M’ara tebdum kečč ţ-​ţmeṭṭut-​ik tamɛict-​nwen jmiɛ, a d-​ţbanen wuguren. Ţlalen-​d ahat wuguren-​agi imi yemxallaf wamek i teţxemmimem, wamek i teţḥussum d wamek i teţwalim ddunit. Yezmer lḥal daɣen ţ-​ţiswiɛin iɣef ur tebnim ara i d ssebba neɣ d ayen nniḍen.

Ahat aţ-​ţebɣum aţ-​ţeffrem iqerra-​nwen ɣef iɣeblan m’ara d-​ḍrun, acu kan Adlis Iqedsen yeţweṣṣi-​yaɣ a ten-​nqabel. (Matta 5:23, 24) Ma yella teṭṭebbiqem imenzayen n Wedlis Iqedsen, a d-​tafem tifrat (lḥel) ifazen i iɣeblan-​nwen.

AYEN I D-​IQQAR WEDLIS IQEDSEN: “Illa [...] lweqt i lhedṛa.” (Amusnaw 3:1, 7) Ɛzel-​ed lweqt akken aţ-​ţhedṛeḍ ţ-​ţmeṭṭut-​ik ɣef wugur i d-​temmugrem. Ini-​yas ɛinani ayen i teţḥussuḍ d wayen i teţxemmimeḍ ɣef wugur-​agi. Heddeṛ-​as dima tideţ. (Ifasusiyen 4:25) Ɣas akken yewɛeṛ aţ-​ţeṭṭfeḍ deg yiman-​ik, ḥader iwakken ur tessaɛlayeḍ ara ṣṣut-​ik. Leǧwab s ṣṣut ḥlawen yezmer ad yeqḍeɛ i lhedṛa tamecṭuḥt aţ-​ţuɣal d amennuɣ ameqran.—Lemtul 15:4; 26:20.

Ɣas ur k-​yeɛǧib ara ṛṛay n tmeṭṭut-​ik, ili-​k d aḥnin; beggen-​as-​d belli tḥemmleḍ-​ţ yerna teţqadareḍ-​ţ. (Ikulusiyen 4:6) Xdem lmeǧhud-​ik akken a d-​tafeḍ s lemɣawla tifrat i wugur-​nwen yerna ur ţţemɣunzut ara.—Ifasusiyen 4:26.

AYEN I TZEMREḌ AŢ-​ŢXEDMEḌ:

• Xtiṛ lweqt iwulmen akken aţ-​ţhedṛeḍ ţ-​ţmeṭṭut-​ik ɣef wugur-​nwen

• M’ara tili d nnuba-​k aţ-​ţefkeḍ tameẓẓuɣt i tmeṭṭut-​ik, ur s-​gezzem ara awal. Tzemreḍ a d-​thedṛeḍ umbeɛd

AYEN I D-​IQQAR WEDLIS IQEDSEN: “Iḥninet gar-​awen; di leqder, wa ad iţɛuzzu wa.” (Iṛumaniyen 12:10) Yesɛa mliḥ azal wamek i teţḥessiseḍ. Nadi aţ-​ţfehmeḍ s leḥnana akk-​d wannuz ṛṛay i-​d-​tefka tmeṭṭut-​ik. (1 Buṭrus 3:8; Yeɛqub 1:19) Ur steɛmil ara la teţḥessiseḍ. Ma yella wamek, ḥbes ayen i la txeddmeḍ akken aţ-​ţḥesseḍ mliḥ i tmeṭṭut-​ik, neɣ m’ulac ḍleb-​as ma maɛlic aţ-​ţhedṛem ɣef wayenni mbeɛd. Ma yella tḥesbeḍ-​ţ am wakken ţ-​ţarfiqt-​ik mačči ţ-​ţaxṣimt-​ik, ur tţeččḥeḍ ara bihfih.—Amusnaw 7:9.

AYEN I TZEMREḌ AŢ-​ŢXEDMEḌ:

• Ɣas m’ur k-​yeɛǧib ara wayen iwumi i tselleḍ, ţḥessis s nneyya-​k

• Nadi aţ-​ţfehmeḍ acu i tebɣa a d-​tini tmeṭṭut-​ik. Ţţarra ddehn-​ik ɣer ṣṣut n taɣect-​is d wayen i d-​iţbeggin wudem-​is akk-​d lǧeţţa-​s meṛṛa

AYEN I D-​IQQAR WEDLIS IQEDSEN: “Mkul leɛtab, deg-​s nnfeɛ; lketṛa n wawal tessawal i laẓ.” (Lemtul 14:23) Ur ilaq ara kan aţ-​ţemsefhamem s wawal ɣef kra n tifrat, yelzem daɣen aţ-​ţṭebbqem leqrar i teṭṭfem lwaḥid. Annect-​a yeṭṭalab-​ed tikwal aṭas n lmeǧhud, meɛna d ayen iwulmen. (Lemtul 10:4) Ma yella temɛawanem, ‘a d-​tesfaydim akteṛ si leɛtab-​nwen.’—Amusnaw 4:9.

AYEN I TZEMREḌ AŢ-​ŢXEDMEḌ:

• Qesdet jmiɛ kečč ţ-​ţmeṭṭut-​ik ɣef wayen ara yexdem mkul yiwen deg-​wen bac aţ-​ţefrum ugur-​nwen

• Si teswiɛt ɣer tayeḍ, ţnadit aţ-​ţeẓrem s anda i tewwḍem deg wayen yeɛnan leqsed-​agi-​nwen