Aten ni na wa ai hte maren, mungkan ntsa hta masha grai law wa sai. Masha law malawng gaw n kaja ma ai. Sumsing lamu hta nga ai lamu kasa nkau mi pyi n kaja wa ma ai. Shanhte gaw sumsing lamu nta hpe kau da nna mungkan ga de yu wa ai. Shanhte hpa majaw dai hku galaw ai hpe chye ai kun? Shanhte gaw masha hkum hkrang hpe dagraw la nna numsha ni hte hkungran mayu ai majaw re.

Lamu kasa ni hte numsha ni hta shadang sha ni lu wa ai. Dai shadang sha ni gaw kaba wa ai hte maren, grai n-gun ja wa nna kaga masha ni hpe dang sha ai. Shanhte gaw masha ni hpe hkra machyi shangun ai. Yehowa gaw dai zawn re ai hpe matut byin na ahkang n jaw ai. Dai majaw, n hkru n kaja ai masha ni hpe hka sha-u ing nna jahten kau na matu dawdan wa ai.

Raitim, masha langai gaw shanhte hte n bung ai. Yehowa hpe shi tsawra ai. Shi a amying gaw Noa re. Shi hta madu jan nga ai. Shem, Ham, Yahpet ngu ai shadang sha masum mung nga ai. Dai kasha ni hta ningrum ningtau nga ma ai. Yehowa gaw Noa hpe grai kaba ai sanghpaw li shachyaw na matu tsun ai. Rai yang she, shi hte shi a nta masha ni yawng Hka Sha-u Ing wa yang asak lawt lu na re. Sanghpaw li gaw grai kaba ai sutdek hte bung nna hka ntsa hta waw lu ai. Yehowa gaw Noa hpe sanghpaw li kata de dusat ni hpe jashawn na matu mung tsun ai. Rai yang she dusat ni mung asak lawt lu na re.

Noa gaw kalang ta sanghpaw li shachyaw hpang wa ai. Noa hte shi a nta masha ni gaw 50 ning daram shachyaw ma ai. Yehowa shanhte hpe tsun da ai hte maren, tup hkrak shachyaw ma ai. Dai aten laman, Noa gaw masha ni hpe Hka Sha-u Ing na lam mung sadi jaw wa ai. Raitim, kadai mung n madat ma ai.

Hpang jahtum hta, sanghpaw li kata de shang na aten du wa ai. Matut nna hpa byin na hpe yu yu ga.