Karum ya lu ai. Ngwi pyaw ai kun dinghku lu na matu wan hku law ai masha ni hpe karum ya wa ai Chyum Laika hta na hpaji jaw ga nkau mi hpe lawu hta madun da ai.

1.   Tara shang hkungran u. Prat dingsa tsawra mat na ngu ga sadi jaw nna, tara shang hkungran ai gaw dinghku ngwi pyaw lu na matu ahkyak dik htum lam re.​—Mahte 19:4-6.

2.   Tsawra myit hte hkungga ai lam madun u. Tinang hpe tsun shaga shangun mayu ai hte maren, tinang a ningrum ningtau hpe tsun shaga ai gaw tsawra myit hte hkungga ai lam madun ai re.​—Mahte 7:12; Ehpesu 5:25, 33.

3.   Myit machyi shangun ai ga hkum tsun. Tinang a ningrum ningtau gaw myit machyi hkra tsun wa yang pyi, shi hpe sumnung ai hku bai tsun shaga u. (Ehpesu 4:31,32) Ga Shagawp 15:1 hta ndai hku tsun da ai: “Si mani hte htan ai ga gaw, myit kahtet ai hpe shakawp ya nga ai; Kajet kajau re ai ga chyawm gaw, pawt sindawng ai hpe sharawt ya nga ai.”

4.   Shada da sadi dung u. Na a ningrum ningtau hpe tsawra nna shi hte sha arau nga u. (Mahte 5:28) “Hkungran ai lam gaw, yawng mayawng a man e arawng lu u ga; hkungran ai yup ra mung, san seng nga u ga” ngu nna Chyum Laika hta tsun da ai.​—Hebre 13:4.

5.   Kashu kasha ni hpe tsawra myit hte sharin shaga u. Kashu kasha ni hpe sharin shaga ai shaloi, laja lana sawng ai hku (sh) ahpa atang lam hku nna sharin shaga ai hpe koi u.​—Ga Shagawp 29:15; Kolose 3:21.