Israela ni gaw mayam hku nna bungli galaw na matu atik anang shadut hkrum ai. Yehowa gaw Mawshe hte Arun hpe Hpara-u hpang de sa nna ndai hku tsun shangun ai: ‘Nye a masha ni ngai hpe nawku na matu nam mali de sa na ahkang jaw rit.’ Hpara-u gaw gumrawng let ndai hku tsun ai: ‘Yehowa tsun ai hpe ngai hpa zawn n nawn ai. Israela ni hpe sa na ahkang ngai n jaw ai.’ Dai hpang Hpara-u gaw shanhte hpe amu galaw ai hta grau yak hkra di ai. Yehowa gaw Hpara-u hpe sharin shaga na matu ra wa sai. Gara hku galaw na hpe chye ai kun? Shi gaw Egutu mung ntsa Ari Zinli Shi du shangun dat ai. Yehowa gaw Mawshe hpe ndai hku tsun ai: ‘Hpara-u gaw nye a ga n madat ai. Jahpawt manap hta, Nila hkanu kaw shi nga nga na ra ai. Nye masha ni hpe n dat ai majaw, Nila hkanu na hka ni yawng gaw sai byin mat na ngu sa tsun su.’ Mawshe gaw ga madat nna Hpara-u hpang de sa ai. Hpara-u yu nga ai shaloi, Arun gaw Nila hka hpe shi a daw hkrawng hte kayat dat ai. Hkanu gaw sai tai mat wa nna nga ni mung si mat ai. Dai majaw, hkanu gaw yat bat manam wa ai. Hka mung n kaja sai majaw n mai lu sai. Hpara-u gaw Israela ni hpe n sa shangun ai sha matut ningdang nga ai.

 Sanit ya na ai hpang, Yehowa gaw Mawshe hpe Hpara-u hpang de ndai shiga tsun shangun ai: ‘Nang nye masha ni hpe n sa shangun yang Egutu mung ting gaw shu ni hte hpring wa na.’ Arun gaw shi a daw hkrawng hpe sharawt dat ai shaloi, mung ting shu ni hkrai rai mat ai. Shanhte a nta ni, yup ra ni hte shat ban ni hta shu ni hpe mu ma ai. Shu ni gaw shara shagu hta nga nga ai. Hpara-u gaw ndai ari zinli hpe jahkring kau ya na matu Mawshe hpe Yehowa hpang hpyi nem shangun ai. Hpara-u gaw Israela ni hpe sa shangun na ngu ga sadi jaw ai. Dai majaw Yehowa gaw ari zinli hpe jahkring kau ya ai. Raitim, Egutu masha ni gaw shu chyasi ni hpe hkan hta ra nna manu mana sumpum mat ai. Shu chyasi bat gaw, mung ting manam mat ai. Raitim, Hpara-u gaw masha ni hpe sa na ahkang bai n jaw ai.

Yehowa gaw Mawshe hpe ndai hku bai tsun ai: ‘Arun gaw shi a daw hkrawng hte ga hpe kayat ra ai. Rai yang, ga nhpu gaw kaji nna kawa chye ai machyi ni tai wa na.’ Kalang ta, shara shagu hta machyi ni hkrai rai mat ai. Hpara-u a masha nkau mi ndai hku tsun ai: ‘Ndai ari zinli gaw Karai Kasang kaw nna sa ai re.’ Raitim, Hpara-u gaw Israela ni hpe sa na ahkang n jaw shi ai.