Satan gaw nang hpe man dan hpaji ta tut hkan sa shăngun măyu ai. Măsha law mălawng gaw shanhtē hpe shoi hpa kaw na măkawp măga na mătu, kăji kăwoi ni, shing n rai wenyi ni hpe shăgu hkungga sak jaw ma ai. Wenyi mungkan kaw na atsam ni hpe hkrit ai măjaw, dai zawn gălaw ma ai. Man dan hte seng ai lachyawp ni, shing n rai lăhkawn ni hpe shanhtē sum raw ma ai. Man dan hte seng ai atsam nga ai ngu, myit kam ai “tsi ni” hpe lu ai, shing n rai tinang a hkum hta arut achya ma ai. Nkau mi gaw măkawp măga ai atsam nga ai ngu myit kam ai arai ni hpe shanhtē a nta ni hta, shing n rai aga hta ē lup măkoi tawn ma ai. Nkau mi chyawm gaw man dan hte seng ai “tsi” gaw hpăga lam, san poi, shing n rai, sum tsaw sum ra lam hta awng dang na rè ngu kam nna lang ma ai.

Yehowa hte jinghku hku ai lam gaw, Satan a hpyen kaw na kăja dik ai măkawp măga lam rè. Yehowa Kărai Kăsang hte shi a lămu kăsa ni gaw, Satan hte shi a nat mătsē ni hta grau nna n-gun atsam kăba ai. (Yaku 2:​19; Shingran 12:9) Yehowa gaw shi hpe tsep kawp sădi dung ai jinghku ni a mătu n-gun atsam mădun na grai ra shărawng ai.​—2 Hkawhkam Labau 16:9.

“Mandan lakle amu hte shăba wawt ai lam nanhtē hkan gălaw lu na n rai,” nga Kărai Kăsang a Mungga tsun ai. Yehowa gaw man dan hte hpyi lămum hpaji hpe jăhpoi asawng da ai. Hpa măjaw nga yang dai akyang alai ni gaw măsha lăngai hpe Satan Nat a atsam npu de ading tawk shang mat wa shăngun ai măjaw rè.​—Jaw Jau 19:26.