Tsa hpe tara upadi hte n tawt lai ai sha lu na ahkang nga ai rai yang gaw, lu ai hpe Chyum Laika hta hkum pat ai lam n nga ai. Raitim, lu lai ai hpe chyawm gaw hkum pat da ai.—Shakawn 104:15; 1 Korinhtu 6:​10.

Lama na, tara upadi hku nna (sh) na nu yan wa gaw nang hpe tsa n lu shangun ai masa hta, tsa lu na matu shadut hkrum jang nang hpa galaw na?

•  Lu ngut ai hpang byin na hpe myit u

•  Myit dawdan da u

•  Ramma shada tsun ai lam

Tsa lu ai gaw pyaw shangun ai ngu nna, na a manang ni gaw tsun na re. Raitim, tsa lu ngut ai hpang hpa ni byin wa chye ai kun?

• Dam jahkrat hkrum chye ai. Upadi hku nna ahkang n jaw shi ai asak hta tsa lu ai rai jang, dam jahkrat hkrum na, nhkru ai amu hku nna sawn la hkrum na, laizin zing hkrum na, shawa bungli hpe galaw shangun na, htawng jahkrat ai lam ni hpe hkrum chye ai.—Roma 13:3.

• Mying hten ai. Tsa gaw hkrit kaya ai myit hpe shayawm kau ya ai. Dai zawn byin ai shaloi, hpang de she myit malai lu shangun ai ga ni tsun ai (sh) galaw hkrup ai ni byin chye ai. (Ga Shagawp 23:31-33) Dai ni aten na zawn social media prat hta, na a arawn alai a majaw prat tup mying hten mat chye ai.

• Ninghkap na atsam yawm ai. Tsa chyaru lu ai majaw, tinang a hkum hkrang hpe hkra machyi ai (sh) ngang hte seng nna akyang hten ai lam ni aloi sha byin chye ai. Tsa lu ai aten hta kaga masha a uphkang ai npu de aloi sha du mat chye ai majaw, tinang hpe shoihpa byin shangun ai (sh) upadi tawt lai ai amu ni galaw hkrup chye ai.

• N lu n mai byin mat ai. Asak kaji ai aten hta tsa lu ai ramma ni gaw, tsa n lu ai sha n nga lu ai ni byin mat chye ai ngu nna, tam sawk sagawn ai lam galaw ai ni gaw tsun ai. Myit pu ba ai majaw, garen ai majaw, lagawn ai majaw ngu tsun nna tsa lu ai. Dai zawn galaw ai gaw, jahtum hta tsa hpe dawn kau na matu yak chye ai.

• Si ai. Kade n na shi ai shaning ni laman, Amerikan hta tsa lu nna mawdaw gawt ai a majaw minit 52 na jang masha langai asak si sum nga ai. Dai majaw, 5 ning laman hta asak 21 ning lawu nga ai ramma 1500 jan gaw, tsa lu nna mawdaw hkala nba byin ai lam ni a majaw asak si sum nga ai. Tinang tsa n lu ai raitim pyi, tsa lu nna mawdaw gawt ai wa a hpang hta hkan jawn ai gaw asak shoihpa nga ai.

N htap htuk ai hku tsa lu ai majaw byin wa chye ai manghkang ni, shoihpa ni hpe lu koi hkra, tinang gara hku galaw na lam tau hkrau dawdan da mai ai.

Chyum Laika Npawt Tara: “Hpaji rawng ai wa gaw, n kaja ai hpe tau chye nna, koi kau nga ai.” (Ga Shagawp 22:3) Tsa lu ngut ai shaloi she, tinang myit maju jung let galaw ra ai bungli hpe galaw ai (sh) mawdaw gawt ai gaw hpaji n rawng ai lam re.

Dawdan da ai: ‘Tara upadi hta masat da ai asak n du shi yang, aten garai n du shi yang ngai tsa n lu ai.’

Chyum Laika Npawt Tara: “Langai ngai kaw madat mara na nga, tinang dai shang nna mayam tai wa” ai. (Roma 6:16) Na a manang ni tsa lu ai majaw nang mung hkan lu ai rai jang, nang hpe hkang na matu shanhte hpe ahkang jaw nga ai re. Lama na, nang gaw majoi lagawn nna lu ai (sh) myit pu ba ai lam hkoi mat na matu lu ai rai jang, nang hta manghkang ni hpe hparan na atsam n nga shi ai ngu ai lachyum re.

Dawdan da ai: ‘Tsa lu na matu manang ni n-gun jaw ai hpe ngai hkap la na n re.’

Chyum Laika Npawt Tara: “Tsabyi jahku lu lai ai ni hte, shan sha marim ai ni hpe, hkum kanawn et.” (Ga Shagawp 23:20) N kaja ai kanawn manang ni gaw na a dawdan lam ni hpe jahten kau chye ai. Tsa chyaru hpe shut ai hku akyu jashawn ai manang ni hte kanawn ai gaw nang hpe hkra machyi shangun chye ai.

Dawdan da ai: ‘Tsa chyaru hpe shut ai hku akyu jashawn ai manang ni hte kanawn ai hpe ngai koi sana.’