Hkritung na ma hpe shaw kau ai hte bung ai “ma shabrai ai” ngu ai ga si hpe Chyum Laika hta tsun da ai lam n nga ai. Raitim, chyum daw law law hta Karai Kasang gaw garai n shangai shi ai ma hte hpawn, masha a asak hpe gara hku mu ai lam tsun da ai.

 Asak ngu ai gaw Karai Kasang jaw ai kumhpa langai re. (Ningpawt 9:6; Shakawn 36:9) Karai Kasang gaw Hkritung na ma a asak hte hpawn, asak yawng hpe manu shadan ai. Dai majaw, garai n shangai shi ai ma hpe dingsang sat ai gaw masha sat ai hte bung ai.

 Israela masha ni hpe Karai Kasang jaw ai Tara hta ndai hku tsun da ai: “Masha shada da kamu hkat nna hkum n manu ai numsha hpe hkra wu ai majaw, shi nbya bya kau hkra rai ti mung, nma kaga n kap yang gaw, dai num a madu wa tawn ai hku shi teng teng wa lu na rai nna, tara agyi ni daw dan ai hte maren jaw lu na rai wu ai. Rai ti mung nma kap yang gaw, asak a matu asak,” jaw ra na re.​—Pru Mat 21:22, 23.

•  Masha a asak gaw gara hku byin wa ai kun?

•  Ma shabrai ga ai wa hpe Karai Kasang gaw mara raw ya ai kun?

•  Ma hte kanu a asak shoihpa nga ai rai yang, ma shabrai ai lam gaw shut na kun?

 Ma hkum nnan kap ai aten kaw nna, asak hkrung ai masha re ai ngu nna Karai Kasang mu ai. Karai a Mungga re ai Chyum Laika hta, garai n shangai shi ai ma hpe masha langai hku nna tsun ai. Karai Kasang gaw shangai da sai ma hte garai n shangai shi ai ma hpe, maren sha mu mada ai lam ga shadawn nkau mi hpe sawn maram yu u.

•   Hkawhkam Dawi gaw chyoi pra ai wenyi shatsam hkrum ai majaw, “ngai garai n shangai wa ai aten kaw nna pyi, nang ngai hpe mu nit dai” ngu nna tsun wa ai. (Shakawn 139:16, JCLB) Dawi garai n shangai shi ai aten kaw nna, Karai Kasang gaw shi hpe masha langai hku nna mu sai.

•   Yeremia gaw laksan yaw shada lam langai a matu myihtoi byin wa na hpe, shi n shangai shi ai aten kaw nna pyi Karai Kasang chye da ai. Karai Kasang gaw Yeremia hpe ndai hku tsun ai: “Ngai nang hpe nnu a hkritung e garai n shachyaw yang pyi, ngai nang hpe chye nngai; nang garai n shangai yang pyi, ngai nang hpe shachyoi shapra nngai: masha amyu ni a myihtoi tai na, ngai nang hpe aya dang da ni ai, nga ai.”​—Yeremia 1:5.

•   Chyum Laika ka ai tsi sara Luka gaw, garai n shangai shi ai ma hte nnan shangai da ai ma a matu Grik ga si langai hpe sha lang wa ai.​—Luka 1:41; 2:12, 16.

 Moi shawng de ma shabrai ga ai masha hpe Karai Kasang mara raw ya lu ai. Asak hpe Karai Kasang mu mada ai zawn mu yang, shanhte hta mara naw nga ai ngu nna hkamsha sana n re. “Yehowa gaw matsan dum ai, sumnung ai, . . . Sinpraw maga gaw, sinna maga hte tsan nga ai hte maren, Shi anhte a yubak hpe anhte hte shatsan kau ya mi ai.” a (Shakawn 103:8-12) Ma shabrai hkrup ai lam hte hpawn, moi de galaw shut wa ai mara ni a matu teng sha myit malai lu ai ni hpe Yehowa gaw mara raw ya na re.​—Shakawn 86:5.

 Garai n shangai shi ai ma a asak hte seng nna Chyum Laika hta tsun da ai lam hpe chye da yang, kanu shing nrai ma a asak shoihpa nga chye ai majaw ma shabrai na n re ai.

 Ma shangai nga ai shaloi, byin chye ai masa langai gaw kanu a asak shing nrai ma a asak hpe lata ra wa yang gara hku kun? Ndai masa hta gaw, kade a asak hpe lata na hpe tinang hkrai dawdan ra na re.