DAW 15
Yesu Gaw Kadai Rai Kun?
Yesu gaw labau hta, mying gumhkawng dik htum masha langai re. Masha law law gaw shi a mying hpe chye tim, shi a lam hpe atsawm n chye ma ai. Yesu gaw kadai re ai hte seng nna, chye na ai lam amyu myu shai nga ai. Shi hte seng nna Chyum Laika hta hpa tsun da ai kun?
1. Yesu gaw kadai rai kun?
Yesu gaw sumsing lamu hta nga ai atsam kaba ai wenyi re. Yehowa Karai Kasang gaw, yawng mayawng hpe garai n hpan shi yang, Yesu hpe shawng hpan ai. Dai majaw, shi hpe “hpan da ai arai yawng mayawng hta alat rai nga ai” ngu tsun ai. (Kolose 1:15) Chyum Laika hta Yesu hpe Karai a “Kasha shingtai” ngu tsun da ai. Hpa majaw nga yang, Yesu hpe sha Yehowa dingtawk hpan da ai majaw re. (Yawhan 3:16) Yesu gaw, Kawa Yehowa hte rau bungli galaw wa nna, kaga yawng mayawng hpe hpan ai hta karum ya ai. (Ga Shagawp 8:30 hpe hti u.) Yesu gaw Yehowa hte kaja ai hku hkau lam matut nga wa ai. Shi gaw Karai a shiga ni, lam matsun ni hpe sa ya ai “Mungga,” Karai a malai tsun na ahkang nga ai wa hku nna sadi dung let magam gun wa ai.—Yawhan 1:14.
2. Yesu hpa majaw mungkan ga de sa wa ai kun?
Lai wa sai shaning 2,000 daram hta, Yehowa gaw chyoi pra ai wenyi hpe akyu jashawn nna, sumsing lamu na Yesu a asak hpe Mari ngu ai hkawn sek a kan kata de mauhpa lam hte htawt ya wa ai. Dai lam hku nna, Yesu gaw shinggyim masha langai hku nna shangai wa ai. (Luka 1:34, 35 hpe hti u.) Yesu gaw ga sadi tawn da ai Meshia (sh) Hkristu byin wa na matu hte, shinggyim masha ni hpe hkye la na matu, mungkan ga de du sa wa ai. a Meshia hte seng nna Chyum Laika myihtoi ga yawng gaw, shi hta hpring tsup wa ai. Dai majaw, masha ni gaw Yesu hpe “Hkristu ngu ai a hkrung nga ai Karai Kasang a Kasha” re ai hpe ginhka lu wa ai.—Mahte 16:16.
3. Yesu ya gara kaw kun?
Yesu gaw shinggyim asak aprat htum mat ai hpang, wenyi hkum hte jahkrung sharawt la hkrum nna, sumsing lamu de bai wa mat ai. Dai hta, Karai Kasang gaw shi hpe yawng mayawng hta grau ai hku “shagrau” dat ai. (Hpilipi 2:11) Ya nga yang, Yesu gaw Yehowa ngut yang nambat lahkawng ahkang aya kaba htum shara hta nga nga sai.
Kahtap Hkaja
Yesu gaw teng sha kadai re ai lam hte shi a lam hpe hkaja na matu hpa majaw grai ahkyak ai ngu ai hpe hkaja yu ga.
4. Yesu gaw Chyahtum Chyalai N-gun Rawng ai Karai Kasang n re
Yesu gaw sumsing lamu hta, atsam kaba ai wenyi hkum raitim, shi a Karai Kasang, Kawa, Yehowa hpe npu taw ai ngu Chyum Laika hta tsun da ai. Hpa majaw dai hku lu tsun ai kun? Chyahtum chyalai n-gun rawng ai Karai Kasang hte Yesu a daw gaw gara hku shai ai lam Chyum Laika hta tsun da ai hpe chye na matu, VIDEO hpe hpaw.
Yehowa hte Yesu gaw gara hku daw ang ai hpe chye na na matu lawu na Chyum daw ni gaw karum ya lu ai. Chyum daw langai hpra hpe hti nna, ndai ga san ni hpe bawngban u:
Luka 1:30-32 hpe hti u.
-
“Tsaw htum ai” Karai Kasang Yehowa hte Yesu a daw ang ai lam hpe lamu kasa ni gara hku tsun dan ai kun?
Mahte 3:16, 17 hpe hti u.
-
Yesu hkalup hkam ai shaloi, sumsing lamu kaw na gara nsen pru wa ai kun?
-
Kade a nsen ngu nang shadu ai kun?
Yawhan 14:28 hpe hti u.
-
Kadai gaw grau kaba nna, kade a ahkang aya gaw grau kaba ai kun? Kawa kun? Kasha kun?
-
Yesu gaw Yehowa hpe Kawa ngu shaga ai gaw hpa lachyum rai kun?
Yawhan 12:49 hpe hti u.
-
Yesu gaw shi hte shi a Kawa gaw, marai langai sha re ngu myit la wa ai kun? Nang gaw gara hku shadu ai kun?
5. Yesu gaw Meshia re ai hpe sakse madun wa
Shinggyim masha ni hpe hkye la na matu Karai Kasang lata da ai Meshia hpe masha ni ginhka chye na matu, karum ya lu ai myihtoi ga law law Chyum Laika hta lawm ai. Mungkan ga de Yesu sa wa ai shaloi, hpring tsup wa ai myihtoi ga nkau mi hpe shachyen da ai VIDEO hpe hpaw.
Chyum Laika myihtoi ga ni hpe hti nna, ndai ga san ni hpe bawngban u:
Meshia gara shara hta shangai wa ai hpe chye na matu, Mihka 5:2 hpe hti u. b
-
Yesu a shangai ai lam gaw ndai myihtoi ga hpe hpring tsup shangun wa ai kun?—Mahte 2:1.
Meshia si ai lam hte seng nna, myihtoi ga hpe ahkri ahkrai chye na matu, Shakawn 34:20 hte Zehkaria 12:10 hpe hti u.
-
Dai myihtoi ga ni hpring tsup wa ai kun?—Yawhan 19:33-37.
-
Yesu gaw, dai myihtoi ga yawng hpring tsup hkra galaw wa ai gaw mai byin na ngu nang shadu ai kun?
-
Yesu hte seng nna ndai gaw hpa sakse madun nga ai kun?
6. Yesu a lam hpe hkaja ai gaw akyu lu
Yesu a lam hte shi a daw hpe hkaja na matu grai ahkyak ai ngu Chyum Laika hta tsun da ai. Yawhan 14:6 hte 17:3 hpe hti nna, ndai ga san hpe bawngban u:
-
Yesu a lam hpe hkaja na matu hpa majaw grai ahkyak ai kun?
Karai a jinghku byin na matu Yesu lam hpaw ya wa ai. Shi gaw Yehowa hte seng ai tengman lam hpe sharin ya wa ai. Shi kaw na anhte gaw htani htana asak lu la mai ai
Nkau Mi Tsun Ai: “Yehowa Sakse ni gaw Yesu hpe n kam ai.”
-
Nang gara hku bai htai na kun?
Kadun Dawk
Yesu gaw atsam kaba ai wenyi hkum re. Shi gaw Karai a Kasha Meshia re.
Bai Maram
-
Yesu hpe “hpan da ai arai yawng mayawng hta alat” re ai ngu hpa majaw tsun ai kun?
-
Mungkan ga de garai n sa shi yang Yesu hpa galaw wa ai kun?
-
Yesu gaw Meshia re ai hpe anhte gara hku chye lu ai kun?
Sawk Sagawn
Meshia hku nna Yesu a daw hpe kahtap nna hkaja yu u.
Shinggyim masha ni ma lu wa ai zawn, Karai Kasang mung Yesu hpe lu wa ai ngu Chyum Laika hta tsun da ai kun? ngu ai hpe hti yu u.
“Yesu Hpe Hpa Majaw Karai Kasang A Kasha Nga Nna Shaga Ai Kun?” (Web sumhpa)
Masum raitim langai Karai gaw Chyum Laika sharin ya ai lam n re ai hpe yu yu u.
“Yesu Gaw Karai Kasang Rai Kun?” (Sin Langchyi, April 1, 2009)
Yesu hte seng nna Chyum Laika hta tsun da ai hpe num langai sawk sagawn ngut ai hpang, shi a prat gara hku galai shai mat ai hpe hti yu u.
a Daw 26 hte 27 hta, shinggyim masha ni hpe hpa majaw hkye la ra ai lam hte Yesu gara hku hkye la ai lam hpe chye lu na re.
b Yesu mungkan ga de sa ai shaloi, tup hkrak hpring tsup wa ai myihtoi ga langai hpe chye na matu, Jahtum Matsing 2 hpe yu u.
You May Also Like
SAN CHYE AI GA SAN NI
Yehowa Sakse Ni Saw Shaga Ai Chyum Laika Hkaja Lamang Ngu Ai Gaw Hpa Rai Kun?
Manu jahpu n jaw ra ai Chyum Laika hkaja ai lamang hpe Yehowa Sakse ni saw shaga ai shaloi, gara Chyum Laika hpe raitim, nang mai lang ai. Na nta masha ni, manang ni, kadai hpe raitim, saw shaga mai ai.
