2018 January shata kaw nna, Prat Hte Magam Zuphpawng Shaman Laika Buk a makawp hta, tsun shaga ladat ni ngu ai hkrang nsam lawm wa ai. Anhte ni gaw, masha ni hpe laili laika majoi mi sha garan jaw na malai, masha ni hte tsun shaga lu hkra myit maju jung na matu n-gun jaw hkrum wa ai. Hkaw tsun masha ni a tsun ai ladat hpe galai shai lu na matu, tsun shaga ladat video hta Chyum Laika hpe sha lang nna, hkaw tsun ai hpe madun da ai. Raitim, dai gaw nta langai hpang langai sa ai shaloi, laili laika ni hpe n mai garan sai lachyum kun? N re ai! Ga shadawn, garan laika ni gaw ga shaga hpang lu na matu karum ya lu ai. Garan laika yawng hpe lang ai shaloi, lawu na ladat ni hpe akyu jashawn mai ai.

1. Laika man a shawng kaw na ga san ni hpe san u.

2. Laika man lahkawng a ntsa kaw na, Chyum Laika mahtai ni hpe madun dan u. Aten lu yang, garan laika a kata na lam nkau mi hpe hti nna bawngban u.

3. Nta madu hpe garan laika jaw nna, n bawngban shi ai daw hpe hti da na matu n-gun jaw u.

4. N wa shi yang, “Sumru Yu Ga” ga san hpe madun nna, hpang kalang bai sa yang, Chyum Laika kaw na mahtai hpe bawngban lu hkra lajang u.

Nang bai kawan ai shaloi, mahtai hpe bawngban nna, hpang na lang hta bai bawngban na matu, kaga ga san langai hpe san da u. Hpang jahtum laika man hta matsun da ai laili laika (sh) anhte a website kaw na ga san langai hpe lata mai ai. Htap htuk ai aten hta, Karai Kasang Kaw Na Kabu Gara Shiga brochure (sh) Sharin Achyin Hkingrai Ni kaw na, kaga hkaja mai ai laika hpe shachyen ya mai ai.