Lam n lu hkawm ai la langai gaw, shani shagu nawku htingnu chyinghka lam kaw dung nna, hpyi sha taw nga ai. Lani mi hta, Petru yan Yawhan nawku htingnu de sa wa ai hpe shi mu dat ai. Dai majaw, shi gaw shan hpe ndai hku tsun ai: ‘Ngai hpe lama ma jaw rit.’ Petru ndai hku tsun ai: ‘Gumhpraw hta grau kaja ai lama ma ngai hta nga ai. Yesu a mying ningsang hte rawt nna lam hkawm u.’ Petru gaw shi hpe sharawt ya dat yang, shi lam lu hkawm mat ai. Dai mauhpa lam a majaw, masha hpawng gaw grai kabu nna masha law law gaw kamsham ai ni byin wa ai.

Raitim, hkinjawng ni hte Saduke ni gaw grai masin pawt ma ai. Shanhte gaw kasa ni hpe rim nna, nawku htung ningbaw ni hte hpawng de da ai Sanhedrin tara rung de shaga sa mat ai. Dai kaw du yang ndai hku san ai: ‘Ndai wa hpe shamai ya na matu nanhte gara kaw na atsam lu ai kun?’ Petru ndai hku tsun ai: ‘Nanhte sat kau ai Yesu Hkristu kaw na anhte lu la ai re.’ Nawku htung ningbaw ni gaw ndai hku marawn ai: ‘Yesu a lam hkum tsun!’ Raitim, kasa ni ndai hku bai tsun ai: ‘Anhte shi a lam matut tsun nga na re. N lu hkring ai.’

Petru yan Yawhan gaw lawt ai hte kalang ta, kaga sape ni hpang de sa nna, byin wa ai lam yawng hpe tsun dan ai. Shanhte gaw arau zup hpawng nna Yehowa kaw ndai hku akyu hpyi ma ai: ‘Na a amu matut gun hpai lu na matu, chyeju hte anhte hpe nden marai jaw rit.’ Yehowa gaw shanhte hpe chyoi pra ai wenyi jaw ya ai majaw, shanhte gaw matut nna hkaw tsun lu ai, shamai ya lu ai. Kamsham ai masha ni gaw grau grau law wa ai. Saduke ni gaw grai manawn wa nna, kasa ni hpe rim nna htawng jahkrat kau ai. Raitim, dai shana hta sha Yehowa gaw lamu kasa langai shangun dat ai. Shi gaw htawng chyinghka hpe hpaw ya nna kasa ni hpe ndai hku tsun ai: ‘Nawku htingnu de sa nna, dai kaw sa sharin ya su.’

Hpang jahpawt hta, Sanhedrin tara rung de ndai hku sa shana ma ai: ‘Htawng chyinghka ni pat taw nga tim, nanhte rim da ai masha ni gaw n nga mat sai! Shanhte gaw nawku htingnu kaw du taw nga nna masha ni hpe sharin achyin ya nga ai.’ Dai majaw, kasa ni bai rim hkrum nna, Sanhedrin de bai du wa ma ai. Hkinjawng agyi ndai hku tsun ai: ‘Yesu a lam n tsun na matu nanhte hpe matsun da ngut sai le!’ Petru gaw: “Masha ga madat na hta, Karai Kasang a  ga mahtang grau madat na ga ai” nga nna bai tsun ai.

Dai majaw, nawku htung ningbaw ni gaw grai masin pawt nna, kasa ni hpe sat kau mayu wa ai. Raitim, Gamale ngu ai Hparishe langai gaw tsap nna ndai hku tsun ai: ‘Atsawm naw myit yu mu. Karai Kasang gaw shanhte hte arau rai yang rai taw nga na. Nanhte Karai Kasang hpe ninghkap mayu ai kun?’ Shanhte gaw shi a hpaji jaw ga hpe hkap la ma ai. Shanhte gaw kasa ni hpe lasik hte kayat nna, matut n hkaw tsun na matu kalang bai sadi jaw dat ai. Dai hpang, shalawt ya dat ai. Raitim, kasa ni hkaw tsun n lu hkra shanhte pat shingdang n lu ai. Shanhte gaw kabu gara shiga hpe nawku htingnu hte nta langai hpang langai de sa nna, nden marai rawng let matut hkaw tsun nga ma ai.