Israela mung lu sha hku hku ai aten hta, Israela anum Naomi gaw shi a madu wa hte shi a shadang sha lahkawng hte arau Moba mung de htawt mat ai. Hpang e, Naomi a madu wa si mat ai. Shi a kasha yan gaw Moba shayi sha Ruhta hte Orpa hpe hkungran la ai. Myit n pyaw hpa gaw, Naomi a kasha lahkawng mung si mat ai.

Israela mung hta lu sha law htam wa sai hpe Naomi na yang, shi a mung de bai wa na matu shi dawdan wa ai. Shi hte rau Ruhta hte Orpa mung hkan nang wa ai. Raitim, lam ka-ang du ai shaloi, Naomi gaw shan hpe ndai hku tsun ai: ‘Nan gaw nye kasha ni a matu grai kaja ai num rai nna nye a matu mung grai myitsu ai kanam ni rai ma ai. Nan lahkawng hpe ngai dinghku bai de shangun mayu ai. Dai majaw, Moba mung de bai wa mu.’ Shan bai tsun ai gaw: ‘Anhte nang hpe tsawra ai. Nang hte n kam hka ai.’ Naomi gaw shan hpe wa na matu matut tsun ai. Hpang hta, Orpa gaw nhtang wa mat nna Ruhta chyawm gaw shi hte arau ngam nga ai. Naomi gaw Ruhta hpe ndai hku tsun ai: ‘Orpa gaw na a amyu hte na a hpara ni hpang de wa mat sai. Shi hte arau wa su.’ Raitim Ruhta gaw: ‘Ngai nang hpe n kam hka ai. Na a amyu gaw nye a amyu, na a Karai gaw nye a Karai re’ nga nna tsun ai. Ruhta dai hku tsun ai majaw Naomi kade daram kabu mat na hpe shingran yu u.

Ruhta hte Naomi gaw muk-yaw mam dan hpang ai aten hta Israela mung de du wa ma ai. Lani mi hta, Ruhta gaw Bua a hkauna hta nlim gut na matu sa mat ai. Bua gaw Rahab a kasha re. Ruhta gaw Moba numsha rai nna Naomi a ntsa sadi dung ai lam hpe Bua na ai. Bua gaw hkauna kaw nna Ruhta hta na matu, mam loi mi ngam da ya u nga nna shi a bungli masha ni hpe htet da ai.

Dai shana hta, Naomi gaw Ruhta hpe: ‘Dai ni kadai na hkauna hta bungli  galaw wa ai rai?’ nga nna san ai. Ruhta gaw: ‘Bua ngu ai masha a hkauna hta re’ nga nna bai tsun ai. Naomi shi hpe bai tsun ai gaw: ‘Bua gaw nye madu wa a jinghku re. Kaga num sha ni hte arau shi a hkauna hta matut nna bungli galaw nga u. Dai shara gaw na a matu shim lum na re.’

Ruhta gaw muk-yaw mam dan ngut ai aten du hkra Bua a hkauna hta matut nna bungli galaw ai. Bua gaw Ruhta bungli shakut ai hte grai ram ai num re ai hpe sadi hkrup ai. Dai aten hta, kasha shadang sha n nga ai ala langai si mat yang, dai ala a jinghku gaw shi a madu jan hpe mai la ai. Dai majaw, Bua gaw Ruhta hpe hkungran la ai. Shan hta Obed ngu ai shadang sha lu wa ai. Shi gaw hpang hta, Dawi Hkawhkam a kaji dwi byin wa ai. Naomi a manang ni mung grai kabu ya ma ai. Shanhte gaw: ‘Yehowa gaw shawng nnan nang hpe grai myitsu ai Ruhta hpe jaw wa nna, ya gaw kashu bai jaw sai. Yehowa shagrau hkrum u ga’ nga nna tsun ai.