Isak gaw Rebeka hpe hkungran ai shaloi asak 40 rai sai. Rebeka hpe shi grai tsawra ai. Aten ni na wa ai shaloi, shan gaw ma marun lu wa ai.

Ma gam gaw Esaw rai nna, ma naw gaw Yaku re. Esaw gaw shinggan de pru ai hpe ra sharawng nna, dusat ni rim ai hta grai ram ai. Raitim, Yaku gaw nta kaw nga ai hpe ra ai.

Dai prat hta, kawa si yang ma gam mahtang gaw, gumhpraw ni, lamu ga ni hpe grau law hkra lu la ai. Dai hpe sali wunli ngu shaga ai. Isak a dinghku hta, lu la na sali wunli gaw Yehowa hte Abraham tawn da ai ga sadi hte mung seng nga ai. Esaw gaw dai ga sadi hpe manu n shadan tim, Yaku gaw grai ahkyak ai hpe chye ai majaw manu shadan ai.

Lani mi hta Esaw gaw, shani tup jaugawng gawng ai kaw nna, grai ba let nta de bai wa ai. Dai shaloi, shi gaw, Yaku shadu nga ai grai mu ai malu masha a sama lu nna, ndai hku tsun ai: ‘Ngai grai kaw si nga ai. Ngai hpe dai shapre shat mai jaw rit.’ Yaku ndai hku bai tsun ai: ‘Ngai jaw na, raitim ngai hpe ga sadi langai jaw rit. Na a sali wunli ngai hkam la na.’ Esaw bai tsun ai: ‘Nye a sali wunli hpe ngai hpa zawn n nawn ai. Nang mai la ai. Dai hpe sha, sha mayu ai.’ Esaw dai hku galaw ai gaw hpaji rawng ai kun? N rawng ai. Esaw gaw grai manu dan ai hpe shapre shat mai wan mi hte galai kau ai.

Isak dingla wa ai shaloi, kasha ma gam hpe shaman chyeju jaw na aten du wa sai. Raitim, kasha ma naw shaman chyeju lu na matu Yaku  hpe Rebeka karum ya wa ai. Dai hpe Esaw chye mat ai shaloi grai masin pawt nna, marun kanau hpe sat na matu hkyen wa ai. Isak hte Rebeka gaw Yaku hpe makawp maga ya mayu ai majaw, ndai hku tsun ai: ‘Esaw myit simsa mat ai aten du hkra na a katsa Laban hte arau sa nga su.’ Yaku gaw shi kanu yan kawa a ga madat nna asak lawt na matu hprawng mat wa ai.