Chyum Laika mahtai

 Hkalup hkam ai ngu ai gaw, hka hta tsep kawp lup ai lam re. a Chyum Laika hta, hkalup hkam ai ni a lam law law lawm ai. (Kasa 2:41) Langai gaw, Yawdan Hka hta hkalup hkam wa ai Yesu re. (Mahte 3:13, 16) Hpang langai gaw, bu hkawm let, hka nga ai shara hta hkalup hkam wa ai Ehtiopi unuk re.—Kasa 8:36-40.

 Yesu gaw, shi hpang hkan ai ni hkalup hkam ra ai ngu sharin ya ai. (Mahte 28:19, 20) Kasa Petru mung dai zawn sha sharin ya ai.—1 Petru 3:21.

Ndai sumhpa hta

•  Hkalup ngu ai gaw hpa rai kun?

•  Ma chyangai ni hpe hkalup jaw ai, hka lapri ai hte seng nna Chyum Laika hta hpa tsun da ai kun?

•  Kawa a, Kasha a, chyoi pra ai Wenyi a amying nsang hta hkalup hkam ai ngu ai gaw hpa hpe tsun mayu ai kun?

•  Kalang mi hta n-ga hkalup hkam yang mara nga ai kun?

•  Chyum Laika hta tsun da ai kaga hkalup ni

•  Hkristan hkalup hte seng nna chye na shut ai lam ni

 Hkalup ngu ai gaw hpa rai kun?

 Hkalup hkam ai ngu ai gaw, mara ni hpe myit malai lu ai lam, gara masa hta mi rai rai, Karai Kasang myit ra ai hte maren galaw na ngu ga sadi tawn ai lam hpe masha ni mu hkra madun ai kumla re. Karai Kasang hte Yesu hpe, prat hkrun lam shagu hta ayan na madat mara ai mung lawm ai. Hkalup hkam ai gaw, htani htana asak hkrung lu hkra, Karai Kasang hpyi shawn da ai prat hkrun lam hte maren, hkawm hpang ai lam re.

 Prat hpe galai shai kau sai lam madun ai hku nna, hka hta hkalup hkam ai re. Dai gaw grai htap htuk ai kumla re. Hpa majaw kun? Hkalup hkam ai hpe Chyum Laika hta, lup makoi ai lam hte shingdaw da ai. (Roma 6:4; Kolose 2:12) Hka hta lup ai gaw, prat hkrun lam dingsa hpe lup kau ai rai nna, hka kaw na bai pru wa ai gaw, apnawng da ai Hkristan hku nna prat nnan hte hkawm hpang ai re.

 Ma chyangai ni hpe hkalup jaw ai, hka lapri ai hte seng nna Chyum Laika hta hpa tsun da ai kun?

 “Daidaw mying jaw ai,” “hka lapri ai” lam hte seng nna, Chyum Laika hta n tsun da ai. b Ma chyangai ni hkalup hkam ging ai ngu nna mung n sharin ya ai.

 Ma chyangai ni hpe hkalup jaw ai gaw, Chyum Laika hte nhtan shai ai. Hkalup hkam mayu ai ni a matu, Chyum Laika hta hpyi shawn da ai lam ni nga ai. Ga shadawn, Chyum Laika madung sharin achyin lam ni hpe gaw chye na ra ai. Dai sharin achyin lam ni hpe hkan sa ra ai. Mara ni a matu myit malai lu ra ai. Akyu hpyi nna, Karai Kasang kaw tinang hkum tinang apnawng ra ai. (Kasa 2:38, 41; 8:12) Dai zawn hpyi shawn da ai lam ni hpe ma chyangai ni n lu galaw ai.

 Kawa a, Kasha a, chyoi pra ai Wenyi a amying nsang hta hkalup hkam ai ngu ai gaw hpa hpe tsun mayu ai kun?

 “Sape shatai let, Kawa a, Kasha a, chyoi pra ai Wenyi a amying nsang hta, shanhte hpe baptisma jaw nhtawm, ngai nanhte hpe hkang da mada yawng hte hpe hkan shadik lu mu ga, shanhte hpe sharin shaga ya mu” ngu, shi hpang hkan ai ni hpe Yesu matsun da ai. (Mahte 28:19, 20) Kawa a, Kasha a, chyoi pra ai Wenyi a “amying nsang hta” baptisma hkam la ai ngu ai gaw, Kawa a shara, Kasha a shara, ahkang aya, chyoi pra ai wenyi a daw hpe hkap la ai lachyum re. Ga shadawn: Shangai ai kaw na lagaw hten ai wa hpe Petru gaw, “Nazaret wa Yesu Hkristu a amying ningsang hte rawt hkawm wa u” ngu tsun ai. (Kasa 3:6) Hkristu a ahkang aya hpe hkap la ai hku nna, Hkristu a majaw sha mauhpa lam hte shamai ya lu ai lam chye shangun mayu ai majaw, Petru dai hku tsun wa ai re.

•   “Kawa” ngu ai gaw, Yehowa c Karai Kasang hpe tsun ai re. Yehowa gaw Hpan Da Madu, Asak Jaw Ai Madu, Chyahtum Chyalai N-gun Rawng Ai Karai re ai majaw, ahkang aya hpring tup nga ai.—Ningpawt 17:1; Shingran 4:11.

•   “Kasha” ngu ai gaw, anhte a matu asak jaw ya ai Yesu hpe tsun ai re. (Roma 6:23) Shinggyim masha a matu, Karai a yaw shada lam hta Yesu a daw hpe n hkap la yang, hkye hkrang la hkrum na n re.—Yawhan 14:6; 20:31; Kasa 4:8-12.

•   “Chyoi pra ai Wenyi” ngu ai gaw, Karai Kasang a dagu, Karai Kasang asung jashawn ai n-gun atsam hpe tsun ai re. d Hpan ai lam hta, hkrung mahkrung hpe nsoi nsa jaw ai lam hta, myihtoi ni hte kaga masha ni hpe shiga jaw ai lam hta, magam gun ai shaloi n-gun atsam nga shangun ai lam hta, chyoi pra ai wenyi hpe Karai Kasang lang wa ai. (Ningpawt 1:2; Yoba 33:4; Roma 15:18, 19) Karai Kasang gaw, shi a myit mang lam ni hpe matsing da na matu, Chyum Laika ka ai ni hpe lam matsun ai lam hta mung, chyoi pra ai wenyi hpe lang wa ai.—2 Petru 1:21.

 Kalang mi hta n-ga hkalup hkam yang mara nga ai kun?

 Hpung gale ai masha grai law hkra nga ai. Moi nga wa ai nawku hpung kaw, hkalup hkam wa sai nga yang gara hku kun? Hkalup bai hkam yang mara nga na kun? “Madu langai sha, makam masham langai sha, baptisma lam langai sha rai nga ai” ngu tsun da ai Ehpesu 4:5 hpe madung nna, mara nga ai ngu nkau mi tsun ai. Raitim, dai chyum daw gaw, hkalup bai n mai hkam ai ngu tsun nga ai n re. Hpa majaw kun?

 Lawu lahta ga. Ehpesu 4:5 a lawu lahta ga ni hpe yu yang, bung ai makam masham hte Hkristan ni kahkyin gumdin nga ra ai ngu ai lam hpe kasa Pawlu ahkyak shatai tsun taw ai hpe chye lu ai. (Ehpesu 4:1-3, 16) Dai zawn kahkyin gumdin nga lu na matu, Hkristan ni gaw Hkristu Yesu ngu ai Madu langai sha a lam hta hkawm nga ra ai, makam masham bung nga ra ai, Chyum Laika sharin achyin lam ni hpe, maren sha chye na hkawn hkrang nga ra ai, hkalup a matu Chyum Laika hpyi shawn da ai lam ni hpe hkan sa nga ra ai.

 Hkalup hkam da sai nkau mi hpe, hkalup bai hkam na matu kasa Pawlu n-gun jaw ai. Shanhte gaw, Hkristan sharin achyin lam ni hpe atsawm n chye na ai sha hkalup hkam wa ai majaw re.—Kasa 19:1-5.

 Hkalup hkam ra ai lam a npawt. Chyum Laika tengman lam hpe tup hkrak chye na nna hkalup hkam yang she, dai hkalup hpe Karai Kasang hkap la na re. (1 Timohti 2:3, 4) Chyum Laika hte nhtan shai ai nawku htung sharin achyin lam ni hpe madung nna, hkalup hkam wa ai rai yang, dai hkalup hkam ai lam hpe Karai Kasang n hkap la ai. (Yawhan 4:23, 24) Myit madung hte hkalup hkam ai raitim, “tup hkrak tengman ai machye machyang hte maren n re ai.” (Roma 10:2, NWT) Karai a myit ra ai lam hpe lu na matu, Chyum Laika tengman lam hpe hkaja ra ai. Hkaja wa ai hte maren tatut hkan sa ra ai. Karai Kasang hpang tinang hkum tinang apnawng ra ai. Hkalup bai hkam ra ai. Dai zawn masa lam a majaw, hkalup bai hkam ai gaw mara n nga ai. Galaw ging ai hpe galaw nga ai re.

 Chyum Laika hta tsun da ai kaga hkalup ni

 Yesu a hpang hkan ai ni a hkalup hte n bung ai sha, kaga lachyum, masat dingsat hte hkam wa ai hkalup ni a lam mung, Chyum Laika hta madun da ai. Ga shadawn nkau hpe yu yu ga.

 Hkalup Sara Yawhan jaw ai hkalup. e Yuda ni, Yuda nawku htung kaw na hpung gale wa ai ni gaw, Yawhan kaw hkalup hkam wa ai. Mawshe kaw nna Israela ni hpe jaw ai Karai a Tara hpe tawt lai ai mara a matu, myit malai lu ai kumla hku nna hkalup hkam ai re. Meshia re ai Nazaret masha Yesu hpe hkap la na matu, Yawhan a hkalup gaw masha ni hpe jin jin rai nga shangun ai.—Luka 1:13-17; 3:2, 3; Kasa 19:4.

 Yesu hkam ai hkalup. Hkalup sara Yawhan kaw Yesu hkalup hkam wa ai. Dai gaw grai laklai ai. Yesu gaw hkum tsup ai wa re. Mara n galaw da ai. (1 Petru 2:21, 22) Mara ni a matu myit malai lu ai hku nna, “san seng ai myit nsam” lu na matu Karai Kasang kaw hpyi shawn ai hku nna, Yesu hkalup hkam ai n re. (1 Petru 3:21) Myihtoi htoi da ai Meshia (sh) Hkristu hku nna, Karai Kasang a myit ra ai hpe galaw na matu, tinang hkum tinang apnawng ai hku nna hkalup hkam ai re. Karai Kasang myit ra ai lam ngu tsun ai shaloi, anhte a matu asak jaw wa ai lam mung lawm ai.—Hebre 10:7-10.

 Chyoi pra ai wenyi hte hkalup hkam ai lam. Chyoi pra ai wenyi hte hkalup hkam ai lam hpe, Yesu hte hkalup sara Yawhan lahkawng yan tsun wa ai. (Mahte 3:11; Luka 3:16; Kasa 1:1-5) Dai hkalup gaw, chyoi pra ai wenyi a amying nsang hta hkalup hkam ai hte n bung ai. (Mahte 28:19) Hpa majaw kun?

 Yesu a hpang hkan ai ni kaw na, nkau mi sha chyoi pra ai wenyi hte hkalup hkam wa ai. Hkristu hte rau hkawhkam ni, hkinjawng ni hku nna magam gun na matu, shaga la hkrum ai majaw, chyoi pra ai wenyi hte namman chya hkam ai ni re. f (1 Petru 1:3, 4; Shingran 5:9, 10) Shanhte gaw, mungkan Hparadisu kaw htani htana asak hkrung na matu myit mada lam nga ai wan hku law ai Yesu a hpang hkan ai ni hpe uphkang na re.—Mahte 5:5; Luka 23:43.

 Hkristu Yesu hte rau si ai hta hkalup hkam ai lam. Chyoi pra ai wenyi hte hkalup hkam ai ni gaw, “Hkristu Yesu hta e” hkalup hkam ai. (Roma 6:3) Dai majaw, ndai hkalup gaw sumsing lamu kaw Hkristu hte rau uphkang na namman chya hkam ai ni hte sha seng ai. Dai hkalup hkam a majaw, namman chya hkam ai hpung shang langai byin wa ai. Yesu gaw Baw, shanhte gaw hkum hkrang re ai.—1 Korinhtu 12:12, 13, 27; Kolose 1:18.

 Dai hta n-ga, namman chya hkam ai Hkristan ni gaw, “[Hkristu] a si hkam ai hta baptisma hkam” ai. (Roma 6:3, 4) Shanhte gaw, tinang myit ra ai hku n re ai sha, Karai Kasang myit ra ai hte maren asak hkrung ai, mungkan ntsa htani htana asak hkrung na myit mada lam hpe kau da ai hku nna, Yesu hpe kasi la ai. Hkristu a si ai hta hkam wa ai hkalup gaw, shanhte si ai aten hta htum mat ai. Wenyi hkum hkrang hte sumsing lamu asak aprat de hkrung rawt mat ai.—Roma 6:5; 1 Korinhtu 15:42-44.

 Wan hte hkalup hkam ai lam. “Dai wa [Yesu] gaw chyoi pra ai Wenyi hta mung, wan hta mung nanhte hpe baptisma jaw na myit dai: shi a lata hta dai hkuwawn shi lang nga ai rai nna, shi a mam chyarang hpe shi yit jasan nhtawm, shi a mam hpe gaw dum hta shinggyin bang da nna, mam nsan hpe gaw, n sat lu ai wan hte nat kau na ru ai” ngu madat nga ai ni hpe Hkalup Sara Yawhan tsun ai. (Mahte 3:11, 12) Wan hte hkalup hkam ai gaw, chyoi pra ai wenyi hte hkalup hkam ai lam hte n bung ai hpe sadi hkrup ai kun? Yawhan hpa hpe tsun taw ai kun?

 Mam gaw Yesu a ga madat mara ai ni hpe tsun ai. Shanhte gaw, chyoi pra ai wenyi hte hkalup hkam hkrum na matu myit mada lam nga ai. Mam nsan gaw, Yesu a ga n madat ni hpe tsun ai. Shanhte gaw wan hte hkalup hkam ai hpe hkrum na re. Htani htana jahten hkrum na hpe tsun mayu ai re.—Mahte 3:7-12; Luka 3:16, 17.