Mawshe Sina Bum kaw du nga ai shaloi, Yehowa gaw laksan ginsum langai gap na matu tsun wa ai. Dai hpe nawku sum ngu shaga ai. Dai shara hta Israela ni shi hpe nawku na matu re. Nawku sum hpe shanhte htawt ai shara de hpai hkawm lu ai.

Yehowa gaw: ‘Nawku sum gap ai hta ra ai arai ni hpe jaw na matu Israela ni hpe tsun dat u’ nga nna Mawshe hpe tsun ai. Israela ni mung gumhpraw, magri, hpu ging ai nlung hte ja rai ni sa jaw ma ai. Sagu mun, lachyit nba, dusat shan hpyi hte kaga arai law law hpe mung sa jaw ma ai. Shanhte grai gam jaw gam ya ai majaw: ‘Ram sai! Hpa n la sa ra sai’ nga nna pyi Mawshe tsun ra ai.

Atsam marai rawng ai num, la law law gaw nawku sum gap ai hta karum ma ai. Yehowa gaw shanhte bungli galaw ai hta atsam nga wa hkra nyan hpaji jaw ya ai. Nkau mi gaw ri kaboi ai, ri da da ai, hkri hkri ma ai. Nkau mi gaw nlung garang ai amu, aja dup ai amu, hpun tawk ai amu ni galaw ma ai.

Shanhte ni gaw Yehowa matsun ai hte maren nawku sum hpe gap ma ai. Shanhte gaw nawku sum hpe Chyoi Pra ai gawk hte Chyoi Pra Htum ai gawk ngu nna lahkawng brang garan na matu grai tsawm ai nba grang galaw ma ai. Chyoi Pra Htum ai gawk na ga shaka sumpu hpe shaji hpun, ja ni hte galaw da ai. Chyoi Pra ai gawk kaw gaw wan shadaw langai, sha ku langai hte manam pyaw ai baw nat nawng na hkungri langai nga ai. Wang kata hta gaw magri jarung langai hte tawn hkungri kaba langai nga ai. Ga shaka sumpu gaw Israela ni Yehowa hpe madat mara na ngu ai shanhte a ga sadi hpe bai myit dum wa shangun ai. Ga shaka ngu ai gaw hpa rai kun? Dai gaw laksan ga sadi jaw ai hpe tsun ai re.

 Yehowa gaw Arun hte shi a kasha ni hpe nawku sum hta hkinjawng ni hku nna amu gun na matu lata wa ai. Shanhte gaw nawku sum hpe atsawm yu lajang ra nna, dai shara hta Yehowa hpe shagu hkungga nat nawng ra ai. Hkinjawng agyi re ai Arun langai sha Chyoi Pra Htum ai gawk de shang na ahkang nga ai. Shi gaw shi a yubak ni, shi nta masha ni a yubak ni hte Israela amyu ting a yubak ni a matu laning mi hta kalang, dai shara de shang nna hkungga nat nawng ai.

Israela ni gaw Egutu mung na pru wa ai, laning mi na ai hpang nawku sum hpe gawgap ngut kre wa ai. Ya, shanhte hta Yehowa hpe nawku daw jau na shara nga sai.

Yehowa gaw nawku sum hpe shi a hpung shingkang hte jahpring ya nna dai ntsa hta sumwi ka-up nga ai. Sumwi ni nawku sum hpe ka-up nga dingyang, dai shara hta sha Israela ni nga ma ai. Raitim dai sumwi shalun la hkrum ai hpe mu yang, shanhte htawt ra na aten du sai hpe chye ma ai. Nawku sum hpe adaw achyen hku galaw nna sumwi htawt ai shara de hpai hkawm ma ai.