EZARA gaw Yerusalem mare de grai n sa ai aten loi shawng shaning de bai nhtang wa ga. Mordehkai hte Eshta gaw Persi mungdan hte ahkyak kaba htum ai Israela masha yan rai ma ai. Eshta gaw hkawhkam jan rai nna Eshta a kahpu Mordehkai gaw hkawhkam wa hta lai nna lahkawng ngu na daru magam ahkaw ahkang kaba htum ai wa re. Gara hku byin wa ai hpe yu yu ga.

Eshta gaw kaji yang shi a kanu yan kawa si mat ma ai. Dai rai nna Mordehkai shi hpe bau kaba tawn ai. Shushan ngu ai mare hta Persi hkawhkam Ahasuru a htingnu langai mi nga ai. Mordehkai gaw Ahasuru a shangun ma langai mi re. Lani mi hta e, hkawhkam jan Washati gaw hkawhkam a ga hpe tawt lai ai. Dai rai nna hkawhkam wa gaw hkawhkam jan langai mi bai lata la ai. Kadai hpe hkawhkam jan lata la ai hpe chye a ni? Teng ai. Tsawm la ai numsha Eshta hpe lata la ai.

Masha ni nawku ding nyawm nga ai gumrawng gumtawng re ai masha wa hpe mu a ni? Dai wa gaw Haman re. Shi gaw Persi mung hta ahkyak ai munggyi langai mi re. Ndai sumla hta mu ai hte maren, Haman gaw dung taw nga ai Mordehkai hpe shi hpe nawku dingnyawm shangun mayu ai. Raitimung Mordehkai gaw n nawku ai. Ndai nhkru ai masha hpe nmai nawku ai, nga nna Mordehkai myit ai. Dai majaw Haman gaw Grai masin pawt ai. Dai rai nna, shi ndai zawn galaw dat ai.

Haman gaw hkawhkam wa hpe Israela masha ni a lam nteng nman masu tsun ai. ‘Israela masha ni gaw na a tara hpe mung nhkang ma ai. Nhkru ai masha ni rai ma ai. Shanhte hpe sat kau yang mai na re,’ nga ai. Ahasuru gaw shi a madu jan Eshta Israela masha re ai hpe n chye ai. Dai majaw Haman tsun ai ga hpe madat nhtawm, Israela masha mahkra hpe gara shani e, sat kau na nga nna hkang ai tara langai mi shapraw ai.

Mordehkai gaw dai tara hpe na jang shi grai myit yawn ai. Dai majaw Eshta hpang de shi ga shana dat ai: ‘Hkawhkam wa kaw shang nna anhte a asak lawt lu hkra hpyi la u,’ nga ai. Persi mungdan a tara gaw hkawhkam wa n shaga yang hkawhkam wa kaw n mai shang ai tara nga ai. Raitimung Eshta gaw hkawhkam wa n shaga timung shang sa ai. Dai shaloi e, hkawhkam wa gaw shi a ja sumdoi hpe ladawn ya ai. Lachyum gaw Eshta nsat hkrum ai. Eshta gaw hkawhkam wa hte Haman hpe lusha shaga daw jaw ai, Shagu hta hkawhkam wa gaw, nang hpa ra a ta? nga nna Eshta hpe san ai. Hpang shani lu sha poi kaba de hkawhkam wa hte Haman bai sa jang tsun na nga ai.

Dai lu sha poi du ai shaloi, Eshta gaw tsun ai: ‘ngai hte nye a amyu masha ni yawng sat shagrawm kau hkrum na sai,’ nga nna hkawhkam wa hpe tsun ai. ‘Ndai lam galaw gwi ai wa gaw kadai wa rai ta?’ nga nna san ai. Hkawhkam wa mung sin dawng kahtet bu sai.

‘Dai masha wa hte hpyen wa gaw, ndai nhkru ai Haman wa re,’ nga nna Eshta tsun dat ai.

Ndai lang hkawhkam wa teng teng masin pawt nga sai. Haman hpe sat kau mu, nga nna ahkang jaw dat ai. Dai hpang e, hkawhkam wa gaw Mordehkai hpe shi hta kaga kaba htum ai daru magam lu ai masha hku nna san da ai. Dai rai nna Mordehkai gaw Israela masha ni lama sat kau hkrum na shani e, tinang a asak hpe makawp maga gasat lu ai tara hpe bai shapraw ai. Mordehkai ya ahkyak kaba ai masha langai mi tai wa sai majaw, masha law law Israela masha ni hpe karum ma ai. Shingrai Israela masha ni mung hpyen ni a lata na lawt lu ma ai.