Elakana ngu ai Israela masha langai hta Hana hte Penina ngu ai madu jan lahkawng nga ai. Raitim, Elakana gaw Hana hpe grau tsawra ai. Penina gaw Hana hpe aten shagu dang sha ai. Hpa majaw nga yang, shi gaw kasha lu nna, Hana chyawm gaw langai mi pyi n lu ai majaw re. Shaning shagu, Elakana gaw shi a nta masha ni hpe Shilo mare kaw nga ai nawku sum hta, nawku daw jau na matu woi sa ai. Dai shara kaw nga taw ai lani mi hta, Elakana gaw shi grai tsawra ai Hana, grai yawn taw ai hpe sadi hkrup ai. Elakana ndai hku tsun ai: ‘Hana e, hkum hkrap u. Ngai nga ai le. Ngai nang hpe grai tsawra ai.’

Dai hpang, Hana gaw pru mat nna langai hkrai akyu sa hpyi ai. Shi hpe karum ya na matu, Yehowa hpang akyu hpyi let hkrap n zim hkraw ai. Hana gaw Yehowa hpe ndai hku ga sadi jaw ai: ‘Yehowa e, lama na ngai hpe shadang sha jaw yang, dai shadang sha hpe prat tup na a amu gun shangun ai hku nna, nang hpe bai jaw na.’

Hkinjawng Agyi Eli gaw Hana hkrap ashut nga ai hpe mu yang, tsabyi nang taw ai ngu shadu ai. Hana ndai hku tsun ai: ‘Madu e, ngai nang taw ai n re. Ngai hta grai yak ai manghkang nga nna, dai lam Yehowa hpe tsun dan nga ai re.’ Eli gaw Hana hpe tsun shut sai lam chye nna, shi hpe ndai hku tsun ai: ‘Nang ra ai hpe Karai Kasang jaw u ga law!’ Hana mung myit grai simsa let wa mat ai. Laning mi n hpring shi ai laman, Samuela ngu ai shadang sha langai lu wa ai. Hana kade daram kabu na hpe shingran yu u.

 Hana gaw Yehowa hpe jaw da ai ga sadi hpe n malap ai. Samuela hpe chyu jahka ngut ai hte kalang ta, nawku sum hta amu gun na matu shaga sa wa ai. Eli hpe shi ndai hku tsun ai: ‘Ndai shadang sha lu na matu ngai akyu hpyi wa ai. Shi a prat hpe Yehowa a amu gun na matu ngai sa jaw ai re.’ Elakana hte Hana gaw Samuela hpang shaning shagu sa nna, palawng lawng wawng kaji la sa ya ai. Yehowa gaw Hana hpe shadang sha masum hte shayi sha lahkawng kahtap nna bai jaw ai.