u.
